《情困之時，我遇上了自稱情性的情聖》: [Case 06－青梅竹馬] PART 05

「喂～喂～起身喇～」

當我仲沈睡喺美夢中之時...

「快D起身啦～快D起身啦～超級懶瞓豬蕭錦民～」

一把既熟悉...又甜美既女仔聲呼喚梗我...

「朝朝都咁懶瞓架你～再唔起身又遲到架喇～」



我仲感覺到個身不斷咁俾人搖梗...

「快D起身～快D起身～快D起身～快D起身～快D起身～快D起身～」

我個人就不斷俾人搖下搖下...擺下擺下...搖擺到就黎散咁制...

『嗯嗯嗯...醒喇醒喇醒喇！！！』我一睜開雙眼，就見到頭先喺夢中攬住瞓喺床上既Kelly...

「醒喇咩？終於肯醒喇咩？朝朝都要人地落黎鏟你先識醒～懶瞓到死～」模模糊糊之下，我見到眼前既Kelly谷起塊面豬登咁怒視住我...



又變返平時咁...又變返之前咁...

變返朝朝都有Kelly落黎叫我起身...變返朝朝都有Kelly落黎煮早餐俾我食...變返日日都有Kelly喺我身邊生活既日子...

自上一次去左嗰間咁古怪既咖啡店見過勁古怪既情性之後，都有一個星期～

而喺第二日，Kelly都已經主動落黎鏟我起身～

所有野都變得好平常～回復正常一樣～



但實際上係唔係咁？

我又唔係真係咁認為...

因為我內心總係有一條問題...一句說話不停咁Loop梗...

「係鍾意人就上啦仆街。」

無錯喇...就係情性既呢一句話...

係鍾意人就上啦仆街...

先唔好理係唔係仆街...

係鍾意既話，咁點上先得呢？



你就係識得叫我上，但又唔教我點樣上！咁究竟邊個先係仆街呢？

咁你又叫我點做好呢？

即係叫我食自己？

好啦～咁我就食自己啦～

但係我都已經諗左好耐...諗左足足一個星期...都係諗唔到應該點上...

硬係好似差梗D野咁…

究竟係差梗D乜呢？



我又噏唔出...

我只係覺得..我同Kelly之間...係差梗D...差梗D...差梗D野...

或者順其自然既話，終有一日會知道差梗D乜既...

「快D起身刷牙洗面梳洗下啦！我煮埋早餐俾你食丫！」Kelly落一落床後，行左入廚房...

係咯～順其自然左都有十八年啦～繼續順其自然落去啦～

如平日一樣，我都係慢條斯理咁沖個靚涼～由得Kelly喺廚房幫我煮早餐～

「點解你朝朝都好似成個女人咁，沖涼沖咁鬼死耐架呢？！」當我一梳洗完出黎，好理所當然咁聽到Kelly既埋怨啦～

『細個同你一齊沖涼沖得多丫～有埋你D壞習慣丫～』我又好理所當然向Kelly還拖～



「我由細到大沖涼都沖得好快架囉好唔好？！」Kelly用支叉叉住我...

『你掛住玩鴨仔都話沖得快丫？！』我又用把刀擋住...

「係你死都要搶我隻鴨仔先搞到沖咁耐咋嘛！」Kelly谷起塊面豬谷隊支叉埋黎...

『隻鴨仔我架！』我又用力壓把刀埋去...

「俾人玩下都唔得！一D風度都無！」Kelly無我咁好氣，開餐～

『係喇係喇係喇…我最衰喇～』我都無Kelly咁好氣，開餐～

小朋友緊係鍾意爭野玩架啦～



點可以話無風度呢？

你話好似而家咁大個就話姐～

而家同Kelly爭親野，我有邊次唔讓佢丫？

費事又俾佢話我無風度啦～

「喂係喎～我尋日幫你拎埋Yuki張帖喇～」Kelly喺個手袋仔裏面摷左摷，拎左張白色底色，粉紅色字既信封俾我～

『哦～唔該喎～』我接過張喜帖之後，拆開黎睇下～

係Yuki師姐同冼Sir既喜帖呢～

『估唔到佢地又會咁快結婚呢～你話會唔會係奉子成婚丫喇～』我望住冼Sir同Yuki張恩愛相～

佢地兩個，又真係幾登對既～

「乜你講得咁衰架！我就話唔係喇！我覺得係因為真心相愛，大家都認為對方係自己既命中注定，所以先決定共諧連理～」Kelly雙眼充滿憧憬...閃閃發光...

