我唔想一班朋友青春就咁完結: 終
跑咗大約十分鐘，路軌依然未見終點，我可以肯定呢度唔止係一條已經封閉咗嘅鐵路咁簡單，不過我覺得係時候要停，再向前行我怕會出意外。其實行入黎大約幾分鐘，個人已經愈來愈心寒，大腦不停咁發出危險信號叫我唔好繼續行，但係肛輝愈跑愈快，我想追都追唔切。
「快Ｄ啦～快Ｄ啦～快Ｄ啦～快Ｄ啦～快Ｄ啦～」肛輝把聲愈來愈遠。
「哎啊～～」阿豪竟然喺呢個時候仆街，支電筒跌咗落地，仲熜埋添。
「喂！你有冇事啊？快Ｄ拿個相機照吓啦！肛輝走失喇。」我。
「喂肛輝～～停啊！！！阿豪跌低咗啊～～停低先啦。」我大叫，可惜肛輝無回應。
「嗱...你拿住。」阿豪遞部相機俾我，我已經聽唔到肛輝嘅腳步聲，我即刻開閃光燈影咗張相。
閃光燈一閃！
肛輝無聲無息咁企咗喺我哋面前。
閃光燈再閃！
我好肯定企喺度嘅唔係肛輝！
而係一邊笑一邊梳緊頭嘅辮子姑娘！
「嘩啊啊啊啊啊啊～～～肛輝變咗個女人啊～～～」阿豪傳出高音尖叫。
「個八婆就係辮子姑娘啊！！」我亦高呼。
「唔～～我靚唔靚姐～」變咗女人嘅肛輝竟然喺度撒嬌！
「走啊～～」阿豪高速爬行。
「唔～～走咁快～～」肛輝 / 辮子姣婆。
「唔好走啊！我哋走咗肛輝就會永遠留喺度...」我將阿豪叫停。
「佢根本唔係肛輝！佢係辮子姑娘啊！！！」阿豪。
「但、但係佢曾經係肛輝，係我哋最好嘅朋友啊！」我。
「佢、佢、佢就黎都要離我哋去外國啦...」阿豪雖然口硬，但都停下腳步。
「無錯肛輝係會離開我哋，但佢永遠都係我哋嘅朋友！你忍心見到自己嘅朋友變成一個姣婆？」我。
「唔...想.....」阿豪回頭。
「我都唔想。」我。
「打低個八婆！」阿豪。
「無錯！拿起相機，錄影住呢一刻！如果我無命出番去，你就自己走先，將呢段錄影放上youtube，我一定紅爆！」我。
「唔～～～做乜影住人哋喎～～」肛輝繼續發姣，用手背遮住燈光。
「妖女！受死！」我一拳打落姣婆塊面度。
「唔～～」辮子姑娘好似完全無事咁。
「無事？！」我再接再厲，辮子姑娘開始流鼻血，左邊面仲腫起咗。
「嘻嘻嘻嘻～～你哋個朋友就黎俾你打死啦～」辮子姑娘奸笑。
「咩話？！」我停下攻勢。
「你就算打死你個朋友，我都唔會有事～至多咪永遠留喺度等第二個黎執起個假髮囉～」辮子姑娘仰頭大笑，鼻血好似噴泉咁一直流。
「你、你個八婆！陰我？！」我緊握拳頭，辮子姑娘知道我唔會放棄肛輝唔理，竟膽威脅我。
「你一係就而家打死我，你個朋友都會死！而我就搵另外一個受害者！一係你就帶埋我走，等我可以用你朋友嘅重獲自由～哈哈哈哈哈哈～」辮子姑娘大笑，估唔到呢條八婆咁有腦。
「七仔，咁、咁點算啊...」阿豪望住我。
「唔好理！繼續影！」我。
「記住影得我靚Ｄ啊你個死肥仔！」辮子姑娘指住阿豪。
「八婆！八婆！你前世係八婆！今世都係八婆！你永遠都係一個臭八婆！」阿豪揸住部相機一邊錄一邊鬧。
「肛輝！你聽唔聽到啊！你要靠自己嘅力量黎對抗呢條八婆啊」我大叫。
「無用嫁～佢而家就好似發緊夢咁，除非受到極大嘅刺激，如果唔係佢永遠都唔會醒。」辮子姑娘。
「八婆！」我星咗個辮子姑娘一巴。
「細力Ｄ啊～小心打親你朋友啊～哈哈哈哈～」辮子姑娘打番我一巴。
究竟而家應該點做？要救醒肛輝就要令佢受到刺激，但係又唔可以傷到佢...究竟有乜方法！？！！
「殺、殺...咗我」
「吓？」我周圍望，係邊個講緊嘢？
「七仔，快Ｄ殺咗我...」我認得呢把係肛輝把聲，但係明明辮子姑娘根本無開口。
「肛輝？係咪你啊肛輝？」我大叫。
「無用嫁！佢係唔會醒嫁哈哈哈哈哈哈～」辮子姑娘。
「殺咗我，唔好俾個妖、妖女用我嘅身體逍遙快活...」肛輝把聲的確係喺辮子姑娘身體入面發出。
「唔得嫁！我唔會殺死自己嘅朋友嫁！」我怒吼，拳頭幾乎俾我握到流血。
「喂..會唔會老土咗少少啊？」阿豪問。
「繼續影啦死肥仔！」我。
