《情困之時，我遇上了自稱情性的情聖》: [Case 06－青梅竹馬] PART 04
坐喺一間以白色為主既咖啡店...我諗應該可以話係咖啡店掛...
佢呢道個店名係叫做“Whirling Coffee”。
“滴答 滴答 滴答”時間一分一秒咁過...
我就一個人坐定定...被黑白相包圍下坐定定...總係覺得怪怪地咁...
怪怪地？有乜咁奇怪？奇怪得我無啦啦會坐左喺呢間咖啡店道？
係咯...點解我會無啦啦坐左喺呢間咖啡店道？
講起上黎就真係長篇喇…
是咁的...
自從嗰次喺Canteen為Kelly擊退眾狗公之後，都已經過左一個星期。
而喺呢星期，Kelly都無睬過我...
係…無錯...Kelly睬都唔睬下我...
唔單止睬都無睬下我...仲要唔幫我抄Notes...又唔幫我印Notes...又唔提我又要交Assignment...又唔落黎叫我起身返學...搞到我返親早都遲大到...差D Miss埋堂...都算...
最衰既係明知我有幾日無飯開，都唔叫我上去佢道黐餐！
搞到我嗰幾晚都要自己一個人喺屋企沖杯麵食！
杯麵唔可以食咁多架嘛！會死人架嘛！
Kelly佢係唔係想我食杯麵食死先安樂姐？
唉...Kelly真係好小器架！
唉...不過呢...我又嬲唔落佢...
我仲好擔心佢添...
擔心佢無我喺身邊，俾班狗公抽水都唔知...
你知架啦，Kelly一副入世未深樣...成隻小白免咁架嘛！
真係分分鐘俾D狗公擔左去食埋都唔知咩事...
為左可以繼續了解住Kelly，關心住佢既近況，呢個星期我都有留意佢既Facebook同Instagram！
我起身眼矇矇咁又睇下～食梗飯單手撳住部電話又睇下～上堂離遠坐喺Kelly後面又睇下～一個人坐巴士又睇下～
Kelly成個星期既Facebook都係講下自己食過D乜丫～買左D乜丫～溫左D乜丫咁～
而Instagram呢？來來去去唔係自拍下素顏樣，就係幾個女仔一齊食下野～扮下可愛咁既樣～
好平常～好正常～就好似乜都無變過～同平時一樣～
分別在於D相無左我～無左我...
係囉...今個星期Kelly所Upload上Instagram既相之中，完全無我既存在...
一張都無...半張都無...
之前Kelly Upload親上Instagram既相，起碼都有六成會有我既出現架嘛！
雖然話Upload親既唔係趁我未瞓醒就偷拍我流口水既睡相，就係我做左D柒事又咁岩俾Kelly捕捉到放上網...
總起碼叫有我份丫！
而且之前Kelly喺Facebook上提到既事，十之有九都會提及我！
但而家...好似乜都唔關我事咁既...
雖然話你嬲左我姐，但又駛唔駛真係做到隻字不提咁絕情呀？！
唉...Kelly真係好鬼小器架！
當我嬲嬲地，一手就將隻Mouse Dom一Dom落檯面之時...
『情...性？！』視窗一打開...就打開左個名為“情性”既專頁...
情性？
個名好似...咁奇怪咁既？
更奇怪既係...點解會無啦啦彈左呢個咁奇怪既專頁出黎架呢？
唔好理咁多…因為有更有趣既野...吸引住我既視線...
我既視線...一直都喺...喺佢個...佢個置頂Post上...
個置頂Post寫住“只要你不是戀兄、搶男友、師生戀，所有情困我也可以為你一一解開。”
『所有情困也可以為我一一解開？！』我有D驚訝！
我驚訝既唔係喺呢個世上竟然有個痴線佬話自己可以為別人解開情困！
我驚訝既係點解要唔係戀兄、搶男友同師生戀呢？
戀兄、搶男友同師生戀就唔可以係情困架喇咩？
定抑或條友覺得呢三件事都好棘手，無能為力呢？
我唔知...我只係知呢個人相當有嫌疑...