『乜真係咁咩？師生戀喎...』師生戀...

突然令我諗返起情性...

或者真係...

或者師生戀對好多人黎講...都係有問題...

就連我都覺得有問題...

始終...師生戀總係令人覺得為人師表者...係唔應該藉住學生到師長既相信...同學生發生關係...

「乜你咁老套架？！師生戀咁又點喎？係真心相愛就無問題啦～」Kelly冷眼望一望我...

『如果真係無問題，冼Sir當年就唔會俾學校開除啦～』呢個世界就係咁老套架啦～

「係當年班同學傳得太衰咋嘛！又話冼Sir同Yuki喺電腦室搞野...又話喺Bio室搞野...又話喺DT室搞野...仲要話係禮堂後台搞野！痴線架～禮堂後台有閉路電視架嘛！點搞姐？」Kelly皺晒眉咁擰擰頭...

連禮堂後台有閉路電視都知？Kelly又會咁清楚既...

『但傳聞話係冼Sir帶Yuki去時鐘酒店爆房，警察查牌發現到佢地係師生關係，通知埋學校，通知埋Yuki家長，冼Sir先被開除架喎～』嗰陣時既最終謠傳就係咁傳啦～

「痴線啦～真係要搞丫，上冼Sir屋企又或者Yuki屋企搞都得啦！駛乜去時鐘酒店爆房咁危險丫？」Kelly理直氣壯咁反駁我...

Kelly又講得好似好有道理咁喎...之但係...

『你又知人地屋企方便既？冼Sir家中無兄弟姊妹一齊住既～你唔俾Yuki父母喺屋企既？』如果真係咁方便，香港就無晒時鐘酒店啦！

「唔一定廿四小時都有人架嘛！總有無人喺屋企既時候架嘛！」

『咁如果忍唔住呢？等唔切呢？好梗火呢？』

「求其搵個藉口～話上去幫Yuki補習又好～上冼Sir屋企拎功課又好～閂埋門就咩得啦～」

『咁會呻吟架嘛！』

「忍住唔好嗌得咁大聲咪得囉！」

『細聲極都係有聲架！仲有啪啪啪啪啪啪啪啪啪啪啪聲同滋滋滋滋滋滋滋滋滋滋滋滋滋聲呢？！』

「我點知得咁多喎！」

同Kelly爭辯左成個食早餐既時間...

「總之就唔係傳聞咁既樣啦！」Kelly都仲係死唔服氣...

『你又唔係Yuki！你又點知呢？』我地就繼續爭辯到返學...

「你夠唔係冼Sir咯！你又點知喎？！」繼續爭辯到放學...

『你又唔係間砲房！你點知佢地唔係喺嗰道啪啪啪啪啪啪啪啪呢？』繼續爭辯到行梗街...

「女人既直覺！你識條鐵咩？！」繼續爭辯到搵梗買D咩禮物，送俾冼Sir同Yuki做結婚禮物...

『咁你講晒啦～女人～』我地都係得唔出結論...

或者...結論...就只有冼Sir同Yuki佢地兩個自己先知...

同Kelly喺旺角繼續四圍行...

今日既堂就係得朝早嗰四個鐘...

可以話係最輕鬆，亦係最無聊既一日～

好多人都會喺呢日返下Part Time～

不過我同Kelly今日就諗住買定禮物，送俾冼Sir同Yuki祝賀佢地新婚之喜～

「你話買D乜送俾Yuki同冼Sir好呢？」Kelly行下又諗下，諗下又睇下咁...

『你係女人黎架嘛～有女人既直覺架嘛～你話買乜就買乜囉～』講到自己咁巴閉～

「叫你幫手諗就幫手諗啦！咁多野講！你話送情侶手鐲好唔好丫？Cartier好似岩岩先出左對以情侶作賣點既手鐲～」Kelly喺間賣飾物既店舖外望下望～

『唔好咁低能啦！結婚禮物送情侶手鐲！係都打對龍鳳鐲啦！』人地都結婚啦！仲送情侶手鐲？！

「龍鳳鐲咁老套！真係得你先諗得到！」Kelly向我伸一伸脷，扮左個鬼臉...

