我唔想一班朋友青春就咁完結: 上環站封閉月台
我哋上到去，為咗唔好令阿豪個嘴失禮到人，就叫佢載番個口罩先。開門嘅中年大叔同網頁入面嘅自拍照一樣樣，只不過佢真人睇落老好多，佢招呼咗我哋坐梳化，我掃視四周圍，成屋都掛滿晒當年九廣鐵路廣告嘅相，但每張相都只係影住同一個男仔，就係聲稱七孔流血嗰個。
「啊...點稱呼？」我。
「大家唔洗咁見外，叫我七孔流血得喇...」男人有禮貌笑笑。我哋三個大眼瞪小眼，覺得呢個男人有Ｄ可疑。
「啊...七孔先生，請問你自稱係當年七孔流血嘅小朋友，但係點解你、你年紀好似...唔係咁配合...」我問。
「喔～講番個廣告，當時同我其餘六個小朋友一齊拍廣告，我見到森林入面有個黑影出現，當時我覺得個頭好痛好痛...」男人九唔搭八。
「七孔先生...你嘅年齡係？」肛輝幫手追問。
「喔～就咁嘅，我懷疑當日個黑影就係傳說中專捉小朋友嘅森林妖精...」男人神情凝重。
「咁、咁...點解你無俾佢捉走，只係七孔流血呢？」我開始對呢個男人失去信心。
「你哋有冇聽我頭先所講，佢專、捉、小、朋、友！乜你睇我個樣似小朋友咩？」男人沒好氣。
「...............」我哋當場啞咗。
「啊！唔好意思，你地坐咗咁耐，不如我開電視你哋睇！」男人肆自拿起遙控器開電視，電視播放緊當年個九廣鐵路廣告...
「哈哈～真係巧合，又會咁啱嘅～呵呵呵～你睇我當年幾上鏡。」男人自顧自笑起上黎。
「......」我睇真Ｄ，電視播放嘅根本就係錄影帶...
「阿叔，咁我又想問，之前仲有流傳話廣告入面無啦啦多咗一個小朋友，咁事實上係幾多人？」肛輝似乎都有心想拆穿呢個男人嘅大話。
「我好肯定咁答你，無Ｄ咁嘅事，成個廣告一直都係六個人！」男人。
「唔係WO，頭先你明明話同其餘六個小朋友拍廣告，咁加埋你咪七個囉。」我幫手。
「你地睇住廣告先，我去拿嘢你地飲。」男人講完就行咗入廚所。
我地覺得今次分明就係一個中年阿叔想博上電視嘅詭計，既然都無收獲我哋都打算離開，一陣都唔知個男人會俾Ｄ咩我哋飲，安全起見都係走為上著。我哋三個互打眼色，然後阿豪去開門，我同肛輝就同個男人講聲再見就閃人。
「唔好意思，阻你咁多時間，我地趕時間要走先....」我。
「坐多陣啦～成個廣告嘅拍攝過程真係好恐怖嫁！」男人正喺廚房打開雪櫃拿飲品俾我地。
「啊～～～～～～～～～～～～～～～～～～～～～～～」阿豪發出女人嘅尖叫聲。
我同肛輝即刻望出去，大廳突然多咗個女仔，自己喺度扮火車咁周圍走.....我覺得女仔個樣好熟口面，一望電視，原來就係傳聞中無啦啦出現喺最尾嘅女仔........