我係唔係應該即刻轉身閂鬼左個視窗去呢？
不過...如果話有人可以為我解開情困...
情困...我而家同Kelly之間...算唔算得上係情困呢？
我同Kelly...我係唔係應該要...要做返D野呢？
就算係唔係要做返D野都好...最起碼都要令Kelly唔好再嬲我先啦～
係咯係咯…搵人幫下手...令Kelly唔好再嬲我...變得返之前咁樣...都OK架喇...
係咯係咯…只要可以變得返之前咁樣...只要可以變得返之前咁樣...
『好啦！就睇下你可以點樣幫到我啦！』
我喺個Facebook Messenger快快手手打左幾隻字：“我有情困”
我諗...我同Kelly之間...都算係一種情掛～
唔駛過幾秒就有回覆！
我睇一睇個Message Box...係一個日期、時間、地點...
係要約出黎見面架？
而家通訊咁發達，仲要約出黎見面？
喺個Facebook Messenger裏面講唔得架咩？點解要約出黎面對面傾先得呢？
好似只有嗰D康寶萊丫～LB丫～先會約出黎傾架咋喎...
仲要一出黎傾唔到你落搭都唔肯放你走過隻...
會唔會有危險架？
危險？我怕咩危險丫？
我意志咁堅定，駛鬼怕佢咩？！
係咯！只要意志堅定，就唔怕會俾佢呃到D乜啦～（最重要既係我都無乜野俾佢呃～）
好啦～應承左佢先啦～
“OK”
“到時見。”
答得咁口爽咁既…係唔係真係咁把砲丫？
好啦好啦～既然都決定好喇，就等我睇下你係唔係真係咁堅揪～
於是，我就係今日呢一個時間，一個人黎左呢間名為“Whirling Coffee”既咖啡店中，等一個自稱情性既情聖出現。
坐喺呢間以白色為主，被黑白相包圍既咖啡店中...整間咖啡店就只有一個姐姐打理。
話就話係姐姐...其實都應該大我一、兩年左右...
個姐姐睇起上黎都幾靚女下...
眼大大...鼻高高...面尖尖...皮膚又夠白...對腳又夠長...
最重要都係有女仔既感覺...
唔似得Kelly咁...成日都對我粗聲粗氣咁！成個男人咁！
不過...有陣時...Kelly佢對我都有溫柔既時候既...
溫柔既時候...
許！無啦啦做乜諗起Kelly架呢？
我而家明明就係喺道?梗靚靚姐姐架嘛！
我細心咁觀察一下呢個靚靚姐姐...
只見佢喺個咖啡機前好細心咁為我沖咖啡...
姐姐真係有種特別既魅力～
總係好似好體貼～好溫暖～好有安全感～
就好似Kelly俾我既感覺咁～
雖然話成日都對我粗聲粗氣，但好多時都好照顧我～
照顧我...Kelly佢好多時都好照顧我...
許！無啦啦又做乜諗起Kelly架呢？
我而家明明就係喺道?梗靚靚姐姐架嘛！
再望返呢個靚靚姐姐...
其實都真係幾叻架喎～
雖然話呢間咖啡店就唔算得上大，而且人流又唔係話多，但要一個女仔為一間咖啡店打理得井井有條，都真係唔講得笑...
而呢個靚靚姐姐又會唔會係呢道既老闆娘呢？
我就覺得好大機會係被包養既小三喇～
唔好話我口賤丫～一個咁靚又咁年輕既姐姐，唔係靠男人既話，自己又邊有能力經營一間咖啡店丫～
仲要喺港島區喎～
話就話係樓上舖，但而家D樓上舖既租金可以媲美新界既街舖架～
呢道D咖啡丫～甜品丫～又賣得鬼咁平喎～
我計你咖啡加件甜品賣六十蚊丫，你一日要賣幾多先圍到皮丫？
真係唔好話我地D大學生中、英、數都唔掂丫？加減乘除都計得下架～
所以話，我硬係覺得...眼前呢個雙手拎住杯咖啡...行梗過黎既靚靚姐姐...一定係同呢間咖啡店有住不可告人既不道德秘密～
「你要既朱古力碎咖啡～請慢用～」個靚靚姐姐放低左杯咖啡，向我點一點頭後...