『好過你咁低能丫～』真係仲好意思話我架喎！

「咁送對結婚公仔丫～幾得意丫～」Kelly拎起左Hello Kitty同Dear Daniel…

望住一面天真既Kelly拎住對公具擰下搖下玩下咁...

『聽講Dear Daniel係女仔黎架...只係佢女扮男裝接近Hello Kitty搶佢鏡咋...』唔知點解...見到Kelly咁天真既樣，又想頂佢兩嘴…

「你喺邊道聽返黎架？」Kelly一面疑惑咁望住我...

『高登囉～D高登仔仲話佢地明明就係SheShe啦！係D白痴港女先俾佢地呃到架咋！』咁都俾D呃錢公仔呃到，真係夠晒白痴～

「高登仔講既野都好信既？！係人都知班高登仔只係一班溝唔到女既死毒L黎架啦！仲要係死葡萄～死葡萄～」Kelly谷一谷起塊面豬登，篤一篤我額頭...

『咩死毒L呀？咩死葡萄呀？高登仔個個都會考30分，重點係考試前一個鐘先溫習都有30分；入讀名校，中學入讀皇仁英皇，大學入讀牛津劍橋，HKU或Ivy League等。英俊又有型，身高180 cm或以上，會被其他人指貌似某某大明星，靚仔到好似吳彥祖、金城武咁！有樓有車，居住九龍塘、跑馬地、半山區等，而且有幾架私家車～內地親戚全部都係高官，億萬富豪，黑社會等，有一定既地位！結識異性聖手，女友似足Lisa S.、Maggie Q等，總之美麗有身材又有長腿，最重要係並非港女！肌肉發達，擁有42吋胸肌及六塊腹肌，有如張耀揚般身型！』我都仲未將其餘嗰五十樣長處數出黎...

「得喇得喇～成班都係自吹自擂既廢柴～」Kelly懶得理我咁既樣...

『講起柴，佢地自宮後，下體喺一天內會自動重生添架！』真係練辟邪劍法都無有怕！

「得喇得喇～」Kelly都係無我咁好氣，繼續行下又諗下，諗下又睇下咁...

其實要祝賀一對新人，買乜禮物比較好呢？

或者你會話：「放低一千咪算囉！錢都俾左啦！仲咁傷腦筋做乜姐？」

一千當然要放下啦～

不過我地係唔係可以為呢對新人再付出多D～再用心祝賀多D呢？

話晒都係朋友～我地係唔係應該可以再為佢地高興多D呢？

試下唔好下下都講錢丫～

試下唔好諗嗰一千食得D乜，有無翅食丫～

試下多D同理心～

試諗下有好多野都唔係用錢去量度～

特別係好似我地呢個年紀既年青人～

仲未真正投身社會既年青人～

仲未需要變成市儈既成年人～

「喂喂喂～你話買情侶杯好唔好丫？」當Kelly一入去到Human Touch，就拎起左對情侶杯黎睇。

「呢位小姐真係有眼光喇～我地呢Set系列係新返既～最適合就係好似你地呢種年輕既情侶架喇～」個店員姐姐行到我地身邊介紹。

『我地係買黎送俾朋友做結婚禮物既...而且我地唔係情侶...』我好自然咁立即澄清！

「係丫～點睇呢條友都唔會似係我男朋友啦～」Kelly冷眼咁望住我...指一指我...

哎呀呀！而家我好失禮你咩下？！

托到自己天咁高！踩到我貼晒地咁！

「哦～係想買黎送俾朋友做結婚禮物既話...有無考慮下我地既套情侶床鋪套裝呢？」個店員姐姐就帶左我地過去賣床鋪嗰邊...

「嘩～好得意又好Sweet丫～你睇下個男仔～吹D心心俾個女仔丫～」Kelly又一副天真樣咁拎起個情侶床鋪套裝...

『嗯...真係幾Sweet喎...』當女仔睇到D咁Sweet既野既時候，係唔係特別嗲架呢？

「係好Sweet架～岩晒用黎做結婚禮物架～我諗你朋友收到既話，一定好開心架姐～」個店員姐姐向我地打左個眼色～

「嗯嗯～不如就買呢個送俾Yuki佢地咯～」Kelly對眼發晒光咁...

『哦...好丫好丫...』我就俾Kelly對會發光既眼神吸引住...

Kelly呢對眼神...既閃亮...又迷人...

