千禧港女神探（一）春風化雨殺人事件: 第十九話　錄取口供III

第十九話　錄取口供III

趙芷芳說：「多謝你嘅合作，到下一個。」

趙芷芳說：「張宇傑，Kenneth，5A班班會學術。10月15日生日party就係你負責分派餐具？」

張宇傑說：「係呀！分工合作嘛！唔通乜都要肥隆做曬咩！」

趙芷芳說：「嗰日由謝隆恩拎蛋糕返來之後開始，有乜嘢特別事發生？」





張宇傑說：「咪又係點蠟燭、唱生日歌、許願、切蛋糕嗰啲嘢囉！」

趙芷芳說：「蛋糕係由邊個來切？點樣切法？」

張宇傑說：「原本壽星女Rainbow切一刀，之後Jeffery話等佢切，佢竟然切成『井』字。」

趙芷芳說：「你講嘅係徐梓俊。點解佢要切成『井』字呢？」

張宇傑說：「鬼知咩！條友不嬲都神神化化，話唔定佢覺得切『井』字型啲掛。」





趙芷芳說：「會唔會係方便切為九份呢？」

張宇傑說：「或者係啦！正常切成『米』字好難平均分成九份。」

趙芷芳說：「佢應該係想將中間有車厘子嗰份俾壽星女啦！」

張宇傑說：「咁都好正常，唔係主角咪食士多啤梨囉！」

趙芷芳說：「跟住古偉達同葉雨虹係咪喺度爭執？」





張宇傑說：「Victor佢成日都係咁啦！特登激嬲Rainbow，引起佢注意。」

趙芷芳說：「咁佢今次又點激嬲壽星女呢？」

張宇傑說：「好似係搶佢件蛋糕來食！」

趙芷芳說：「大家都有一件使乜嘢搶？會唔會係搶唯一嗰粒車厘子？」

張宇傑說：「呢個我唔太肯定，有咁嘅可能。」

趙芷芳說：「咁你係根據乜嘢次序分派紙杯、紙碟、膠叉呢？」

張宇傑說：「是但啦！不過，我拆好包裝之後，Victor已經喺正我面前，唯有俾佢先。」

趙芷芳說：「照你咁講，即係其他人就隨機。咁汽水由邊個負責斟呢？」





張宇傑說：「無人負責斟，百分百DIY。」

趙芷芳說：「今日問住咁多先，到下一個。」

趙芷芳說：「徐梓俊，Jeffery，5A班班會文書。10月15日生日party就係你負責切蛋糕？」

徐梓俊說：「係呀！唔通要壽星女自己來咩！」

趙芷芳說：「正常來講，切蛋糕應該係切成『米』字。點解你要切成『井』字咁怪雞？」

徐梓俊說：「乜嘢怪雞呀？呢啲叫創意呀！」

趙芷芳說：「應該唔係純粹創意，而係想將蛋糕上面嘅水果平均分俾九個班會幹事。」





徐梓俊說：「Madam又幾醒喎！『米』字切八份，『井』字切九份。」

趙芷芳說：「之後你就將中間有車厘子嗰份遞俾壽星女？」

徐梓俊說：「咁就梗係啦！佢先至係生日party嘅主角嘛！」

趙芷芳說：「之後古偉達對葉雨虹做過乜嘢？點解壽星女會追住佢來打？」

徐梓俊說：「我見到佢搶咗粒車厘子走，明明自己已經有粒士多啤梨，真係好過份。」

趙芷芳說：「明明係壽星女，結果一粒水果都無，又真係幾激氣。」

徐梓俊說：「Victor一向唔鍾意低聲下氣氹女仔，反而鍾意咁樣激Rainbow，想引起佢注意。」

趙芷芳說：「如果粒車厘子有毒，咁即係話兇手原本想殺嘅係葉雨虹。係咪？」





徐梓俊說：「理論上係，不過Rainbow人緣咁好，有邊個會想佢死？」

趙芷芳說：「葉雨虹嘅然咁受男同學歡迎，會唔會有女同學妒忌佢？」

徐梓俊說：「咁女仔嘅心思我就唔太清楚，就算有都未至於想佢死。」

趙芷芳說：「生日party完咗之後，垃圾掉去邊度？」

徐梓俊說：「原本肥隆想掉喺活動室嘅垃圾桶就算，不過就俾Rainbow話佢懶。」

趙芷芳說：「咁葉雨虹提議將垃圾掉去邊度？」

徐梓俊說：「佢話驚惹蟻，要將垃圾拎去小圓邨垃圾收集站。」





趙芷芳說：「咁結果由邊個拎垃圾去小圓邨垃圾收集站？」

徐梓俊說：「死狗公Edward陪佢嘅女神一齊去囉！」

趙芷芳說：「你講嘅係黎國光，睇來佢真係為咗葉雨虹做乜都得。」

徐梓俊說：「為咗女神，話唔定要佢殺人放火都願意。」

趙芷芳說：「明白，多謝你提供資料，到下一個。」