[真人真事+少少甜] 一切，由MSN開始: 第五十九章、藍：二選其一
依家對住丁當，其實除左尷尬之外，我地仲好似隔左九萬里遠咁。
唔會咁嫁！呢個根本唔係我所想既... 當我想扮無野個時，丁當仲係會好深情咁望住我，搞到我都唔夠膽再直視佢。
大雄：
16:34 藍藍
16:34 我想開始認真讀書啦
16:35 不過 你都知 我個底好差 而且好容易分心
16:35 所以你可唔可以出黎同我溫書 好好督促我
我：
16:35 當然好!!!
16:35 但圖書館D自修室都唔講得野
大雄：
16:36 不如去我樓下個青年中心 個度有自修室 自修室外有D圓檯 唔識個時我地可以出去坐圓檯
我：
16:36 好呀!!! 聽日放學開始?
大雄：
16:36 ok!
大雄肯努力讀書當然係一件好事，所以我都好樂意陪佢。
到左第二日放學，丁當臨走之前偷偷地比左一張紙條我，仲叫我自己一個個時先好睇。
「藍藍，我漏左D書係屋企，我要番左屋企先。」
「咁我都番一番屋企拎番D notes先。」
「好呀，你搞掂哂就同我講聲，我先幫你搞左登記手續先。」
「陣間見！
」 一路番屋企，我都係到諗丁當寫左乜。
同大雄分開再行之後，我終於忍唔住要打開黎睇。
親愛既藍藍：
依家我地尷尷尬尬咁，都係因為我。如果我唔將我愛你呢個事實同你講，或者我地真係會做到「一世兄弟」。但係我真係忍唔到啦，我愈係話比自己聽我唔可以愛你，我反而變得愈黎愈愛你。
我有多好多野想同你講，或者我地講清講楚先可以打破依家尷尬既局面。你唔好再避我啦！至少比多一機會我同你傾清楚...
放學後係小白塔等你，不見不散。
丁當
無錯。我唔應該再逃避啦！
但... 今日放學大雄等緊我呀。
等我打比丁當先... 同佢約過另一個時間。
「你所打既電話暫時未能接通...」又係呢把可恨既聲音！
無理由要丁當係個度等我成3粒鐘... 咁唯有...
「喂！大雄，Sorry！我媽媽唔太舒服，所以我想係屋企照顧佢，我聽日先同你溫書。」
「咁唔緊要。叫伯母好好休息。」對唔住呀，大雄。
我唔係想呃你，但如果我講真話，你一定會阻止我... 只要可以同丁當修補關系，無論要我做乜都好，我都願意。