千禧港女神探（一）春風化雨殺人事件: 第廿八話　含冤莫白

第廿八話　含冤莫白

第二天，趙芷芳和高子峰來到學校，找疑犯黎國光錄取口供。

黃傳聲沒有上學，5A班的同學只是以為他病了，對他的死毫不知情。

訓導主任親自來到5A班的課室，要求黎國光到校務處的會議室。

趙芷芳和高子峰正準備着，等候黎國光到來。





趙芷芳留意到黎國光的外套沒有血跡，好明顯不是昨天那一件。

黎國光說：「上次Victor單案有新進展？」

趙芷芳說：「唔係，我哋今次來係要調查黃傳聲被殺一案。」

黎國光說：「咩話！琴日仲生勾勾，咁快就瓜咗。佢係點樣死㗎？」

趙芷芳說：「不如你先交待一吓，琴日你同佢發生乜嘢事。」





黎國光說：「我琴日同佢打交，仲拮傷咗佢，不過流咁少血未至於會死人。」

趙芷芳說：「既然你承認同死者有爭執，咁你講吓因乜嘢事要打交。」

黎國光說：「呢個淫渣話要搞Rainbow，仲話自己食完，再俾老友執返一劑，我點可以忍佢。」

趙芷芳說：「你係話佢對葉雨虹有不軌企圖？佢嘅老友係指邊個？」

黎國光說：「咪係Kenneth同Jeffery囉！」





趙芷芳說：「即係張宇傑同徐梓俊啦！點解你要咁緊張葉雨虹？你係佢男朋友？」

黎國光說：「我係佢嘅守護天使，就算佢未曾接受我，我都誓死要保護佢。」

趙芷芳說：「好一個情痴，咁即係話為咗葉雨虹，就算殺死黃傳聲你都願意。」

黎國光說：「我願意唔等於我有做過，我只承認拮傷咗佢。」

趙芷芳說：「咁蓄意傷人呢條罪你走唔甩，至於兇器方面，係你帶去定係死者帶去案發現場？」

黎國光說：「呢個我唔清楚，我只知道打交嗰陣，把劍喺我件外套度跌出來。」

趙芷芳說：「係咩？可惜我哋係兇器上面只掃到你同死者嘅指紋，無第三者嘅指紋。」

黎國光說：「就算把劍係我帶去，照計呢啲玩具劍，應該傷唔到人，更加無可能殺死人。」





趙芷芳說：「嗰把劍已經開鋒，而且搽咗毒液，佢係中毒身亡。」

黎國光說：「唔係掛！咁我咪變咗殺人兇手？邊個咁大整蠱呀？」

趙芷芳說：「既然你承認把劍係你帶去，亦即係你有預謀將死者毒殺。」

黎國光說：「我同Winson打交只係想阻止佢對Rainbow不利，我根本無諗過要殺佢。」

趙芷芳說：「你口口聲聲話佢要對葉雨虹不軌，都只係你片面之詞，你有乜嘢證據支持？」

黎國光說：「你唔信可以問吓Kenneth同Jeffery，佢哋兩個可以做證。」

趙芷芳說：「咁好，不過你係疑兇，暫時唔可以離開。」





黎國光說：「我就坐喺度等，我相信好快會證明到我係清白。」

黎國光就離開會議室在校務處等，蔡智勇去5A班的課班帶張宇傑和徐梓俊到校務處的會議室。

張宇傑說：「Madam又係妳？今次又有乜嘢事？」

趙芷芳說：「今次我哋係來調查黃傳聲被殺一案，你講吓琴日佢同黎國光之間發生乜嘢事。」

張宇傑說：「佢死咗？唔係掛！爭女都搞出人命！」

趙芷芳說：「你係話葉雨虹？兩個都鍾意佢？」

張宇傑說：「咪係囉！兩個琴日嗌交嗌到火紅火綠，最後約定放學去地下嘅男更衣室解決。」

趙芷芳說：「你嘅意思係決鬥？打贏嗰個話事？」





張宇傑說：「類似啦！真係睇唔出Edward 出手咁重，可以打死Winson。」

趙芷芳說：「佢係受傷之後中毒身亡，你有無見過呢把劍？」

趙芷芳拿出兇器的照片，遞給張宇傑看。

張宇傑說：「『天下第一劍』？妳唔係想話呢把劍就係兇器掛？」

趙芷芳說：「把劍已經開鋒，而且搽咗毒液。」

張宇傑說：「估唔到Edward為咗Rainbow，一早已經準備好架生。」

趙芷芳說：「咦？我都無講把劍係屬於邊個，你唔俾係屬於死者嘅咩？」





張宇傑說：「呃……呢個……諗都諗到啦！Winson同Victor一樣打開拳頭交，點會帶架生。」

趙芷芳說：「另外，黎國光話黃傳聲、你、徐梓俊對葉雨虹意圖不軌，有無件咁嘅事？」

張宇傑說：「咁男仔鍾意女仔，就梗係想搞佢。我哋三個吹水，條傻仔就當真。」

趙芷芳說：「多謝你提供嘅資料，輪到下一個。」

張宇傑離開會議室，換徐梓俊入來。