就好似一個正期待住戀愛既少女一樣...

一個正期待住戀愛既少女...總係會令無知少男...痴痴迷...痴痴迷...

「咁碌住你張卡先～我轉頭俾返你～」Kelly喺我個褲袋道拎左個銀包出黎...

『哦哦...好丫...』迷到我乜都話好...

「多謝你1950～收你Master～」店員姐姐四萬咁既口接過我張信用卡...

『哦哦...好丫...好丫...』迷到我簽埋個名...

「多謝晒～多D黎幫襯喇喎～」店員姐姐笑晒口，揮晒手咁送我地出門口...

『哦哦...好丫...好丫...』我究竟喺道好D乜丫？

點解我硬係有種跌入美人計既感覺咁架呢？！

同Kelly買完禮物之後，佢話想搵個地方坐下食下野喎～

『喂喂喂...俾返錢黎先...唔好扮晒野當無件事喎...』我當然要爭取返D錢啦！

大嗱嗱成千幾二千蚊架喎～你估少錢架？

「得喇得喇～未撳機嘛～食埋野先過返俾你啦～」Kelly就成個光棍一樣...

呢次真係財到光棍手，一去無回頭囉...

「喂喂～不如食呢間啦～聽講呢間茶記D下午茶又平又好味架～試下咯～」Kelly指一指住前面間茶記...

『哦...你話事囉...』我見間茶記外面都幾光鮮咁...應該OK既...

「嗯～GoGoGo～」Kelly好似好興奮咁...

點解Kelly一講到食就好似咁開心咁架呢？

係唔係個個女仔都係咁架呢？

而奇就奇在點解Kelly又食極都唔肥架呢？

係唔係個個靚女都係食極都唔肥架呢？

咁豬扒唔駛減肥啦～

反正呢頭減完，嗰頭就肥返～

減黎都浪費時間～

當我同Kelly行到去間茶記門前，我聽到裏面...好似有D嘈吵咁...

「老闆！我真係有D緊要事出一出去！」

我好似聽到有把男仔聲...

把男仔聲仲有D激動...

「你成日唔係話有緊要事返唔到工，就話有緊要事早走！唔駛有人做野架啦？！」

我又聽到一把男人聲...由茶記入面傳出...

而呢把男人聲...有D火爆...又有D老...應該係由四、五十歲既男人發出...

「唔係呢老闆...今次真係好緊要架...」年輕既男仔聲苦苦哀求...

「我話知你死老母呀！」個中年男人發出吼叫！

「真係緊要過死老母架！」年輕既男仔聲越黎越焦急...

「你一係就唔好撈！一係就同我死返入去水吧！」

「咁...咁...我唔撚撈喇！你挺執笠啦！」

未幾，喺我地面前塊茶記玻璃門被推開...

有一名著住白色衫既男子衝左出黎！

「哎呀！」仲撞到Kelly！

Kelly成個人就俾嗰名男子撞到挨左落我身上！

我立即攬實Kelly！

『你無事丫嘛？有無撞親邊道丫？』我好緊張咁望住Kelly！

「無…無…」Kelly就喺我既擁抱之中，眼定定咁望實我...

『真係無事？佢撞得你好應喎...真係無見邊道痛丫嘛？條友有無搞錯架？！撞到人就連句Sorry都唔講聲！』我望住一直奔跑既背影...

嗰個男仔仲要一路跑，一路除去身上件白色衫，黎手就Dom左落地...

睇個男仔咁急趕...又真係好似死老母咁款喎...

「對唔住兩位...對唔住兩位...條廢柴無撞親你地丫嘛？」有個中年男人由茶記行出黎，勁唔好意思咁問候我地...

唔駛問都知，呢個中年男人一定就係呢間茶記老闆啦～

『無乜事…本來諗住入黎食下野既～但而家咁...都係去第二間食啦～』我扶一扶住Kelly，諗住繼續向前行。

「等等...等等...為左向兩位賠罪，埋單...半價～」老闆笑得好客氣～

「咁就唔同講法喇～多謝晒先喇喎～」Kelly笑到四萬咁既口，仲要拉住我入去茶餐入面...

呢個Kelly丫...一聽到半價姐...雙眼發青光咁...

女人～都係貪埋晒D小便宜既生物...