「撞鬼啊！！！走啊～～～～～～～～～～～！！！！」我同肛輝以最高速度狂奔。
「啊～～～～～～～」阿豪都一邊尖叫一邊逃跑，多得佢放盡喉嚨尖叫，個嘴終於回復正常。
「嘩頭先真係俾個女仔嚇Ｑ死...」阿豪滿頭大汗。
「我覺得佢真係好似拍廣告排最尾，俾人話無啦啦多咗個嘅女仔。」我成身起晒雞皮。
「最衰都係你啦死都要上去，橫晒嘢喇而家！」肛輝檢查緊自己有冇嚇到瀨屎，佢扯開條褲褲望一望...「喔～好彩...只係瀨尿姐。」佢露出放心嘅表情。
「我、我覺得今次都算成功.........」我再次講出呢句咁不負責任嘅說話。
「不、不如今日就咁算啦，我就黎肚餓到暈....」阿豪撫摸佢激突嘅肚皮。
「唔得～無時間喇！我有個地方要夜晚先可以去到，而家正好。」天色漸暗，我從背包中掏出張都市傳聞出黎，指住其中一條傳聞。
二）香港中文大學「辮子姑娘」。
為咗肛輝嘅美好回憶，我用咗３０蚊買咗盒飯黎引誘阿豪繼續跟住我，雖然佢全日都無乜貢獻，但係！我覺得回憶係要由一班人創造出黎，一個都不能少！（另外，就算有乜危險，阿豪亦都係一個非常養眼嘅目標，所以為咗我自己嘅個人安全，阿豪係必須在場）
終於黎到香港中文大學，晚夜學校無乜人，學校咁大間要潛入去應該無乜危險，我只係擔心阿豪不斷發出「O習O習O習O習」食飯盒聲會引起守衛嘅注意。好彩沿路都有Ｄ樹做掩護，我哋三個好順利咁入咗大學。大學呢個地方真係好奇妙，我讀小學就已經知道自己一定升唔到上大學，喺呢一刻我突然覺得自己好有書卷味，想即場吟首詩，但係腦袋一片空白，會考完畢之後我嘅書本知識已經完完整整咁歸還咗俾學校。
「喂死肥仔，你食嘢唔好咁大聲得唔得啊？」我。
「呢Ｄ叫尊重食物...」阿豪。
「七仔你識唔識路嫁，唔好行錯喎。」肛輝。
「辮子姑娘梗係喺辮子路啦。」我。
「咁辮子路喺邊先得嫁！」肛輝。
「妖！大學咁大實有路牌嘅，有地圖就實搵到啦白痴。」我。
結果我哋終於搵到大學內部地圖，入面有圖書館、運動場、游泳池就連燒烤場都有，就係無辮子路....到呢一刻我先醒起，辮子姑娘只係一個傳聞，學生先將佢出現嘅地方命名為辮子路，所以地圖梗係唔會標明啦。
「點算好呢...」搵唔到辮子路都不特止，第一次入大學太興奮而家仲迷路，但係我唔可以將呢件事話俾肛輝佢地聽。
「不如去廁所。」肛輝突然提出建議。
「吓？！唔好啦，夜媽媽好恐怖啊！」阿豪。
「點解要去廁所？」我。
「每間學校嘅廁所都有鬼嫁啦，唔係咩？」肛輝又講得幾有道理。
起碼大學廁所有標示，一定易搵過辮子路，所以我哋決定去廁所探險。由細到大聽嘅校園鬼故都一定喺廁所出現，大部分都係女鬼，而個女鬼大部分都係吊頸死，呢個法則至今都唔會變。入到廁所漆黑一片真係好淆底，而且我哋又無帶電筒，只能夠用電話嘅微弱光線照明。
「嘩！鬼啊！！！」阿豪大叫。
「頂你啊！我哋黎嫁！」我俾阿豪嚇到成個人彈起，原來阿豪照到塊鏡以為有鬼，不過我立即移開阿豪部電話，因為...見鬼法則仲包括照塊...
「喂鬼影都冇隻喎，不如走啦。」肛輝逐個廁間打開檢查。
「仲有尾格呢～」我指住一直關住門嘅尾格。
「不過鎖住喎，會唔會係放雜室呢？」肛輝。
「超～睇嘢啦！」我從褲袋拿出一毫子，用佢黎扭開廁格個鎖，萬試萬靈。嘿嘿，點解我會知？因為細個時我經常喺茶樓襯人屙屎都係扭開佢廁格，但對方因為屙緊屎又追唔到出黎，我細細個已經係一名戰略家。
「車～真係雜物室。」原來只係一個平平無奇嘅雜物室，放滿天拿水、掃把、地拖同埋假髮....