『唔該…唔該…』我眼定定望住靚靚姐姐條短裙邊...
粉紅既短裙仔...裙邊露出白色Lace...
總係令人想入非非...
再加上一對雪白粉嫩既美腿...
真係只係睇一眼...個心都跳埋出黎咁制...
「唔駛客氣～」靚靚姐姐同我打左個眼色之後，轉身離開...
我對眼仍然望住靚靚姐姐對美腿實一實...
望住條短裙邊擺下擺下咁...
望到我條J都扯起上黎...
請原諒我呢D青頭仔連女仔既身軀都未掂過...係無乜自控能力架喇...
咩無掂過女仔既身軀姐？我成日都同Kelly攬頭攬頸架啦！
不過...都唔係嗰種...
雖然話我係鍾意Kelly...但同佢攬頭攬頸既時候都唔係嗰種...
點講好呢...
唉～總之唔係想鹹濕佢嗰種啦！
或者我咁講，你會覺得我好奇怪...
你會覺得我1999...
但我真係唔識得形容呢種感覺丫嘛！
一種感覺...一種好奇妙既感覺...
“叮 叮 叮”當我仲諗梗點樣去形容呢種奇妙既感覺之時，掛喺咖啡店門上既鈴鈴響起...
我回身望一望咖啡店門口...
我見到有個著住黑色西裝褸、白色恤衫、黑色領帶、黑色西褲、黑色皮鞋、梳左個拍蠔All Back既男人單手插住褲袋行入黎...
呢個男人...呢個成熟得黎帶點屈機...屈機得黎帶點柔情...柔情得黎帶點奔放...奔放得黎帶點憂鬱既男人...唔通就係情性？！
「歡迎光臨～」靚靚姐姐帶住親切既微笑向呢個男人點一點頭....
我諗靚靚姐姐下面應該已經濕到成地都係...
呢個睇起上黎唔過三十歲既男人...總係有一種...身上總係散發住一種...一種震懾魅力...
只見個男人帶住憂鬱既微笑，向住靚靚姐姐點點頭後...一路行...一路行...唔係行黎我呢個方向...
嗯？
呢個男人唔係我要等既情性？
“咯 咯 咯”個男人行埋去D黑白相...大大小小既黑白相前...仔細咁欣賞...欣賞...
“咯 咯 咯”一張又一張...一張又一張...
“咯 咯 咯”個男人每行到去一張黑白相前，都會好用心咁去感受...好用心咁去細味...
特別係當呢個男人行到去一張喺山頭上影既黑白相前...佢全神貫注咁打量住張相...
眼都唔眨咁望到實一實...
我留意到個男人既眼中...好似唔係只係得眼前張黑白相...
個男人既眼中...仲好似有好多回憶...好多往事...
一對憂鬱既眼神...內裏充滿住種種往事...
究竟呢一個男人...經歷過D乜呢？
又要經歷過幾多，先可以擁有呢一對憂鬱既眼神呢？
我唔知...我唔係佢既話，我係唔會知...
我只係知道，每個人總有佢自己既故事...
我坐定定又眼定定咁，望住呢個男人企定定又眼定定咁，望住張黑白相好一陣子...
差唔多過左一分鐘...差唔多過左兩分鐘...
只見個男人閉起雙眼....輕輕一笑…點一點頭...
“咯 咯 咯”踏步離開...
“叮 叮 叮”當掛喺咖啡店門上既鈴鈴再次響起...男人離開咖啡店後...我先諗起...
