親愛的，原來是您: 第二章•釘《破裂》
正所謂「人愈大，愈敗壞」，我曾經係一個天真無邪既好孩子，變到一個小三開始講粗口、小四開始飲啤酒、小五開始睇咸片、小六開始打飛機既壞孩子，逢禮拜六日就早出晚歸，同屋企人既關係慢慢咁疏遠，少左同佢地講野。屋企人都出現左好大既變化，阿媽變得好麻煩，同朋友出街都問長問短，成日都問我呢樣戈樣，又成日唔比我做我想做既野，而以前我尊敬既阿哥，都開始變得令人討厭，成日夾埋阿媽一齊煩住我，我開始唔鍾意呢個屋企。
而學業方面，我既校內成績慢慢咁退步，因為自小四尾開始屋企就裝左一部電腦，我就日日返到屋企同同學打機打到食晚飯，以前日日返到屋企就做功課同溫書直到食晚飯既我已經唔存在；亦因為呢個原因，我連小五小六呈分試都冇乜點溫過書，靠住我既小聰明去裸考，最後升讀一間位於新蒲崗既band one尾英中，讀最差既E班。故事亦都由form one開始講起。
「阿釘，王sir叫你入一入教員室搵佢喎。」九月份某一日小息期間，班長Paula同我講。
「又咩事呀？今日已經係呢個禮拜第三日叫我去搵佢喇，個阿伯煩唔煩D呀？」我抱怨。「你地等埋我先好繼續傾呀，我記住你地講到小澤瑪莉亞架。」無錯，我戈陣時同成班男仔係度傾緊AV。
「知道喇，快D返黎呀。」成班男仔咁講。
我行到去教員室王sir個位，好輕挑咁同佢講：「王sir，請問今次叫我黎又有咩貴干呢？」
「仲詐傻扮懵？我尋日叫你返屋企搵爸爸簽手冊，你竟然敢冒簽？知唔知咁做犯法架？」王sir好嬲咁講。
「哦，咁你係咪想捉我去坐監先？」我繼續好串咀咁話。
「你而家咩態度呀？咁樣同老師講野架咩？」王sir變得更嬲，大聲到連成個教員室都聽到咁濟。
坐係王sir隔離既miss wong見唔對路，即刻阻止我同王sir。「好喇，你地兩個都唔好咁大聲喇，好失禮架。呢位同學，你就乖乖地返屋企搵爸爸簽左個名佢啦。」
「OK fine，咁我咪照做囉，既然miss wong妳都出到聲。」跟住我就攞左本手冊，頭也不回咁走返班房，繼續同班男仔傾AV。
「爸爸，已經好耐冇係呀媽面前提呢個人lu，都唔知點樣開口同呀媽講好……」戈日放學返屋企途中，我糾結緊點同呀媽開口提今日既事。我諗黎諗去，都唔知點樣間接D開口好，最後我決定直接咁同呀媽講。「唉，算啦，直接D同呀媽講呢件事啦，我諗佢應該會冇事既。」但係我點都估唔到，呢一日竟然為我既家庭帶黎嚴重既衝擊。
返到屋企，我見到呀媽係度洗緊菜，準備緊晚飯。「今日咁快返黎既？唔使同同學出去玩咩？」呀媽佢見我入門口就咁講。
我回答：「間唔中想早D返屋企唔得咩？妳好想我遲D先返呀？」
「你遲D返黎仲好呀，我煮少個人既飯，做少D野。」唔好介意，我同呀媽都係咁樣講野，串串貢咁，除左係煩D之外，我都好鍾意同呀媽鬥咀。
食晚飯既時候，我唔敢出聲，因為屋企人習慣食不言寢不語，一直搵唔到機會開口。
「呀媽，我有樣野想講。」食完飯後，我終於鼓起勇氣同呀媽開口。
「有咩想講就快D講啦，婆婆媽媽咁，我仲要洗碗架。」
「今日個班主任叫我搵爸爸簽手冊喎，我應該點？」
原本呀媽仲係笑笑口咁講野，但係一聽到爸爸呢兩個字之後，就即刻黑晒面。「你返去同老師講我地冇爸爸啦！」仲唔耐煩咁講。
「我之前已經咁講架喇，但係個死人王sir唔信喎。」我回答。「不如咁啦呀媽，妳唔好再瞞住我喇，將個真相講出黎啦，究竟我呀爸係邊個？同埋佢而家係邊度？」
我相信我後面戈句係導火線，呀媽聽完之後真係燥底，勁大聲咁鬧我：「唔好咁煩得唔得呀？咪話左我地屋企冇呀爸囉！」
「點會得我地屋企咁奇怪呀？人人都有呀爸，點解得我屋企會冇呀？認真D答我問題啦好冇？」我都開始有D燥。
「總之冇就係冇啦，唔好再問咁多野，即刻收聲！」
「妳叫我收就收呀？總之今日我問唔出任何野我都唔會收口！」
「你個衰仔！」
呀媽舉起右手，好大力一揮。
「啪！！！！！」
呢一巴係呀媽有史以黎最大力既一巴，我相信佢打完後手掌都好痛。我發覺自己左邊面好痛，開始發熱，仲有D暈。但係我覺得最痛既唔係我塊面，而係我個心，究竟我做錯左D咩呀媽要咁對我？我只係問下佢呀爸既野，點解佢要打我？乜我真係咁煩咩？
下一瞬間，我比憤怒蒙蔽左我既理性，想還擊，但呀哥察覺到，就捉住我隻手，好大聲咁鬧我：「你想點呀？打呀媽咁不孝？」
我一手fing開呀哥隻手，急急腳入左房，訓喺上格床度喊。點解？我乜都冇做錯，點解呀哥要我鬧？我係呢個屋企既存在價值真係咁低？
我聽到呀哥跟呀媽入左房傾左好耐，但係太細聲我聽唔清楚佢地講D咩。
一個鐘後，呀哥入左我地間房，訓喺下格床度，一句聲都唔出。呀哥連句安慰既說話都唔講，我開始覺得絕望。
過左幾分鍾後，呀哥終於開口：「細佬，其實呀媽唔係有心架。」
我頓時好憤怒，同呀哥講：「你入到黎粒聲唔出，剩係同我講D咁既野？連句安慰說話都冇，剩係幫住呀媽，你地係咪咁憎我呀？」
「唔係呀，我只係……」
「你乜都唔使講!我唔想聽你搵藉口！我而家就訓！」
最後，我一路流眼淚一路訓著左。
呢一晚，係好沉重既一晚……