我唔想一班朋友青春就咁完結: 九廣鐵路 七孔流血
「我已經諗好咗，因為時間有限，所以由淺入深，今日就先去破解麥當奴之謎！」我指住第一條傳聞。
「但係我想問點樣去破解九廣鐵路廣告...成十年前佢地而家都變晒樣啦。」阿豪。
「我都唔知，但係我上Youtube下載咗段廣告落黎，希望可以搵到少少線索...」我。
「咁快Ｄ行喇！隔離街有間麥當奴，我想食薯餅...」阿豪口水流到一地都係，佢剛才一坐低已經食左一份早餐，正一死肥仔。
我哋一行三人浩浩蕩蕩行過去油麻地嘅一間麥當奴，入到去阿豪即刻叫咗個早晨全餐，我就問睡眼惺忪嘅阿姐拿咗兩包茄汁，但係咦？點解我搵來搵去都搵唔到有編號...唔通呢個傳聞只係老作出黎？
「小朋友，你哋又想搵茄汁編號啊？」一個坐喺我地隔離抬，老到連牙都冇，但又好努力咁食緊豬柳蛋漢堡嘅阿伯問。
「咦？阿伯你都知道呢個傳聞？」我。
「我食咗幾十年老麥梗係知道啦，不過聽講好似只有香港第一間麥當奴先有分唔同味道，因為當時公司想知道香港客人口味。不過而家工廠已經停產唔同味道嘅茄汁，就算肯生產都唔會有分店肯拿唔好編號嘅貨，費事客人要求多多。而家麥當奴邊會搞咁多嘢丫，淨係識加價...唉。」阿伯再度嘗試用口夾斷塊豬柳蛋。
「掂啊！香港第一間麥當奴！快Ｄ出發！」我幾乎興奮得彈跳起身，但阿豪完全無反應。
「你知道喺邊咩？」阿豪當頭棒喝！
「一係試下搵openrice 囉.......」肛輝提議。
「你知邊區咩？」阿豪繼續潑冷水。
「我去Google尋，肛輝你搵Openrice。」我命令。
於是我立刻用麥記免費Wifi上網查，終於俾我查到香港第一間麥當奴喺銅鑼灣百德新街，而家只差在佢哋仲有冇用唔用編號嘅茄汁。
「ＯＫ！出發！」我拿起背包站起來。
「等我去買多幾塊薯餅外賣先，我聽過一個法國大廚話要試茄汁一定要用薯餅！」阿豪衝去收銀機買咗五塊薯餅。
去到銅鑼灣百德新街，差唔多到午餐時間麥當奴塞滿咗上班族同學生，我哋一邊排隊一邊諗吓用咩方法最能夠試得出茄汁酸味。
「用薯餅、薯條、每試一條就用冰凍嘅汽水將口腔入面嘅殘餘味道沖走...」阿豪提議，不過我覺得佢只係搵藉口想買多包薯條。
「溝水會唔會試得出？」肛輝。
「溝稀咗咪仲難試...」我。
「其實我地唔需要逐包試丫，拿一包Ａ１、一包Ａ１２，咁一定分得出有冇分別啦。」肛輝。
「雖然我唔服氣，但係我幾認同你呢個做法！」仲差一個就到我，估唔到買麥當奴嘅心情都可以咁緊張。
「要乜？」櫃檯小姐心情唔係幾靚，要求拿唔同味嘅茄汁似乎有Ｄ難度。
「唔好意思啊姐姐，我知道咁樣會麻煩到你，不過...」希望我扮可愛攻勢可以成功。
「我想要巨無霸餐加大走青瓜少生菜芝士分開上可樂要少冰但一定要夠凍薯條多鹽俾多兩包甜酸醬！」阿豪好似急口令咁爆發出黎。
「哦.......」櫃檯小姐塊面即時由白變紅、由紅轉化成黑，眼神仲帶點冰冷嘅邪氣。
「喂，你黎食嘢定破解傳聞啊死肥仔！」我。
「唔好意思啊，我真係好肚餓...」阿豪低頭。
「唔好意思啊姐姐，我哋想要幾包唔同酸味嘅茄汁...」雖然櫃檯小姐已經化成一隻厲鬼，但係為咗正經事我都股起勇氣開口。
櫃檯小姐突然將個頭湊埋黎距離我哋不足十公分位置，細細聲同我哋講...
