我唔想一班朋友青春就咁完結: 大頭怪嬰
我哋三個照住地圖黎到佐治五世公園，可能位置偏僻只係得幾個行來行去無所事事嘅阿伯阿婆同埋幾個只係識追波踢嘅小朋友。網上傳聞話大頭怪嬰出世後曾經有幾個少年發現過佢，位置就鎖住喺足球場附近嘅倉庫，我哋三個一路圍住足球場行，終於俾我哋發現咗一個疑似倉庫嘅白色小型建築物。但係而家足球場周圍都圍住幾米高嘅鐵絲網，足球場又建築喺山丘頂部，周圍都種滿晒高樹，如果真係要出倉庫嘅話就要由入口一直沿住鐵絲網然後爬落山先得。
因為山丘只係得十幾米，只要小心咁滑落去應該唔難。但最大問題係，如果倉庫入面真係住咗大頭怪嬰，要爬上番黎就係一個好大嘅問題...
再者，得三丁友，再加上其中一個係貪生怕死嘅阿豪，連我都有少少淆底唔敢落去...
「喂...落去啦...」肛輝推一推我。
「不如你落先...」我指住阿豪。
「你落啦...」阿豪又推番肛輝。
呢個情況持續咗十分鐘，都無人夠膽踏出第一步。突然間，嗰班踢緊波嘅小朋友走過黎。
「哥哥，不如一齊踢波丫，我哋唔夠人比賽。」其中一個滿頭大汗嘅小朋友問。
「好啊，一齊玩囉～」我露出和藹可親嘅微笑。
於是我哋就喺球場同班小朋友踢波，終於搵到機會，肛輝傳個波俾我，我大腳將個波踢上天，個足球充滿幹勁咁飛咗出鐵絲網，一直滾落山丘，正好停咗喺倉庫附近...
「哎呀～都係哥哥唔好～」我。
「咁點算啊？」小朋友圍晒埋我身邊。
「無辦法啦，一人做事一人當...我哋一齊落去執番個波上黎囉～」我提議。
「好喎，當係森林探險丫～」肛輝知道我嘅諗法，出言和應。
「嘩～好啊好啊好啊～～」小朋友齊聲歡呼。嘿嘿嘿嘿，小朋友對「探險」呢兩個字無乜抵抗能力。
我哋三個中學畢業生，連同七個男女混合嘅小學生組成咗一隊森林探險隊，展開足球救援行動。而家我哋人多勢眾，個膽都壯大咗唔少，阿豪睇黎都受到班小朋友影響而士氣高漲，一馬當先化身成肉彈戰車滾落山腳，而我同肛輝亦都隨後安全著陸。呢個小山丘對於呢班過度活躍嘅小朋友自由無難度可言。
「足球呢足球呢足球呢？」小朋友入面其中一個衣著老土嘅肥仔不斷咁使用疊字廢話式攻勢。
「我見到足球飛咗前面個倉庫入面，我哋一齊去執！」於是我哋成班就走埋去倉庫，呢個白色嘅小型倉庫只能夠講係一個由石屎建造成嘅雜物室，大約十米乘十米，只有一道生晒鏽嘅鐵?鎖住。相信只要用力一踢就可以踢開。
正當我哋行近倉庫，入面突然間傳出好兇猛嘅狗吠聲。我哋聽到你眼望我眼...「唔係有大頭怪嬰咩？」，唔通為免佢出黎害人，所以搵隻惡犬鎮住佢？我決定一定要查出真相！
「呵呵呵呵～請問幾位客人係咪黎參觀大頭怪嬰呢？」突然有個阿姐從倉庫後面行出黎。
「吓？參觀？乜入面真係有大頭怪嬰咩？」我奇怪...乜呢個傳聞可以俾人隨意參觀咁開放...