的確，呢類型嘅場面喺電影、漫畫、電視上面出現過無數咁多次，我自己每次睇到呢賣情節，都會不自覺咁諗，如果發生喺我身上，我到底會點樣解決？結果每一次都諗唔通，每次都嘆一口氣安慰自己「好彩呢Ｄ只係電影入面嘅情節姐」。但係，而家呢個難題活生生咁擺喺我面前，究竟我應該點樣去解決？唔通要學電影咁，為咗正義而殺死自己最好嘅朋友？！
我唔批准！
要犧牲朋友嘅，根本唔係正義！
「阿豪！幫我捉實肛輝！」我。
「哦！」阿豪放低部相機，從後熊抱住辮子姑娘。
「唔～～喂你個死肥仔咪借機抽水～」辮子姑娘尖叫。
「估唔到連身體都變埋女人。」阿豪雙手不斷揉搓辮子姑娘個胸。
「辮子姑娘...」我。
「咦？」
「對唔住，我有睇過妳嘅故事，我希望妳可以盡早投胎，重新做人...」我。
「廢話！我而家就用你朋友嘅身體重新做人啦～哈哈哈哈～」辮子姑娘
「如果你唔肯投胎，好可能永遠都要留喺度，因為唔知幾時會再有人黎呢度...」我。
「乜你忍心殺死你朋友咩？！吓？！？！」辮子姑娘。
「....」我搖頭。
「你知唔知...肛輝點解會叫肛輝？」我。
「我唔知亦都唔想知，因為呢個人將會永遠消失喇！」辮子姑娘。
「因為...」我行到辮子姑娘背後，單膝跪地。
「喂！喂？！你想點？你知唔知你亂黎會殺死你朋友！！」辮子姑娘極力掙扎，但係抽緊水嘅阿豪死命唔放手。
「醒喇！！肛輝！！終極友誼灌腸！！」
我大吼，將全身力量灌注入雙手食指，連埋我哋嘅友誼一齊灌入肛輝屎眼入面！
「啊啊啊啊啊啊啊啊啊！！！～～～～」幾乎令隧道崩塌嘅尖叫聲，聲音似係肛輝同辮子姑娘嘅男女混音。肛輝受到嘅刺激實在太大，一下就掙脫咗阿豪嘅熊抱，跪喺地下發出來自地獄嘅慘叫聲。
下一秒，我同阿豪都聞到一陣臭味....無錯！肛輝再次失禁。佢成個人軟癱喺地，而辮子姑娘個假髮都甩咗出黎，淹住咗喺肛輝嘅一片屎海上面。
「走啊！快Ｄ扶起肛輝走啊！」我大叫，阿豪連忙將肛輝抱起。
「嘩好臭啊頂！」頭先嗰一擊可以講係我人生以來最強勁嘅一次灌腸，肛輝到而家都仲不停喺褲腳度流出半紅半黑嘅屎水。
「快Ｄ行啦！」我執起差Ｄ被屎水沾到嘅相機，同阿豪一齊跑出呢條隧道。
唔知點解，我哋只係跑咗唔夠一分鐘，已經出番去正常嘅上環站，當我哋行到出去，咁岩俾地鐵站職員見到，於是救咗我哋上去，我哋解釋因為肛輝太過急屎，但上環站又無廁所，於是就走咗入去解決。估唔到地鐵站職員竟然接受呢個咁白痴嘅藉口，只係俾咗條員工廁所鎖匙我哋就叫我哋用完快Ｄ走，唔好臭到其他乘客。
入到廁所肛輝終於醒番，但係佢完全唔記得發生咩事，佢只係記得前一晚同我哋一齊走入大學，之後嘅事完全無印象。我同阿豪都你眼望我眼，原來肛輝一直都被辮子姑娘上咗身我哋都唔發覺，如果唔係辮子姑娘執著要戴番個假髮，可能我哋一直都唔會知道咩事，就咁送咗肛輝去外國，咁樣辮子姑娘就可以用肛輝嘅身體重獲自由。
第二日，係肛輝離開我哋嘅日子，我同阿豪連同一班朋友一齊去送機，當然在場無出現到一個喊到收唔到聲嘅女仔。
「我會記住你哋嫁！一定會！」肛輝拍拍我同阿豪膀頭。
「過到去，小心身體，溝件鬼妹番黎介紹我哋識啊。」阿豪隻眼紅晒。
「記得一有假期就番黎探我哋啊！」我都忍唔住流咗幾滴馬尿。
「知道啦～我哋一世都係好兄弟丫嗎～」肛輝。
「保重喇！！」經過一輪道別，我哋一邊揮手一邊送肛輝離開，而肛輝都好興奮咁一邊跳一邊向我哋揮手。最後望住佢嘅背影，我不禁讚嘆肛輝個屎眼驚人嘅復原能力，尋日先俾我灌到不停瀨屎，今日竟然可以又跑又跳。
「喂、喂...嗰段片...俾唔俾肛輝知好？」阿豪細聲咁喺我耳邊講。
「梗係照樣放上YOUTUBE啦，不過等佢去到外國先～」我一邊講，一邊KEEP住同肛輝揮手。
肛輝～我諗你呢一世都唔會忘記我哋！
後記：
「喂！話時話啦，你同肛輝道別，洗唔洗帶埋成班親戚黎啊。」阿豪問。
「邊有帶親戚啊？你傻咗啊？！」我拍打阿豪個頭。
「吓？佢哋跟住咗你成日啦喎...」阿豪指一指我身後。
我回頭一睇，有七個熟口熟面嘅小朋友，企喺我後面一直跟住我一齊揮手..........
唔係吓嗎...........
(完)