「你班友唔好再玩嘅，茄汁出面有得自己拿！唔好再煩阿姐！聽到未？特別係你啊死肥仔！」
「唔、唔該姐姐...嘻嘻嘻...拜拜～」原來茄汁可以自己拿，咁就天助我也。
如果茄汁、鹽同胡椒都放咗喺垃圾桶頂可以俾客人自由咁拿，我哋三個即刻衝過去搵，一手拿起幾包，發現呢度嘅茄汁真係有寫上編號，今日嘅努力睇黎無白費。
「喂七仔你搵到Ａ１未？我搵咗好多包都冇。」肛輝。
「我都搵唔到，如果無就搵Ａ２或者Ａ３，我諗差別不大。」我。
「有喇！Ａ２同Ａ１２都有...咦？點解呢兩包咁怪嘅？痴埋一齊，上面仲印住一堆錯體字...」肛輝將手上包茄汁遞俾我。
「我諗印錯啩...拿埋囉又唔洗錢嘅。」茄汁的確好奇怪，除咗兩包之間無咗鋸齒位之外，中間仲寫住一堆好似佛經咒文咁嘅怪字。
我哋番到埋位，阿豪即刻開餐，一手執起十幾條薯口放入口，再一啖啜走半杯可樂...我唔明白阿豪頭先所講嘅「每食一條都飲一啖可樂將殘餘味道沖走」係咩意思...
「喂肥仔你咪掛住食啦，做左正經嘢先好無啊？」我兜巴星落佢阿豪塊面度，害到佢噴到成地可樂。
「你試吓兩包有咩分別？」肛輝分別將Ａ２同Ａ１２兩包茄汁分開吱落兩條薯條俾阿豪食。
「無分別丫...」阿豪。
「唔係吓話，係咪唔夠多啊，成包試啦你不如...」我。
「真係無分別WO，唔信你哋試吓。」阿豪。我同肛輝都分別試過，真係無分別...
「超～原來係流料黎...」肛輝。
「咪係，唉肥仔咁不如你試埋呢包錯體版...」我將兩包撕開，俾咗其中一包阿豪。
「咪又係一樣～」阿豪開咗包茄汁，即刻湧出一陣濃烈嘅怪味。
「嘩！咩味？」肛輝都聞到，即時摀住個鼻。
「我唔識形容，又唔係臭，又唔係酸，只係覺得好強烈...」我有少少作嘔，包茄汁味道強烈到大力少少呼吸都好似會俾佢嗆到嘔。
「喂肥仔你一定要試吓...」肛輝。
「唔得啊！都唔知會唔會食死人...」阿豪耍手擰頭。
「試少少啦！當係為咗幫肛輝慶祝啊嘛！」我。
「.........少少架咋」阿豪答應，我同肛輝即刻不停點頭。
阿豪將少少茄汁輕輕咁點落舌尖然後放入口嗒吓陣味，下一秒！
我從來未見過阿豪有一個咁嘅表情...
唔係！應該講！我相信一個人類無可能會做到呢個表情...
試想象一個滿臉肥肉嘅肥仔，竟然可以將眼、鼻、嘴集中於頭顱嘅中心點。本來我同肛輝見到佢個表情咁滑稽，都笑到收唔到聲，但係過左成分鐘阿豪都無改善，我哋都有Ｄ擔心，於是我同肛輝不停灌阿豪飲水，希望佢好Ｄ。終於十分鐘之後阿豪可以出到聲。
「嘩，我真係...以為自己會死...」阿豪仲有Ｄ口齒不清。
「呢包茄汁奇奇怪怪，掉咗佢啦。」肛輝。
「唔得～呢包嘢咁特別，可能好值錢。」我將剩餘一包茄汁收起背包。
「喂喂喂～點解我個嘴...好似咁怪，好難開口講嘢咁嘅...可唔可...以幫我睇吓。」阿豪猛叫我哋，於是我哋掉轉頭一睇...