「阿姐，我哋想執波喳。」肥仔小朋友。
「唔理你係參觀定係執波，總之想入去就要俾入場費～」阿姐露出一副奸商嘅笑容。
「俾錢唔係唔得，但我要確定入面真係有大頭怪嬰先得！」我根本無諗過俾錢。
「你聽唔到咩？大頭怪嬰叫得幾大聲～」阿姐指住倉庫深處，但係入面太黑我哋乜都睇唔到。
「喂唔係喎，吠緊個隻分明係狗喎。」我辯駁。
「唔係唔係～係大頭怪嬰～唔信你哋入場睇吓咪知囉～」阿姐連忙揮手，拜拜肉不停晃動。
「咁算啦，我哋走.....」呢個分明係呃錢嘅陷阱，仲要低劣到求其搵隻狗就話係大頭怪嬰，白痴！
「我要執波我要執波我要執波我要執波....」肥仔不停扯我衫袖。
「嗱小朋友我同你講，一人做事一人當，我落黎係為咗睇大頭怪嬰，點知落到黎得隻嘈到拆天嘅狗。而你呢～落黎係為咗執波嘅，所以如果你想要番個波，就自己俾錢入去執啦～」我解釋。
「但係係你踢個波入去嫁！」肥仔指住我。
「足球並唔係一個人嘅事！！係在乎TEAMWORK 嘅運動！！！！」我理直氣壯咁拍開肥仔隻手。
「嗚啊～～～～～！！」肥仔竟然喊住咁衝過黎我度。
「哭哭啼啼嘅人根本唔適合踢足球！！！」我高呼。我係戰勝辮子姑娘同戰勝七孔流血阿叔嘅男子漢，會怕你區區一個死肥仔？！
誓估唔到，一個肥仔發起癲上黎係有咁大力量，佢一直衝一直撞，衝力竟然可以將我推落地，由於我都估唔到肥仔嘅力量有咁大，所以我無防避咁俾佢撞咗落地，後腦仲撞落地眼前一黑。
「七仔！七仔～七仔！」我聽到肛輝不斷咁叫我，不停咁拍我塊面，仲有吠極都唔肯停嘅狗吠聲。
「咦？咩事？發生咩事？死肥仔呢？」我周圍望，發現自己訓咗喺倉庫隔離，正正就係俾肥仔撞低嘅位置。我周圍望，個阿姐都仲喺度，但係就唔見咗七個小朋友。
「你講咩死肥仔啊？阿豪咪喺度囉。」肛輝指住阿豪。
「唔係啊，死都要執番個波，又長氣仲撞我落地個死肥仔啊。」我摸下後腦，起咗個瘤好彩無流血。
「咩啊....呢度人都無隻，何來執波嘅死肥仔啊....阿豪你要執波咩？」肛輝。
「無啊，你係咪頭先失足跌落黎跌到你傻咗啊？」阿豪。
「..........」咩話？失足跌落黎？唔通七個小朋友都係幻覺？七個？七個？！？小朋友？？九廣鐵路廣告？？唔係咁邪吓話....
「呵呵呵～幾位係咪黎睇大頭怪嬰？」阿姐又講番同一句說話，唔通我頭先真係撞邪？
「裡、裡面係狗！」我扶住肛輝慢慢企喺身。
「唔係唔係～只係大頭怪嬰嘅叫聲～」阿姐。
「我要睇！如果入面嘅只係一隻狗！我要你賠錢！」我火上心頭，反正都撞邪，而家仲有乜需要怕？！
「我怕你睇完無命番出黎喎！」阿姐不甘示弱。
「我就同你睹！我要入去！」我好豪氣咁扔個銀包落地。
「好！錢我照收！有膽你就入！」阿姐叉起條腰。
「我哋入去！」我示意肛輝同阿豪，佢哋可能見到我咁堅決，都跟住我一齊慢慢踏入倉庫。
「嘿嘿嘿嘿嘿.....」阿姐一邊奸笑一邊打開生鏽鐵?，鐵?發出刺耳金屬拉鋸聲。
估唔到咁細個倉庫，入到去完全伸手不見五指，外面嘅陽光好似永遠都照唔到入黎咁。當我哋慢慢愈行愈入，狗吠聲就愈來愈大，好似想警告我哋快Ｄ離開咁，可能隻狗太激動，不斷撞到個狗籠砰砰聲，真係令到我哋一步一驚心。但係都行到呢一步，唔親眼確認我死都唔心息。但真係太黑，我哋都唔敢亂咁行，於是就朝住狗吠聲打開手機黎照明。
