[真人真事+少少甜] 一切，由MSN開始: 第十六章、丁：促膝談心

當kelly撓住我隻手嘅時候，佢好似有意無意咁用對波黎壓住我隻手 ，搞到我又有D扯扯地，但係佢又好似無為意到咁，我見又幾爽所以就由佢撓住。 

行到黎海濱，呢度一早就迫滿哂人。kelly一路帶住我行一路撩我講野，但係我就左望右望，睇下會唔會見到藍藍。 

Kelly可能都見到我有D心不在焉，於是就問我：『做咩呀，你搵緊人？』 

『唔…唔係呀』 

『你係咪搵緊藍藍？』 





估唔到kelly一估就估到，我無答到佢。 

『你今日msn咪話有少少唔開心嘅，不如我地坐低傾下計丫？』 

『好…好啦』 

我地行到一個少人D嘅地方，搵左張長櫈坐低左。跟住我就一五一十咁將我同藍藍嘅野講哂俾佢聽。 

kelly聽完之後，沉默左一陣。果陣時我都唔知點解自己會同佢講哂所有野，明明同佢就唔熟。 





『咁…你依家仲好鐘意藍藍？』 

『我諗…應該係啦』 

『但係佢咁樣拒絕你喎，你仲未死心咩？』 

『我都知無咩可能可以同佢一齊，但係有D野唔係話放低就放低到…』 

『咁你諗住點做丫？死纏爛打？』 





『咁又唔會…我都唔知自己想點呀，我依家都好亂…』 

『我都知唔係咁容易可以放低一個人。你有無諗過用其他野黎沖淡你對藍藍嘅感情？』 

『下？姐係點？』 

『姐係…例如搵個第二個女仔拍下拖咁囉』 

『我D毒向左走向右走邊有人要丫…而且除左藍藍之外我都無其實異性朋友啦，我點會溝到女丫…』 

『咁如果依家有一個暗戀左你好耐嘅女仔突然間同你表白呢？你會唔會接受？』kelly個頭突然低左落去，好似想避開我嘅視線咁。 

『你咁問我我都答唔到你…但係我唔會想咁快開始拍拖住』 

『咁又係嘅…我都係講下姐。我地都好似傾左好耐喇，不如走囉？』 





『好呀，多謝你肯聽我講咁多野』 

『hehe，下次有咩唔開心都可以搵我喎』 

跟住我同kelly互相講左再見。唔知點解佢塊好似有D紅咁，不過同kelly講完之後我個心真係舒服左好多。唔知藍藍同大雄又玩成點呢？