咦？！假髮？！！！
「嘩，點會有個假髮放喺度？」肛輝拿起個假髮，係一個女仔用嘅假髮，肛輝好自然咁將佢戴喺頭，然後好自然咁行埋鏡度好似女仔咁梳頭髮。
「喂肛輝，咪搞埋Ｄ恐怖嘢丫！」阿豪扯走佢個假髮，肛輝一臉漠然，唔知發生咩事。
「喂！你哋拿住我個假髮喺度做乜？」突然廁所出現傳出聲音。
我個？！？！？！！？？！
假髮？！？！？！！？！？
辮子姑娘！？！？！？！？！
咪住.....男人聲黎嘅..........我地回頭一望，原來係校工阿叔。
「唔、唔好意思啊，我哋想借廁所咁巧合又行咗入黎咁巧合個廁格又放咗個假髮．．．．」我連忙解釋。
「借廁所？」校工用懷疑嘅眼光望住我地。
「係啊，我朋友瀨咗屎...」我指住肛輝，肛輝都拚命點頭。
「俾番個假髮我！」校工一手搶番個假髮。
「你話個假髮係你嘅？」阿豪。
「唔俾咩？我興趣就係COSPLAY...」校工。
「吓.....」唔通辮子姑娘傳聞只係校工COSPLAY？
「你哋再唔走！我就報警！」校工。
「我哋走啦！對唔住啊！ＳＯＲＲＹ～」我哋三個離開廁所，我臨走前回頭一望，見到校工對住個假髮傾計...
「仲望？走啦！一陣個美少女戰士校工報警就大件事喇，我隨時搞到無得出國嫁....」肛輝扯住我。
「哦...」我臨走時回頭望，見到校工好似對住假髮傾計，內容聽得唔太清楚，大約係「好彩無戴上去....如果唔係好似上次咁就煩麻...」之類，唔通佢係一個有潔癖嘅cosplay 大叔？定係另有原因？
我再向前望住肛輝，諗起頭先佢戴住假髮對住塊鏡梳頭，仲好似想紮辮咁款，而家將成件事聯想埋一齊都有Ｄ心寒，希望只係我多心，同埋而家肛輝好似回復番正常，我諗應該無乜事嘅....
「今晚就咁結束啦，聽日再打電話約你哋....」我哋三個跑番地鐵站先敢停低，呢度人流比較多，個心都定番好多。
「吓？仲黎....？」阿豪。
「我覺得幾刺激丫～聽日打算去邊？」肛輝似乎開始投入，但我反而擔心佢會有乜後遺症。
「等我諗吓先，仲有幾日時間，應該可以去多幾個地方。聽日同樣時間喺學校樓下茶餐廳集合！」今日受完咁大刺激，我都好想番屋企休息一下，同埋老實講，我岩岩都俾個Cosplay大叔嚇到瀨咗尿。
「喂！唔！噢！」阿豪舉高三隻手指，眼神堅定咁望住我....好、好、好，我明白嫁喇，三塊薯餅丫嘛，無問題。
可能尋日消耗太多心力同體力，我番到屋企上咗陣網，確定今日要去破解嘅傳聞，就上床一覺訓天光。尋晚仲發咗一個幾令人感動嘅夢，大約係喺機場同肛輝道別，大家都忍唔住流下馬尿，我起身時都發覺眼角有少少眼淚水。將今日目的地嘅資料放入背包，今次我決定遲三十分鐘先出現，以免太多失去Leader 嘅風範，今次佢哋兩個唔出現，我係唔會幫手拿位同埋叫嘢食！
結果，我、我企喺餐廳門口一直等到幾乎要餓昏，佢哋先大搖大擺出現，原來佢哋一早到咗，見我未出現竟然自己兩個走去食早餐........媽的我要殺死你！
「今日我哋去邊？」阿豪啜緊手上嘅可樂，面目可憎。
「自己睇！」原本我諗住尋日大家都辛苦，今日去破解簡單少少嘅傳聞，但我將呢個諗法完全粉碎，我唔會俾你哋有好日子過！
「唔係吓.............」肛輝。