一開燈！
「車....真係狗黎嘅....」手機照住嘅係一隻發晒癲係咁吠嘅狼狗。
「大頭怪嬰呢？！喺邊度！！」呢一刻謎底解開，我膽更加壯。
「阿姐我問你！！大頭怪嬰喺邊度啊！！！！」我大怒，叫聲完全遮蓋狗吠聲。
「喺呢度....」阿姐慢慢步入倉庫。
聽到阿姐忽近忽遠嘅叫聲，我哋三個同時間全身一震，勉強掉轉頭一睇，阿姐全身都不斷喺度異變，骨骼用詭異嘅方式重新接合生長，雙手不斷咁狂抓塊面，頭皮同面皮一塊塊咁被佢自己挖晒落地。阿姐皮膚以下嘅肉變成暗紅色，一雙雙血紅嘅眼不斷喺頭顱各處睜開，同時間睥住我地。
頭顱好似氣球咁愈脹愈大，原本阿姐個嘴突然長出一隻好大嘅眼睛，原本係眼睛嘅位置又長出尖銳利齒，阿姐好明顯就係大頭怪嬰，佢而家個樣簡直比大頭怪嬰更加大頭怪嬰。
「嗚........」阿姐眼睛發出低吟，改為四腳爬行一步一步向我哋逼近。（唔好意思，佢成個頭都係眼同口，我根本分唔出邊度發聲）
「點、點算啊而家...」肛輝再次被嚇到瀨屎。
「不、不如放狗咬佢！」阿豪指住不停狂吠嘅狼狗，呢個的確係好方法！
「無錯！狗永遠係人類最好嘅朋友！去喇～～小狼～～」呢個係我臨時幫佢改嘅名，我將個鐵籠打開，狼狗應聲彈出！
「嗚～～嗚～～～」狼狗充分咁表現到咩叫夾著尾巴逃，佢一跑出鐵籠就一支箭咁逃離現場，大頭怪嬰亦無追出去。佢嘅目標好明顯就係我哋三個。
「今次無喇...玩完喇.....」阿豪同肛輝癱喺地下放棄逃走。
「唔可以放棄，未到最後一刻都唔可以放棄！！！」我怒吼，不停將雜物室拎得起嘅物件都拿黎扔向大頭怪嬰，但大頭怪嬰雖然頭大，但身手敏捷，扔出去嘅唔係俾佢撥開就係俾佢食咗，鬼唔望佢啃死。
大頭怪嬰已經愈行愈近，我身邊可以扔嘅都扔晒，只係剩番我放傳聞資料嘅背包。咦？！背包？！背包？！背包！！！！
我急中生智，除低背包搵出人類最後嘅武器！之前貨過癮帶走嘅怪味茄汁！
「ＥＡＴ ＴＨＩＳ！ＢＩＴＣＨ！」我準確咁將包茄汁扔向大頭怪嬰，佢亦都好大方咁張口就吃！
「喔噢～～～～～～～～～～～～～～～～～～」大頭怪嬰仰頭發出怪叫，頭上面無論係眼定口都瞇成一個「米」字。而家嘅大頭怪嬰只不過係一隻成頭都係屎眼嘅怪胎。
「走啊！！～～」我拉起肛輝同阿豪，一齊雜開呢個倉庫，最後用雜物將個門口封死，囁手囁腳咁爬番去足球場，我回頭見到大頭怪嬰無再追出黎，我哋應該已經安全。
「頂、頂、頂丫....真係有、大、大頭怪嬰」肛輝喘晒氣咁，我哋都唔敢停下腳步，於是繼續離開公園，我臨走時確認足球場都係空無一人，根本就無出現過七個小朋友，但係而家逃命最緊要，所以我無再深究。
「估唔到今次救咗我哋嘅竟然係包茄汁...」肛輝滿頭大汗。
「事出必有因，我諗之前俾我地搵到包茄汁，一定就係咁嘅原因。今日就到此為止...電話再聯絡。」原本我仲打算去破解另一個傳聞，但係剛才遇到嘅事已經超越晒我呢一世人可以接受到嘅刺激，我需要好好沖番個熱水涼，冷靜一下。
嗰晚我番到屋企，半夜就開始發高燒，我聽講呢個係見鬼嘅後遺症，我當時諗如果繼續咁落去，會唔會連命都無埋？我成晚昏昏沈沈都係發住同一個夢，就係同大頭怪嬰加埋七個九廣鐵路嘅小朋友踢波，而肛輝就戴住個女嘅假髮做守龍門，阿豪呢？佢好似扮演緊足球俾我哋踢...