不過講開又講，個茶記老闆又會咁好死既？

乜生意真係咁唔好咩？

話晒都係喺旺角區丫～

聽講有好多自由蝗搶奪完都會喺呢區食野架～

唔係應該好好搵先係架咩？

搞乜而家慘到要半價賤賣丫？

「兩個菠蘿油餐～兩個都係要凍檸茶～」同Kelly隨便咁揀左個卡位坐之後，Kelly就幫我叫埋野食。

我望清楚茶記四周，又真係好似無乜人...

幾對情侶坐喺道食下午茶...

好明顯仲要係本地人...

而且仲要搵架旅行箱睇下都無...

睇黎…香港真係乾淨左好多...

「我諗Yuki佢地一定好鍾意我地揀呢份禮物姐～」Kelly拎一拎袋禮物搖一搖～

『係丫～每當佢地啪啪啪啪啪啪啪啪啪啪既時候一定諗起我地添～』到時都真係唔知繼唔繼續啪落去好～

「你個死變態可唔可以浪漫D架？！」Kelly大大力拍一拍我膊頭...

『喂！痛丫！啪啪啪啪啪啪啪又有幾唔浪漫丫？』唔浪漫又點啪啪啪啪啪啪啪到丫？

「可唔可以講下佢地好浪漫咁攬住瞓喺我地送俾佢地既床舖之中架呢？」Kelly諗左一諗，好似FF梗咁...

『之後咪啪啪啪啪啪啪啪啪啪啪啪啪啪啪啪囉～』我又諗一諗...FF下冼Sir點樣啪啪啪啪啪啪啪啪Yuki...

「你個腦真係唔可以乾淨D架喎！」Kelly谷一谷起塊面豬登...

『咁呢D野都好正常姐！而且以冼Sir呢種成熟年紀，特別需要架嘛！肯定嗰陣時就受唔住Yuki既引誘，搞到連份工都無埋啦～』所以話，喺中學做阿Sir真係唔容易架～

「乜你成日都講到冼Sir同Yuki一齊好似係一件錯事咁架？！」Kelly仲係嬲爆爆咁...

『咁師生戀丫嘛…』我又諗起情性...

「師生戀咁又點姐？有乜錯姐？兩人真心相愛咪得囉！」Kelly理直氣壯咁...

『係姐...之但係...』我又諗唔到之但係乜喎...

「之但係乜呢？你睇下而家冼Sir同Yuki咪開花結果囉～呢個結局幾咁完美丫～」Kelly好似好幸福咁點點頭...

『係姐...之但係...冼Sir都係俾校長炒左喎...』唔係因為呢件事，冼Sir又點會俾人炒...

「咁而家冼Sir都去左隔離嗰間學校做啦～咪一樣無問題～」Kelly仲係好似一面幸福咁...

『係姐...之但係...冼Sir大過Yuki咁多...都好似唔係咁好咁囉...』年齡都係一個問題...

「有幾多姐？好似都係大九年咋嘛～我就覺得好似冼Sir呢種年紀既男人就最吸引喇～」Kelly對眼仲係好似識發光咁...

『有幾吸引丫...』我就有D唔抵得喇...

D叔叔成日似住自己經驗老到，溝D入世未深既妹妹仔！

搞到我地呢D成日都睇住女神俾D叔叔中出即飛...

真係諗一諗都想Dom春！

「好似冼Sir呢個年紀既男人，思想成熟又穩重～夠晒有安全感～唔似得你咁...成個小朋友咁～」Kelly冷眼望一望我...

『我好差咩？我好小朋友咩？』我又有D唔憤氣！

「你睇下你～講兩句就發晒脾氣咁～小朋友～小朋友～」Kelly篤一篤我鼻指...

『我！我...』Kelly又好似講得好岩咁喎...

我又好似好易發脾氣...

就好似D小朋友咁...

有乜唔順就大大聲聲嘈左先算...

完全唔可以冷靜落黎諗下...聽下別人既見解...

「所以話～都係搵返個成熟穩重既男人保護下～愛護下～寵下～錫下好～～～」Kelly一副期待樣...

搵返個成熟...穩重既男人...保護下...愛護下...寵下...錫下...

「好野～有野食～呢道D菠蘿油好出名架～快D試下～」Kelly一口就咬左啖菠蘿油...

『哦...哦...』我拎起個菠蘿油...望下...望下...呆下...呆下...

我...又可唔可以做得到...做到好似Kelly口中既...成穩重型男人呢？