「我剛剛醒起屋企無火燭...我要番去放火先...」阿豪拔腿就跑。
「無錯！呢個傳聞都傳咗幾十年，仲俾人拍埋電影，我相信一定有幾成真實，至於有幾多成係真，我哋過埋今日就會知。」今日我決定要破解大頭怪嬰呢個傳聞，正所謂日本有貞子，香港都有大頭怪嬰！
「今日我哋去邊？」阿豪啜緊手上嘅可樂，面目可憎。
「自己睇！」原本我諗住尋日大家都辛苦，今日去破解簡單少少嘅傳聞，但我將呢個諗法完全粉碎，我唔會俾你哋有好日子過！
「唔係吓.............」肛輝。
「我剛剛醒起屋企無火燭...我要番去放火先...」阿豪拔腿就跑。
「無錯！呢個傳聞都傳咗幾十年，仲俾人拍埋電影，我相信一定有幾成真實，至於有幾多成係真，我哋過埋今日就會知。」今日我決定要破解大頭怪嬰呢個傳聞，正所謂日本有貞子，香港都有大頭怪嬰！
有關呢隻 / 呢位 / 呢個 / 呢坨....是但啦嘅大頭怪嬰，網上面嘅資料非常多，但每一個版本都唔同，有Ｄ又話俾人捉咗去研究，有Ｄ又話仲鎖住喺醫院附近嘅倉庫，不過比較可信性高嘅就係佢被鎖住喺佐治五世公園，而公園位於香港西營盤，係一個歷史悠久到我同你都未出世嘅公園。話說呢個大頭仔出世嘅經過已經令唔少人嚇破膽，當時醫生同護士幫佢阿媽接生嗰時，因為佢太醜樣，個死人頭又重，所以俾醫生一嘢扔咗佢落地。佢無死都不特止，仲不停暴吼唔同國家嘅語言，我相信大頭怪嬰應該係講緊粗口鬧個醫生，當時個護士想抱番起佢，但大頭怪嬰就自己企咗起身，霸氣完全外露。
護士望真Ｄ佢個樣，嘩！頭大身細成隻醜樣版叮噹咁款，成頭都係皺紋仲有成十幾隻眼全部啤住個護士，個護士當場被嚇死咗，幾個醫生夾手夾腳先將呢隻醜樣叮噹捉住鎖佢入籠，之後個結局係點就不了了之了。
「喂！尋日我發咗個好正嘅夢～」我哋一齊坐地鐵出發，途中肛輝突然用豬乸發姣嘅表情講佢尋晚個夢。
「你瀨完屎夜晚仲夢遺啊？」阿豪笑。
「講黎聽吓，對象係邊個？」我。
「唔係啊！我發夢呢～喺機場你哋成班一齊黎送我機，場面好鬼死感動。」肛輝回味。
「咦？！咁o岩既，我都發夢送你機喎！」我。
「我發夢好似喺機場望住Ｄ空姐食飛機餐...」阿豪。
「你聽埋先啦，你哋個個隻眼都紅埋，好唔捨得我咁，其中有一個女仔都喊都摀住塊面收唔到聲。」肛輝舔舔利。
「喂等陣...我哋成班Ｆｒｉｅｎｄ邊度有女仔啊？」我。
「唔係喎，同我哋同班嫁呢～我成日都同佢一齊放學行番屋企嘅。」肛輝。
「痴線，你日日放學都同我哋去網吧打機，邊度有女仔啊？」我。
「唔係呢～佢住我屋企附近嫁，有時考試仲會一齊去圖書館溫書添嫁。」肛輝。
「你話你會溫書就知你吹水啦！訓醒未啊你？」我。
「啊～佢叫咩名呢？死喇我諗極都諗唔起添...」肛輝。
「吹水都做足功課丫唔該...」我。
「佢成日同我哋有傾有講嫁，係肥仔豪成日講咸濕嘢，人哋先唔敢成日行埋黎喳。丫佢叫咩名呢？」肛輝。
「咩樣嫁....」我個心開始寒，因為我好肯定成個中學時期，我哋三個都係無女仔緣嘅可憐蟲。
「成日紮住兩條辮嫁！我仲成日笑佢個頭娘～」肛輝。
「................」我不禁將尋晚發生嘅事聯想埋一齊。
「喂！落車喇。」阿豪。
「一陣再諗啦～到站啦～」肛輝。