[真人真事+少少甜] 一切，由MSN開始: 第五十八章、丁：回不去的

我拖住藍藍一直行，我雖然扮到好似無乜野咁，但係其實我已經緊張到不行了，個心跳得好快，好似就黎跌出黎咁。  

『你…有冇睇msn呀？ 』我扮到好似好輕鬆咁問。 

『我有呀，不過我唔知點覆你好… 』藍藍dup到個頭好低，好似唔想俾我見到佢個樣咁。 

『咁…唔緊要啦。係呢，不如聽晚一齊去跑步丫，我地都好似好耐無一齊跑過咁 』 

『我唔知得唔得閒喎』 





『咁你得閒就同我講啦 』 

Dead air左一陣，我唯有再r d野講。 

『做咩你個樣咁尷尬咁姐，就算你拒絕我，我都會繼續當你係我老死嫁喎haha 』 

『真…真係？ 』 

『緊係啦haha』 





『丁當，其實我唔值得你咁樣等我，更加唔值得因為我而放棄kelly… 』 

『我覺得值得咪得囉。kelly依家仲有無搵你呀？』 

『無喇。我有搵過佢，不過佢都無覆我喇… 』 

話咁快就到左影印島，其實影印notes只係個藉口用黎約藍藍姐，所以我果其影左兩頁就算。 

『一陣得唔得閒呀，不如一齊食lunch丫？ 』我緊係唔想咁快俾藍藍走啦。 





『er…唔好喇，我約左媽媽食飯呀，下次先啦 』藍藍嘅語氣好似話緊俾我知佢講大話。 

『唔緊要啦，下次再約過，記得返去覆我跑唔跑步喎 』 

『好丫，byebye』 

『byebye』 

雖然終於都俾我約到藍藍出黎，但係氣氛都仲係尷尷尬尬咁，同我地以前大聲講大聲笑已經唔同哂，我地中間就好似多左面牆。 

或者，我表白呢個決定係錯嘅？ 

我都唔知道答案，不過如果我唔講就一定會更加後悔。 

我返到屋企之後一直等，等藍藍覆返我。等左好耐，藍藍終於上左線。 





藍藍： 
20:02 sorry ah 
20:02 我聽晚唔得閒呀 

果然。 

我： 
20:03 唔緊要啦 
20:03 反正我都要開始温下書 

藍藍： 
20:05 咁你努力喇 

話咁快就完左個聖誕假，我掛住煩藍藍d野最後都係無乜温過書，但係我同佢又無乜進展。 





放完假之後嘅第一日，又返到去熟悉嘅課室。 

有一個看似陌生嘅短髮女仔行左入左黎課室。 

係kelly!? 

本身長頭髮嘅kelly突然剪左個冬菇頭，平時無咩存在感嘅佢都引黎左全班嘅注目。 

『佢係咪受左咩刺激呀？ 』 
『聽講佢同丁當分左手喎』 
『係咪真嫁？ 』 

我隱約聽到有幾個女仔係度討論緊kelly，原來我地分手嘅事已經傳左出去。 





今次係我分左手之後第一次見返kelly。佢好似瘦左，個樣憔悴左，無黎精神咁，同我拍拖果陣時完全唔同。 

但係，對住坐係我前面嘅kelly，我無勇氣親口同佢講聲對唔住…