千禧港女神探（一）春風化雨殺人事件: 第廿一話　神探登場

第廿一話　神探登場

趙芷芳拿出手扣，將葉雨虹拘捕，給她帶上頭套。

葉雨虹離開校務處的會議室，蔡智勇和5A班的同學均感到驚訝。

蔡智勇說：「Madam妳咁係乜嘢意思？」

趙芷芳說：「葉雨虹涉嫌謀殺古偉達，依家要拉返差館，扣留48個鐘。」





黎國光說：「妳係想喺呢兩日搵到足夠證據？」

趙芷芳說：「依家葉雨虹嘅嫌疑最大，扣留佢除咗方便搜集證據，仲有避免再有人被殺。」

黃傳聲說：「就算Rainbow唔係兇手，來緊兩日係星期六、日，兇手想殺人都好難落手。」

徐梓俊說：「之後Rainbow返來，啱啱好係星期一要返學，到時再有人死，妳又可以再屈佢。」

張宇傑說：「定係單案無進展，妳求其搵個人返去向上頭交代呀？」





高子峰說：「你哋收聲，邊個敢阻住曬，我就告你哋阻差辦公。」

謝隆恩說：「我就企喺度，有本事你就撞開我。」

高子峰企圖推開謝隆恩，不過出盡九牛二虎之力，仍然是紋風不動。

高子峰沉不住氣，正想拿出警棍，被趙芷芳出手制止。

趙芷芳說：「蔡Sir，警察辦案一定會跟足程序去做，絕對唔會冤枉好人。」





蔡智勇說：「明白，大家唔好阻住Madam做嘢。快啲讓開！」

謝隆恩不想令蔡智勇難做，也就識趣地讓路。

葉雨虹說：「蔡Sir，幫我通知屋企人。」

蔡智勇說：「放心，我絕對相信妳係無辜。」

於是，趙芷芳和高子峰就將葉雨虹押上警車，送到大埔區警署。

5A班學生紛紛離開校務處，蔡智勇致電葉雨虹的媽媽，劉月嫦在家中接聽。

劉月嫦說：「咩話？大妹俾警察拉咗？仲話佢殺人？」

劉月嫦知道消息後，亦立刻致電幼女和丈夫，葉雨晴和葉知秋在路上接聽。





葉雨晴說：「咩話？家姐俾警察拉咗？仲話佢殺人？」

葉知秋說：「咩話？大妹俾警察拉咗？仲話佢殺人？」

就在警車離開校園後，林嘉慧和何四悅在竊竊私語。

林嘉慧說：「估唔到平時懶係好人嘅Rainbow，原來係殺人兇手。」

何四悅說：「咪就係，Victor係就係乞人憎，但係至少光明磊落。」

林嘉慧說：「無錯，真小人遠遠唔及偽君子咁恐怖。」

何四悅說：「如果Rainbow真係要坐監，到時女神嘅寶座就會懸空。」





林嘉慧說：「話唔到我或者妳，就可以成為新一任女神。」

何四悅說：「就算做唔成女神，我諗會5A班嘅『生態』都會唔同曬。」

林嘉慧說：「至少班男仔都會轉移『搵食』目標，我哋就會多好多男仔追。」

何四悅說：「我相信警察嘅辦案能力，我哋就食住花生等睇戲。」

另一方面，劉月嫦和葉雨晴分別從家中和路上趕往大埔區警署。

今天，葉知秋沒有緊急的案件要辦，也在西九龍趕往大埔區警署。

葉雨晴最先到達，隨後劉月嫦亦趕到，兩人均被拒絕與葉雨虹見面。

大約30分鐘後，葉知秋亦趕到，立刻要見負責這宗案件的趙芷芳。





葉知秋已經四十多歲，然而外表看起來只像二十多歲。

而且就算是女兒被拘捕，心裏再焦急，仍然是風度翩翩，神態自若。

趙芷芳說：「原來係大名鼎鼎嘅『不老神探』葉知秋，咩風吹你來大埔差館？」

葉知秋說：「過奬！未請教！我個女俾妳拉咗，我係來保釋佢嘅。」

趙芷芳說：「我係趙芷芳高級督察。你個女叫咩名？關於邊單案？」

葉知秋說：「我個女叫葉雨虹，以謀殺罪被拘捕。」

趙芷芳說：「原來係佢，你都知道案情嚴重，警方依家要扣留佢48個鐘。」





葉知秋說：「咁妳有無決定性嘅證據？如果有就落案起訴佢，無嘅話我就要保釋佢。」

趙芷芳說：「現階段的確未有決定性嘅證據，你可以保釋葉雨虹，保釋金額係50,000蚊。」

葉知秋說：「我明白，老規距，每星期返來報到一次。」

趙芷芳說：「我要提醒你，呢度係大埔，唔係西九龍，呢單案你唔可以插手。」

葉知秋說：「唔同環頭嘅案我理唔到，更何況我同疑犯係父女關係，更加唔方便介入。」