親愛的，原來是您: 第三章•釘《巧遇？》

「哭泣聲絕無意義，她不會扭轉……」
晨早五點半，我呀媽個鬧鐘就係度響，因為佢係一個喺街市賣水果既小販，每日都要晨咁早起身去油麻地果欄入貨，佢就順便叫醒埋我同呀哥。正常黎講，比佢個鬧鐘嘈醒之後，過五分鐘左右佢就會入房叫醒我同呀哥，但係今日過左好耐都未叫醒我地。而叫醒我既，係一把男人聲。
「細佬，起身喇。」
因為岩岩訓醒既關係，我一時唔知道發生咩事，但係慢慢就諗返起，尋晚發生過咁大件事，呀媽唔叫醒我都係正常既。我望一望個鐘，已經係7點半。我一句說話都冇同呀哥講就去廁所梳洗。我望住塊鏡，見到鏡前面既自己對眼仲有少少腫，左邊面仲留住淡淡既手掌印，都唔知點返學好。
就喺我刷緊牙既時候，呀哥就喺廁所出面嗌入黎：「細佬呀，呀媽留左張紙喺枱面呀，佢尋晚吩咐我叫你睇左佢喎。我唔阻住你喇，我返學先，bye bye。」跟住佢就出左門口。
雖然尋日對我黎講係好難受，但係訓醒之後都下左道火，我就一路食住呀媽留比我既蘋果，一路睇佢用麥兜字體寫既紙。

細佬：
其實昨晚我唔係有心咁大力打你，我真係好想同你講對不起，但我不夠膽面對你，所以就寫這張紙給你。
你呀哥昨晚遲入房是因為想安慰我，而你咁大聲話你呀哥是不對的，要跟他說對不起呀！




另外，有一件事我想親口同你講，是關於你爸爸的事，今晚我會同你講。

成張紙既內容就係咁，而紙旁邊有一個口罩，應該係呀媽怕我返到學校會尷尬而準備既。我睇完後雖然覺得好疑惑，但時間都唔早，再唔走就遲到，跟住我就帶住個口罩返學。

返到去課室，我戈幾個死黨見到我帶住個口罩返學都覺得好奇怪，係咁問我咩事。
日龍好輕佻咁講：「喂呀釘，做咩無啦啦做蒙面超人呀？」
我有D唔耐煩咁話：「你理撚得我呀？總之有原因啦，你唔好多問。」
阿倫跟住就話：「通常無啦啦帶口罩返學係得一個原因姐，你塊面生暗瘡呀？」
我真係燥底：「屌，咪叫你地咪多問囉，你地當係啦下。」
跟住成班仆街就係度亂估，有D就話我整容失敗，有D就話我想扮型，最後我頂唔順佢地，求其搵個藉口走一走人：「喂一陣咩堂呀？」




永邦就話：「一陣咪英文堂囉。」
我：「唉本英文書放左喺locker添，我過一過去攞。」跟住就出左去走廊。
出到去走廊，我有種如釋重負既感覺，再留喺課室比佢地問長問短真係會人都癲。我打開locker，準備攞今日上堂要用既書出黎，發覺有個女仔企左喺我格離，但係我locker度門遮住左佢個樣，我唔知佢係邊個，但係好肯定係我戈班既。正當我想閂locker門之際，個女仔突然開聲講野：「早晨呀釘。」我嚇左一跳，反射性咁fing開度門，度門就一野打左落個女仔個頭度，再自動反彈返黎，夾中我D手指。「Oh shit！」我同個女仔異口同聲講左呢一句話。我心諗：「今次仆街喇，岩岩戈下一定好大力，個女仔一定覺得好痛。」我即刻問個女仔有冇事，先知道佢係我戈班既Angel。人如其名，Angel擁有一張天使既面孔，皮膚奶白色，身型嬌小，喺我既認知層面黎講，Angel同AV女優天使萌差唔多。啊…………講到離左少少題添，講返之後發生咩事。

Angel用手襟住個額頭，強忍住淚水咁款，用佢嬌柔既聲線回答：「我冇乜事既，過一陣就唔痛，但係你隻手有冇事呀？」
我一時唔識反應，窒左一窒：「Errrrr……我……我冇咩事既。但係妳好似好痛咁，不如我帶妳去醫療室啦。」點解佢痛到想喊出黎咁濟，仲咁好心問返我有冇事？
Angel好大反應咁話：「下？！唔使啦，呢D咁小既傷唔使落醫療室既。係喎，唔好怪我多口，點解你今日帶口罩返學既？平時都唔見你帶架喎。」
雖然我今日對呢類既問題覺得好煩躁，但係我對女仔係唔會發脾氣，所以我好冷靜咁同Angel講：「呢樣野我真係無可奉告，因為個原因都幾私人下，妳就當我生暗瘡啦。」
Angel聽到之後就話：「對唔住呀，我唔應該問呢條問題既，我見你今日對眼腫腫地，而且個眼神同平時有D唔同，好似有D失落咁，以為同你帶口罩有關所有先問下你。我唔會再多問架喇，不過如果你有咩煩惱可以同我講架，我幾時都得閒架。」佢再報以一個可以殺死人既微笑就同我一齊行返入課室。