千禧港女神探（一）春風化雨殺人事件: 第二十話　錄取口供IV

第二十話　錄取口供IV

趙芷芳說：「黎國光，Edward，5A班班會內副。10月15日生日party就係你負責錄影？」

黎國光說：「係呀！我一向鍾意拍攝，影相同錄影都可以記住美好嘅時光。」

趙芷芳說：「照你咁講，你應該拍到在場每個人做緊乜嘢。」

黎國光說：「咁又未必，我主要都係拍攝生日party嘅主角，即係壽星女Rainbow。」





趙芷芳說：「聽講⋯⋯葉雨虹係你嘅意中人喎！」

被趙芷芳這麼一說，黎國光立刻臉紅耳赤，有點害羞地低下了頭。

黎國光說：「其實我⋯⋯其實⋯⋯好多男仔都鍾意佢！」

趙芷芳說：「咁又係嘅，佢生得咁靚，身材窈窕，讀書成績又好，可以稱得上係女神。」

黎國光說：「妳都認同，咁都證明我好有眼光。」





趙芷芳說：「睇來你為佢上刀上落油鑊都無問題喎！」

黎國光說：「咁⋯⋯又無咁誇張，不過我做得到嘅事，都會願意為佢去做。」

趙芷芳說：「最怕嘅係你一廂情願，而佢只當你係觀音兵，甚至利用你。」

黎國光說：「就算係做觀音兵，可以俾佢利用，我都好開心。」

趙芷芳說：「關於生日party個蛋糕，壽星女有無暗示過想要乜嘢款式？」





黎國光說：「有呀！佢話想要芒果蛋糕，最好上面有車厘子或者士多啤梨。」

趙芷芳說：「生日party完咗，葉雨虹係咪提議將垃圾掉去小圓邨垃圾收集站？」

黎國光說：「係呀！校工收工，掉垃圾係活動室垃圾桶會惹蟻。」

趙芷芳說：「跟住你就陪佢去掉垃圾？無懷疑過點解佢要咁做？」

黎國光說：「梗係無懷疑，佢一向都注重衛生，全班同學都知道。」

趙芷芳說：「明白，咁你拍攝既錄影片段，要交俾警方做呈堂證供。」

黎國光說：「無問題，我早知道警方需要，已經儲存喺USB手指。」

黎國光遞過USB記憶體，趙芷芳馬上儲存到手提電腦，然後再儲存到自己的USB記憶體。





趙芷芳說：「多謝你提供嘅錄影片段，USB手指可以還俾你。到下一個。」

黎國光接過USB手指，趙芷芳開始在手提電腦播放案發當日的片段。

趙芷芳說：「葉雨虹，Rainbow，5A班班會主席。妳就係生日party嘅壽星女。」

葉雨虹說：「係呀！好多謝各位同我慶祝生日，只係估唔到會發生不幸嘅事。」

趙芷芳說：「咁又係嘅，自己生日竟然死咗個同學，紅事變成白事。」

葉雨虹說：「Victor平時的確係好乞人憎，但係都未至於要死咁嚴重。」

趙芷芳說：「個個都講到佢咁差，咁佢有無得罪過妳？」





葉雨虹說：「又未至於得罪，只不過佢成日搶我嘅嘢，想引起我注意。」

趙芷芳說：「呢種間接示愛方式的確同其他同學好唔同！」

葉雨虹說：「示愛？我完全feel唔到，我覺得佢似玩多啲。」

趙芷芳說：「講返單案，妳係咪曾經向黎國光暗示過生日蛋糕嘅款式？」

葉雨虹說：「的確隨口講過想要芒果蛋糕，最好上面有車厘子或者士多啤梨。」

趙芷芳說：「咁即係話就算妳無份去買蛋糕，都一早知道蛋糕嘅款式。」

葉雨虹說：「咁佢哋都未必會照我意思去買，話唔定會買其他款式俾我驚喜。」

趙芷芳說：「生日party完咗，係妳提議將垃圾掉去小圓邨垃圾收集站？」





葉雨虹說：「係呀！校工收工，我唔想就咁掉喺度惹蟻嘛！」

趙芷芳說：「的確係好好嘅藉口，配合妳注重衛生嘅性格，來得好自然。」

葉雨虹說：「我唔係好明白妳咁講係乜嘢意思喎？」

趙芷芳說：「古偉達被驗出係食物中毒，胃部驗到有巴豆同尼古丁，佢先肚瀉之後中毒身亡。

餐具入面或多或少都會殘留落毒嘅證據，妳提議將垃圾掉離學校，毫無疑問就係想毀滅證據。」

葉雨虹說：「妳亂講！我又點會知道餐具入面會有毒，我又點會知道Victor會死。」

趙芷芳說：「仲有，為咗洗脫嫌疑，妳先將自己設為被落毒嘅目標。





點知古偉達手多，搶咗妳粒有毒嘅車厘子，其實佢嘅行動，都喺妳嘅計劃之內。」

葉雨虹說：「妳越講越離譜，妳想砌我生豬肉，屈我係殺人兇手？」

趙芷芳說：「依家表面證據全部指向妳，只係動機牽強些少，我相信妳一定有其他殺人嘅原因。」

葉雨虹說：「妳知道牽強就好，我品學兼優，人緣又好，究竟為乜嘢要令自己前途盡毀？」

趙芷芳說：「呢個警察會去查，依家要拉妳返差館，扣留妳48個鐘。」