「哈哈哈哈哈哈哈！！！」我同肛輝同時笑到趴咗落地。
「喂咩事姐，係咪有事啊我個嘴...」阿豪。
「哈哈哈哈哈哈哈...你...你個....你個嘴...好似....」當我見到阿豪個樣，又開始笑到停唔到。
「點啊！我而家擘開個口都好辛苦好似痴埋咗一舊咁，究竟變成點姐？」阿豪。
「你、你個嘴好似屎眼....」我說完再次陷入爆笑...
我地足足笑咗十分鐘，如果唔係麥當奴有自職係經理嘅職員話再搗亂就報警，我諗都唔知笑幾耐先停得到。阿豪一臉無奈咁行出麥當奴，因為佢係俾人鬧得最利害嘅一個...
「你呢個嘴臉係咩意思？睇唔起我啊？！想當年，我好似你咁嘅年紀已經開始學緊炸薯條，你地知唔知每一條放入口嘅薯條都...」經理阿叔指住阿豪黎鬧，但係阿豪個嘴點都控制唔到，極其量都只係皺一皺眉。
「我警告你啊死肥仔，如果你再對住我做出咁不禮貌嘅行為，我有權報警，你知唔知每一件麥樂雞...」經理再次展開口水攻勢。
「唔好意思！對唔住！我哋而家即刻走嫁喇！」我同肛輝夾手夾腳扯走阿豪，而阿豪就好可憐咁眼白白睇住佢未食晒嘅巨無霸餐俾人扔落垃圾桶。
「今日嘅行動雖然有Ｄ阻滯，但都算成功丫～」我地一直跑到落地鐵站先夠膽停。
「阿豪...可唔可以...俾我試吓.........」肛輝情不自禁咁用手指戳入阿豪個口入面，拔出然後再插入。
「唔～喂...嗚！唔好再搞喇！你再整我以後都唔再跟你地出黎喇！」阿豪發嬲，塊臉紅到好似馬騮屎忽一樣，加埋個屎眼咀，令到阿豪成個頭更加似一個屎忽。
「好喇唔好再搞佢，我哋去破解下一個傳聞。」我。
「唔係吓話，我仲以為可以番屋企，今朝淨係試茄汁都搞成咁，再做落去後果真係不堪設想...」阿豪。
「我哋唔可以停嫁！你呢個樣我相信肛輝一定成世人都記得你，我地已經成功咗一大半！」我拍拍阿豪膀頭。
「咁...而家應該做乜啊....」阿豪彷彿變成一個沮喪嘅屁股。
「既然可以上網搵到第一間麥當奴，我哋都應該可以上網搵到拍九廣鐵路當年嘅演員！」我自信滿滿。
「痴線，個廣告1993年拍嫁，邊有人記得佢地係邊個姐...」肛輝。
「唔試過又點知，嗱你睇吓！」我用手機上Google打九廣鐵路，除咗一堆網上流傳嘅鬼故事之外，仲有一個個人網頁寫住「大家好，我就係當年拍九廣鐵路廣告俾人話我七孔流血嘅小朋友。」
「吓...但會唔會假咗小小...一睇就知係假啦.....」肛輝。
「佢個網頁連地址都寫埋，仲話歡迎探訪。我覺得值得試，佢都係住天后之嘛，幾個站就到啦～」我入去佢個個人網頁，條友而家已經變成中年男人，網頁入面仲佈滿晒佢嘅自拍照。
「喂唔係ｗｏ，1993年佢仲係小朋友，而家至多咪廿幾歲，點解佢成個阿叔咁嘅？」肛輝愈睇愈覺得可疑。
「可能人哋個樣生得成熟姐，去喇！」相反我愈來愈興奮，我估呢個阿叔一定好有趣。
於是我哋就塔地鐵去天后，我沿途一直都睇緊九鐵阿叔嘅個人網頁，原來佢個網頁連聯絡電話同詳細地址都寫埋，仲畫咗個地圖教人地點去佢屋企。我地跟足地圖指示去到佢屋企樓下，為咗唔會摸門釘，我就先打個電話俾呢位七孔流血嘅前輩。
「印象中火車永遠美妙～現實裡我們全力為您延續這份歡笑～你好！我就係七孔流血嘅小朋友～」電話響咗幾聲，就傳來一把中年阿叔嘅聲音，佢仲將廣告嘅宣傳字句用黎喺電話同人打招呼....
（資料短片：https://www.youtube.com/watch?v=ILhplc2AJ9g&feature=related）