第二朝起身，頭顱溫度繼續飆高，呢一刻我連落床嘅力都無，我諗破解都市傳聞嘅行動需要取消，正當我想重新進入夢鄉同大頭怪嬰踢波，手提電話響起，我好辛苦咁撐大半隻眼望吓，原來係肛輝打黎。
「早晨七仔～起身未啊～～」肛輝今日把聲有Ｄ姣，令我打咗個冷震。
「我、我發燒....」我。
「咁今日我哋嘅行動點啊？」肛輝繼續姣聲。
「原本諗住去上環地鐵站E出口神祕迷你月台，睇吓係、係咪真係通到去地獄，但係我而家已經病到身陷地獄...」我連講嘢都有少少吃力。
「哦...咁...你多Ｄ休息。」肛輝。
「唔？」我聽得出肛輝把聲有Ｄ衰。
「我、我...聽日走喇，你自己保重，再見...」肛輝哽咽。
「吓？係喎，聽日就係喇喎！」我幾乎彈起身。
「再見....」肛輝。
「咪住！！少少病算得係Ｄ乜！！為咗你，我嘅體溫已經燃燒起黎喇！！」我企咗喺張床度大叫。
「ＯＫ！上環地鐵站等！我而家打俾阿豪，掰掰！」肛輝極速收線。
「.........」我。
去到上環，肛輝竟然準時到達，仲好興奮咁喺月台上面自拍。而阿豪就例牌遲咗半粒鐘先黎，佢拎住個行李咁大嘅背囊，入面全部裝晒零食，我哋問佢搞乜，佢話如果真係去咗地獄，驚下面會肚餓...
「出發喇出發喇出發喇！！！喲呵～～～」肛輝好似個女人咁跳起。
「你搞乜咁興奮啊，仲成日扮女人。」我皺眉。
「無啊，無事啊。」肛輝。
「係啊！話晒都最後一日，我今日特登帶咗個錄影機。」阿豪。
「係醒目喎，一陣去到地獄入口，記得影幅合照。」我講笑。
「我見今日最後一日，我都帶咗特別嘢。」肛輝竟然喺褲袋掏出一個假髮...
「吓...你喺邊度搵Ｄ咁嘅嘢番黎。」我。
「大學囉，你嗰日都喺度嫁。」肛輝已經將個假髮戴咗上個頭度，調整緊角度。
「乜話！你尋晚自己一個走咗入大學？！」我同阿豪大叫。
「我尋晚都無番過屋企！」肛輝答得理所當然，我望吓佢件衫，的確同尋日嘅件一模一樣，唔怪得咁大陣汗味。
「行啦～仲望！」肛輝興致勃勃咁自己跳咗落路軌。
我同阿豪面面相覷，最後為咗肛輝嘅安全，都一齊跳咗落去。我一直都好懷疑，既然呢條路軌已經停用，點解唔封實佢，而只係用個矮到小朋友都跳到落去嘅鐵欄欄住？我哋一直行一直行，估唔到條路軌會咁深，行咗一陣終於追到肛輝，佢腳步愈來愈快，我同阿豪亦都跟得愈來愈急，阿豪用相機嘅閃光燈代替電筒，前面依然一望無際黑媽媽。行咗大約五分鐘，我望番後面已經見唔到出口，突然個心有Ｄ怯，但肛輝完全無打算停下腳步，一直咁向前行，我同阿豪跟住喺佢後面，我望住佢晃吓晃吓嘅頭假髮，唔知係咪我多心？我總係覺得個假髮已經唔係假髮，肛輝已經唔再係肛輝。
「喂！行慢少少好無啊？」因為路軌已經無晒任何光線，阿豪唔能夠單用閃光燈黎探路，佢停低咗拿支電筒出黎。
「快Ｄ啦～快Ｄ啦～快Ｄ啦～快Ｄ啦～快Ｄ啦～快Ｄ啦～快Ｄ啦～快Ｄ啦～快Ｄ啦～快Ｄ啦～」肛輝開始小跳步咁愈行愈快。
「喂！我哋跟唔切啊！」因為條路軌真係好黑，肛輝跑得愈來愈快，阿豪開著電筒，只係勉強照到肛輝嘅身影。
「跟貼Ｄ，走失咗好大件事。」我扶阿豪起身，兩個人開始跑起上黎。