千禧港女神探（一）春風化雨殺人事件: 第十八話　錄取口供II

第十八話　錄取口供II

趙芷芳說：「黃傳聲，Winson，5A班班會外副，請你講吓10月15日生日party發生過嘅事。」

黃傳聲說：「我負責做當日司儀，主持大局，帶住大家玩遊戲。」

趙芷芳說：「之後大約4:30左右，就開始切蛋糕？」

黃傳聲說：「無錯，肥隆返來之後，個蛋糕放入雪櫃一陣，之後就拎出來。」





趙芷芳說：「照你咁講，你所企嘅位置，應該可以睇到大家做緊乜嘢。」

黃傳聲說：「當時Edward個傻仔負責錄影，咪係咁喺度拍Rainbow。」

趙芷芳說：「你講嘅係黎國光。佢點解要錄影生日party嘅過程？」

黃傳聲說：「仲使乜講，梗係想留住女神美好嘅回憶，博女神歡心。」

趙芷芳說：「咁除咗拍葉雨虹，應該多少都會拍到其他人。」





黃傳聲說：「咁就好難講，就算有都唔會多，條友重色輕友，有異性無人性。」

趙芷芳說：「咁其他人有無乜嘢特別情況發生？」

黃傳聲說：「我見到Kenneth同Jeffery好似有啲古怪！」

趙芷芳說：「你講張宇傑同徐梓俊。佢兩個點古怪法？」

黃傳聲說：「Jeffery切蛋糕嗰陣背住大家，Kenneth拆紙杯、紙碟、膠叉嘅包裝嗰陣都係。」





趙芷芳說：「你想講佢地對食物同餐具做過手腳？會唔會只係純粹巧合？」

黃傳聲說：「咁我就唔清楚，妳要問佢哋兩個先知。」

趙芷芳說：「我一陣會問佢哋，跟住係咪古偉達食蛋糕嗰陣突然肚痛？」

黃傳聲說：「係呀！可能晏晝食飯唔乾淨掛！」

趙芷芳說：「點解你唔覺得係生日party嘅食物同飲品有問題？」

黃傳聲說：「大家食同一個蛋糕，幾支汽水大家都有飲。點解得Victor一個出事？」

趙芷芳說：「呢個我哋警察會查證。你同古偉達熟唔熟？佢最近有無得罪人？」

黃傳聲說：「嘩哈哈！佢一向都係學校入面嘅惡霸，仇家周街都係。」





趙芷芳說：「照咁睇，隨機殺人嘅機會比較微，應該係仇殺。」

黃傳聲說：「我可以提供嘅資料係咁多，希望幫到妳。」

趙芷芳說：「多謝你嘅寶貴資料，到下一個。」

趙芷芳說：「謝隆恩，Ronald，5A班班會總務。10月15日生日party就係你負責去拎蛋糕？」

謝隆恩說：「係呀！呢啲粗重功夫，就梗係由我呢個總務做。」

趙芷芳說：「講吓你去拎蛋糕嘅經過啦！」

謝隆恩說：「果日4:00我離開學校，去到小圓邨聖康妮餅店，拎返之前訂咗嘅芒果蛋糕。」





趙芷芳說：「咁你幾點返到四樓活動室？」

謝隆恩說：「大約4:30左右返到啦！」

趙芷芳說：「照計CFY喺小圓邨入面，點解來回到半個鐘咁耐？」

謝隆恩說：「妳……睇我身形就知，唔怕同妳講，我二百幾磅，行得慢都好正常。」

趙芷芳說：「咁你拎蛋糕嗰陣係咪店員負責綁好蛋糕盒？返學校途中有無打開過？」

謝隆恩說：「梗係店員綁啦！我點會打開過，萬一綁唔返咪死。」

趙芷芳說：「咁切蛋糕嗰陣有無特別事發生？」

謝隆恩說：「我見到Victor同Rainbow有啲拗撬，不過唔知係乜嘢事。」





趙芷芳說：「你講古偉達同葉雨虹。係乜嘢拗撬？有幾嚴重呢？」

謝隆恩說：「我見到Rainbow追住Victor打，不過似係玩吓姐。」

趙芷芳說：「之後無幾耐古偉達就肚痛？」

謝隆恩說：「係呀！佢話急屎，之後就衝咗出去。」

趙芷芳說：「咁食完蛋糕，飲完汽水之後。生日party嘅垃圾掉咗去邊度？」

謝隆恩說：「我原本想就咁掉喺活動室個垃圾桶就算，不過Rainbow話驚惹蟻。」

趙芷芳說：「咁結果葉雨虹要你掉去邊度？」





謝隆恩說：「佢想叫我掉去小圓邨垃圾收集站，我梗係嫌遠唔肯去。」

趙芷芳說：「結果佢自己拎垃圾去收集站？」

謝隆恩說：「觀音兵Edward自願同佢嘅女神一齊拎去！」

趙芷芳說：「你講黎國光。佢真係神心，全程錄影，又陪葉雨虹掉垃圾。」

謝隆恩說：「個個男仔都係咁，為女死，為女亡。」