千禧港女神探（一）春風化雨殺人事件: 第卅八話　虛情假意

第卅八話　虛情假意

張宇傑說：「咁我賭一千，你啃唔落。」

徐梓俊說：「我都賭一千，你啃唔落。」

黃傳聲說：「哈哈哈！呢萬二我袋硬！」

古偉達說：「你上咗佢先算，一日未上都未算。」





黃傳聲說：「無問題，我要你哋三個輸得口服心服，Tina一定會成為我嘅鞭下亡魂。」

有一日，4A班各同學都有課外活動，大約17:30才離開學校。

外面下着滂沱大雨，而麥劍蘭沒有帶雨傘，正在為離開而着急。

謝隆恩剛好經過，並拿出雨傘，想與麥劍蘭一起離開學校。

謝隆恩說：「我遮妳啦！」





然而，麥劍蘭仍然一如以往，寧願等雨停也不願意接受謝隆恩的恩惠。

麥劍蘭說：「彈開啦！死肥仔！」

這時，黃傳聲慢慢走近，亦拿出雨傘。

黃傳聲說：「我遮妳啦！」

一直心儀黃傳聲的麥劍蘭，期待已久的白馬王子出現，實在有點心如鹿撞的感覺。





麥劍蘭說：「好呀！你真係好人！」

古偉達、張宇傑和徐梓俊在後面，看見整個情形。

張宇傑說：「其實Tina同肥隆先至係天生一對！」

徐梓俊說：「可惜Tina無自知之明，見到靚仔就撲埋去。」

古偉達說：「我哋就食住花生等睇好戲啦！」

謝隆恩看見黃傳聲和麥劍蘭一起漫步離開，唯有一個人，孤單落泊地獨自回家。

黃傳聲說：「今日咁大頭蝦呀！好彩遇到我，如果唔係妳就變成落湯雞。」

麥劍蘭說：「妳好衰㗎！一時唔記得，唔該曬你囉！」





黃傳聲說：「咁又唔使！男仔保護女仔，天經地義。」

麥劍蘭說：「其他男同學淨係識去黐埋Rainbow度，根本當我無到，只有你理吓我。」

黃傳聲說：「唔係丫！頭先我都見到肥隆想遮妳！」

麥劍蘭說：「嗰條死肥仔咁樣衰，讀書又差過我，真係癩蛤蟆想食天鵝肉。」

黃傳聲說：「妳全班考第二，我嘅成績都差過妳，咁我係咪都算癩蛤蟆？」

麥劍蘭說：「點會喎！讀書只係人生嘅一部份，唔係全部，你仲有好多優點。」

黃傳聲說：「哦？係咩？例如呢？講來聽吓！」





麥劍蘭說：「你個人風趣幽默，又識搞氣氛，應該好多女仔冧你。」

黃傳聲說：「無咁誇張，不過的確有唔少。」

麥劍蘭說：「你應該都係同其他男仔一樣，鍾意Rainbow。係咪？」

黃傳聲說：「我唔否認的確覺得佢好靚，但係叫佢『女神』就真係太誇張，

喺我眼中，佢最多只係花樽，我比較鍾意有內涵嘅女仔。」

麥劍蘭說：「咁Rainbow全班考第一，唔算有內涵咩？」

黃傳聲說：「佢咪淨係識讀書考試，最多只係一條書蟲。」

麥劍蘭說：「咁你對乜嘢類型嘅女仔有興趣呢？」





黃傳聲說：「我個人比較傳統，想要一個賢內助相夫教子，識得照顧屋企就得。」

麥劍蘭說：「睇唔出喎！你平時口花花，仲以為你好花心。」

黃傳聲說：「呢啲只係大家嘅錯覺，我的確好受女仔歡迎，但係我對感情絕對專一。」

麥劍蘭說：「既然Rainbow唔係你杯茶，咁4A班裏面有無睇啱邊個？」

黃傳聲說：「暫時都未有，我心儀嘅女仔要有好嘅廚藝，鎖得住我個胃，自然留得住我個心。」

麥劍蘭說：「原來你鍾意呢種女仔，等我幫你留意吓。」

黃傳聲說：「依家呢一代每個父母都當仔女係寶，好多屋企仲有女傭，





仲邊有咁多女仔識整嘢食，唔係『地獄廚神』已經好難得。」

麥劍蘭說：「傾咗咁耐，唔經唔覺就到我屋企樓下。」

黃傳聲說：「咁我走先喇！聽日再見！」

這時，麥劍蘭看見黃傳聲左邊半身全濕透了，而自己龐大的身體竟然滴水不沾。

想不到黃傳聲這麼體貼，為了保護她，竟然置自己於不顧，一股暖流滲入麥劍蘭的心中。