頭先個男人...嗰條黑色領帶...有條白色蜥蜴既黑色幼身領帶...
『係我最鍾意嗰款Agnes B既領帶呀！』
無錯喇！頭先嗰個男人戴梗嗰條領帶，咪係我中學雞時代最想買嗰條Agnes B領帶囉！
嗰陣時岩岩升上中一就想扮大人，著得成熟D，想買條領帶戴！
見到Agnes B呢款領帶我就一見鍾情喇！
嗰陣時，Kelly話我考第一就俾我中...就送條俾我！
點知個第一就俾Kelly搶走左...
好啦～諗住自己儲錢買啦～點知到我儲夠錢，條領帶就絕左版...
係咯…都絕左版好多年啦～
估唔到而家又俾我見得返～
而且個男人仲Keep得條領帶好新淨咁～
呢個男人...睇黎都係一個既長情～又專一既男人～
點解我會知？因為我都係一個既長情～又專一既男仔囉～
個男人走左之後，間咖啡店又剩返我同靚靚姐姐兩個人。
我望一望手腕上既手錶...
都仲係有D早…
我又真係早左D黎到...
唔緊要啦～反正Kelly嬲左我之後，我都無所事事大把時間架啦～
係囉...無左Kelly喺身邊...真係好得閒...
得閒到有D無聊...有D悶...
Kelly…Kelly…
當我痴痴呆呆咁諗起Kelly之時...
“叮 叮 叮”掛喺咖啡店門上既鈴鈴又再一次響起...
我定一定神...望一望向店門...
今次我見到一個著上全套黑色西裝...黑色恤衫...連條領帶都係純黑色既...貌似...貌似古天樂咁既男人！
我望住呢一個既成熟，又穩重既男子...一步一步向住我既方向...我坐梗既向方行梗過黎...
“咯 咯 咯”一步一步咁行梗過黎...
“咯 咯 咯”一步一步咁行梗過黎！
呢個型到核爆既男人...呢個Man過MenClub既男人...就係...就係...
「你好。我就係可以幫你解決情困既情性。」古天樂...唔係！情性帶住微笑坐到去我前面...
呢個情性...就連笑容都十足十古天樂咁...
『你好...你好...』我仲係俾眼前呢個有九成似古天樂既情性迷到痴痴呆呆咁...
我再睇真D...情性既年紀...有D接近頭先嗰個男人...
都係應該唔過三十歲...
而佢地兩個都散發住一種氣息...
一種...黯然神傷既氣息？
兩個西裝友身上都散發住一種黯然神傷既氣息...
今日係乜野日子呀？
做乜咁多人著晒成套老西又要咁型咁Man呀？
好彩無俾Kelly見到姐！
Kelly就最鍾意著老西既男人！
俾佢見到呢兩個型男既話，真係發晒花癲都似！
「你就係Ivan？唔知你有乜野情困需要解開架呢？」情性保持住古天樂式微笑望住我...
呢個笑容真係不得之了...
唔好話Kelly...就連我都覺得好吸引...
真係唔怪得咁多人都話古天樂係Gay...
你俾佢咁樣電一電，唔中途轉Gay先怪...
『嗯嗯...我就係Ivan...我既情困...』我都仲未講完...
「你要既Espresso～請慢用～」個靚靚姐姐放低左杯咖啡...
『唔該～』情性向靚靚姐姐點一點頭後，靚靚姐姐轉身離開...
我望住靚靚姐姐對美腿...喺道諗...
情性頭先一入黎...就立刻行到埋黎...坐到我對面...
佢都無去同靚靚姐姐講話要D乜野...
就連一D交流都無...
點解個靚靚姐姐又會知道情性想要Espresso架呢？
「你既情困，唔會係同嗰個女仔有關架嘛？」情性飲一啖咖啡，望一望已經行返埋Counter入面既靚靚姐姐...
『唔係唔係！點會係呢？！』呢個情性...做乜無啦啦咁問架？
「咁你又掛住?人？」情性冷眼望一望我...
