千禧港女神探（一）春風化雨殺人事件: 第廿九話　拘捕疑兇

第廿九話　拘捕疑兇

徐梓俊說：「Madam咁快又見到你！」

趙芷芳說：「今次係來調查關於黃傳聲被殺一案！」

徐梓俊說：「琴日仲好地地，咁快就死咗？」

趙芷芳說：「人就係咁化學，你講吓琴日佢同黎國光發生過乜嘢事。」





徐梓俊說：「有咩事喎！咪爭女囉！」

趙芷芳說：「你係話佢哋兩個爭葉雨虹？」

徐梓俊說：「咪就係囉！呢個世界大把女啦！點解要為一棵樹而放棄成個森林呢？」

趙芷芳說：「根據黎國光所講，佢話黃傳聲、你、張宇傑對葉雨虹意圖不軌，係咪真㗎？」

徐梓俊說：「咩叫意圖不軌，妳講清楚啲好。」





趙芷芳說：「佢嘅意思係你哋想輪流同佢發生性關係。」

徐梓俊說：「你咁講咪即係輪姦？咪玩啦！為一個女仔犯法坐監值唔值呀？」

趙芷芳說：「咁你哋三個係咪有過類似嘅對話？」

徐梓俊說：「係就係，不過香港有言論自由，唔係講吓都犯法掛？」

趙芷芳說：「講吓當然唔係犯法，不過黎國光信到十足，之後仲想極力阻止。」





徐梓俊說：「Edward係Rainbow嘅頭號狗公全班都知，其實最想搞Rainbow嗰個係佢自己。」

趙芷芳說：「咁佢哋兩個已經係男女朋友？」

徐梓俊說：「佢就想喇！觀音兵就有佢份，佢一味生人霸死地，Winson睇唔過眼先同佢爭。」

趙芷芳說：「就係咁樣兩個就約咗係地下嘅男更衣室決鬥？」

徐梓俊說：「差唔多啦！估唔到Edward咁揪得，監生打死Winson。」

趙芷芳說：「佢梗係無咁勁啦！你有無見過呢把劍？」

趙芷芳拿出兇器的照片，遞給徐梓俊看。

徐梓俊說：「『天下第一劍』？呢把就係兇器？」





趙芷芳說：「把劍開咗鋒，仲搽埋毒液。」

徐梓俊說：「咁即係Winson準備好劍，結果反而死係自己把劍之下。」

趙芷芳說：「點解你會認為把劍係屬於死者嘅呢？」

徐鋅俊說：「Edward份人咁單純，點會諗到咁多，梗係蠱蠱惑惑嘅Winson帶去案發現場。」

趙芷芳說：「你係話黃傳聲想用把劍傷害黎國光，結果把劍被搶去，之後被拮傷？」

徐梓俊說：「應該係啦！今次Winson真係聰明反被聰明誤！」

趙芷芳說：「成件事明白曬！你可以走喇！」





張宇傑和徐梓俊離開後，趙芷芳和高子峰繼續商量案情。

趙芷芳說：「聽過張宇傑同徐梓俊嘅口供，你有乜嘢睇法？」

高子峰說：「唔理把劍係屬於疑兇定係死者，黎國光都係有意識用劍拮傷黃傳聲。」

趙芷芳說：「而且殺人動機亦都好明顯，就係情殺。」

高子峰說：「既然已經證據確鑿，仲有乜嘢好諗？」

趙芷芳說：「問題係張宇傑同徐梓俊兩個人嘅口供有矛盾，呢個係好重要嘅疑點。」

高子峰說：「兩個人只係個人推斷把劍屬於邊個，就算睇法相反，都唔算係矛盾。」

趙芷芳說：「但係疑點利益歸於被告，到時就算拉咗黎國光返去都告唔入。」





高子峰說：「話唔定上次古偉達都係佢殺，妳唔拉佢對得住兩個死者嘅屋企人咩？」

趙芷芳說：「咁又係，黎國光嘅嫌疑的確比孫葡萄同葉雨虹更大。」

高子峰說：「更何況呢單校園兇殺案已經引起傳媒廣泛注意，上頭要我哋盡快破案。」

趙芷芳說：「咁又係，我哋警察只係負責拉人，疑兇有無罪就交俾律師同法官去判斷。」

高子峰說：「咪就係囉！警察都係一份工，最重要係向上頭交數。」

趙芷芳說：「既然係咁，我已經有咗決定。」

趙芷芳和高子峰離開會議室，在校務處看見蔡智勇和黎國光。





趙芷芳說：「黎國光，你涉嫌謀殺中國籍男子黃傳聲，依家要拘捕你。」

趙芷芳為黎國光戴上手銬，並套上紙袋。

蔡智勇說：「佢就係兇手？有無搞錯呀？」

高子峰說：「我哋警察做嘢係跟足程序，唔會冤枉好人。」

於是，趙芷芳和高子峰就將黎國光押上警車，送往大埔區警署。