千禧港女神探（一）春風化雨殺人事件: 第三十話　親自調查

第三十話　親自調查

張宇傑和徐梓俊回到5A班的課室，葉雨虹看見黎國光沒有回來，知道事情不妙。

就在小息時，葉雨虹去截住兩人。

葉雨虹說：「Edward點解咁耐都未返來？」

徐梓俊說：「點知佢喎！」





張宇傑說：「話唔定俾個差婆拉咗呢！」

徐梓俊向張宇傑打了一個眼色，示意他不要亂說話。

葉雨虹說：「你講上次嗰個Madam？Edward咩事俾佢拉呀？」

張宇傑說：「妳仲好講，咪係妳累佢⋯⋯」

徐梓俊說：「唔好同佢講咁多啦！」





徐梓俊想拉走張宇傑，葉雨虹想攔阻，卻被兩人輕易避開。

就在走出課室的一剎，突然被一人擋着，此人正是葉雨晴。

葉雨晴說：「頭先我俾Miss Chan Chan喺走廊罰企，睇到警察帶走一個人，大概估到咩事。」

張宇傑說：「行開！咪阻住曬！」

徐梓俊說：「咩事都唔關妳事！」





兩人想突破葉雨晴的攔阻，以為可以輕易避開。

葉雨晴說：「想走？貼身防守！」

葉雨晴以籃球控球後衛的技術防止兩人越過，輕易就抓着兩人的手腕。

兩人沒有想過會被低自己兩年級的女生制伏，唯有無奈地回5A班課室。

葉雨晴說：「被警車送走嗰個應該係Edward啦！」

葉雨虹說：「係呀！細妹妳真係醒目！」

葉雨晴說：「究竟發生乜嘢事？點解Edward會俾個差婆拉咗？」

張宇傑說：「仲好講！咪為咗爭妳家姐囉！」





徐梓俊說：「兩個傾唔掂數，就約好去決鬥。」

葉雨晴說：「Edward咁嘅壞鬼書生竟然會打贏？」

葉雨虹說：「Winson今日都無返學，可能重傷入咗醫院，不如我哋去探佢。」

張宇傑說：「探條毛咩！條友都瓜咗啦！」

徐梓俊說：「聽個差婆講，好似同Victor一樣，都係中毒身亡。」

葉雨晴說：「你哋兩個同Victor、Winson咁熟，一定知道好多內情。快啲講啦！」

就在這時，有人輕叩了5A班課室的大門，各人就朝着大門的方向望去。





蔡智勇說：「唔好為難佢哋喇！妳哋想知道嘅事，等我話俾妳哋聽。」

於是，蔡智勇就將葉雨虹和葉雨晴兩姐妹帶到校務處的會議室。

葉雨虹說：「蔡Sir究竟件事係點樣㗎？我唔相信Edward會為咗我去殺人！」

蔡智勇說：「我都唔相信黎國光咁乖仔會殺人，我就將我所知道嘅講俾妳哋聽。」

葉雨晴說：「Winson真係中毒死嘅？佢係點樣中毒㗎？」

蔡智勇拿出手機，將拍下的照片給兩人看。

蔡智勇說：「妳哋睇吓個劍鞘同埋把劍，認得出嘛？」

葉雨虹說：「普通玩具劍，無乜特別。」





葉雨晴說：「香港漫畫《風雲天下》入面嘅『天下第一劍』，應該係賣俾fans嘅紀念品。」

蔡智勇說：「正常來講，把劍應該未開鋒，但係今次唔單止開鋒，仲搽咗毒液。」

葉雨虹說：「咁把劍係屬於Winson定係Edward㗎？」

蔡智勇說：「唔太清楚，我只知道依家表面證供對黎國光好不利。」

葉雨晴說：「咪住先，佢哋兩個決鬥嘅事係幾時約定？幾時發生？」

蔡智勇說：「都係琴日約定，放學發生，一切都來得好突然。」

葉雨晴說：「咁案發地點喺邊度？邊個最先發現死者？」





蔡智勇說：「校工誠叔喺地下男更衣室發現黃傳聲，佢仲見到黎國光喺入面出來。」

葉雨晴說：「咁就奇怪，把劍應該唔屬於佢哋兩個。」

葉雨虹說：「點解咁講呢？唔通當時仲有其他人喺入面？」

蔡智勇說：「應該無，當時誠叔見唔到有其他人出入。」

葉雨晴說：「咁就更加證明把劍係屬於真正兇手所有！」