『唔係唔係！我唔係?呀！』我只係好奇你地兩個之間既關係咋嘛！
不過又講真嗰句...咁靚既女仔...又有邊個男人唔會去?？
又唔係喎...頭先嗰個男人...同而要眼前既情性...都好似對呢個靚靚姐姐無乜興趣咁既...
唔通佢地兩個...都係Gay既？！
「哈哈哈！同你講下笑咋～唔駛咁認真～」情性放一放低杯咖啡後笑一笑…
好好笑咩？
我唔覺囉...
「講返正題...你既情困，唔會係有關於戀兄、搶男友、師生戀架嘛？」情性打量下我...
『唔係唔係…』不過我又好想知，如果真係關於呢三樣野既話，情性又係唔係會置諸不理呢？
「嗯...咁你既情困...又係D乜呢？」情性眼定定咁望住我...
我又望住情性一對烏黑既眼珠...
我既情困...我既情困...
『我個朋友...嬲左我...』Kelly佢...嬲左我...
「你個朋友係女仔黎？」情性打量一下我...
『嗯...』我諗就算Kelly佢對我點粗魯，我都唔會當佢係男仔...
「係女朋友？」情性諗一諗...
『唔係唔係…』點講都講唔上係女朋友...
「你同佢既感情好好？」情性再諗一諗...
『好唔好丫...我同佢由細識到大...要笑就一齊笑...要喊就一齊喊...有時又會吵吵鬧鬧...又會郁手郁腳咁囉...』咁算唔算得上係好？
「青梅竹馬…兩小無猜...」情性又再諗一諗...
『係掛…』我諗應該就係啦...
「咁點解佢會嬲左你？」情性又打量下我...
『講起就扯火喇！是咁的！嗰日我見到成班狗公想抽佢水喎，我咪幫佢鬧走班狗公囉！點知佢仲話我小朋友！話我無家教！喂！你弱智到唔識得保護自己唔緊要！天生既無得改！咁我咪黎保護你囉！你仲好人當賊辦！你話係唔係唔嬲就假？！』真心嬲到差D屌埋老母！
「咁講好似你嬲左佢多D喎...」情性又再打量下我...
『我真係嬲嬲地架！本來一直都有佢落黎叫我起身返學架嘛！自始之後，條八婆就無再落黎叫醒我！搞到我日日都遲到！仲差D Miss左D堂！』搞到我唔夠出席率畢唔到業既話，我真係嬲佢一世！
「落黎叫你起身？」情性疑惑咁望住我...
『係丫！我地住樓上樓下！我有佢屋企鎖匙！佢又有我既屋企鎖匙！』
「咁你地都好親密下喎...」
『我地兩家人都係咁親密架啦！』
「由細到大都係咁親密？」
『喺我地兩個未出世之前，我地既父母都係咁親密架喇！』
「比起兄妹更親密？」
『比起姊弟更親密！』Kelly係大過我一日既！
「?仔你係唔係玩野呀？」情性冷眼望住我...
『我！』我...我係唔係玩野？
我玩咩野丫？
「呢D設定呀，唔係FF出黎，就一早喺埋一齊啦！仲駛乜問咁多呀？！」情性冷眼望一望我，再飲一口咖啡...
呢D設定...唔係FF...就一早喺埋一齊？
『但我同佢真係...』我同Kelly真係...唔係情侶關係喎...
「咁你係唔係鍾意人丫？」
我...我係唔係鍾意Kelly...
「或多或少都總係有D掛？」
唔止或多或少...真心嗰句...我都真係好愛Kelly...
「係鍾意人就上啦仆街。」情性放下一句之後...
“咯 咯 咯”一步一步咁行去Counter...放低D錢...
“叮 叮 叮”當掛喺咖啡店門上既鈴鈴再次響起...情性步出咖啡店...
我痴痴呆呆咁望住已經再無Espresso喺裏面既透明咖啡杯...
『係鍾意人...就上啦...仆街？』