親愛的，原來是您: 第一章•釘《爸爸》

我叫阿釘，由我懂事開始，屋企成員就得我阿媽、我阿哥同我。記得我三歲生日戈日，我D姨媽姑姐上黎我屋企幫我搞生日會，佢地一上到黎見到我，二姑媽就同我阿媽講：「哇！估唔到阿釘已經咁大個仔喇，真係愈大愈似佢爸爸……」我戈陣時好好奇咁問我阿媽：「媽媽，邊個係爸爸呀？個名咁得意既。」我阿媽聽到後就對住我笑，係苦笑，而二姑媽就好似做錯事咁，個樣好慌張，跟住大姑媽就用手肘撞一撞二姑媽隻手，再補多句：「講咁多無謂野做乜？今日係阿釘生日既大日子，大家一齊開心D慶祝啦！」之後我都冇再過問，沉醉係生日會愉快既氣氛當中。

到我上幼稚園既時候，我再次接觸呢個人物。當時王老師問我：「你爸爸做咩架？」我戈陣時唔知道咩係爸爸，只係見到白板幅圖係一個男人，就了解為阿哥既另一個稱呼，就同王老師講：「我爸爸佢係一個小學生，讀緊二年班。」跟住就換來全班同學既笑聲，連王老師都陰陰咀笑埋一份，而我就完全唔知發生咩事。乜爸爸係一個小學生好好笑咩？

返到屋企，我就同阿媽講：「媽媽，今日返學好奇怪呀，王老師同全班同學都笑我，乜爸爸唔係讀緊小學二年班咩？我都冇講錯野，有咩咁好笑？」當時阿哥都在場，佢見到阿媽眼濕濕咁，就同我講：「細佬，唔好再問你媽媽喇，你就當我地冇爸爸呢個人啦，唔使理人地點講。」我好尊重我阿哥，既然佢都出到聲，咁我就無謂再問啦。之後我就喺學校知道爸爸係家庭入面其中一個成員，係子女對雙親中男性既稱呼。日子慢慢咁過去，我亦都冇再問起關於爸爸既事，直到我上左中學……