《情困之時，我遇上了自稱情性的情聖》: [Case 05－已讀不回] PART 05
“叮噹 叮噹”
當我仲迷迷糊糊咁瞓喺張床既時候...
“叮噹 叮噹 叮噹”
我喺夢中好似聽到有門鐘聲...
“叮噹 叮噹 叮噹 叮噹”
係夢境？
“叮噹 叮噹 叮噹 叮噹 叮噹”
定係真實？
“叮噹 叮噹 叮噹 叮噹 叮噹 叮噹”
好似係真實喎...
“叮噹 叮噹 叮噹 叮噹 叮噹 叮噹 叮噹”
仲要係越黎越真實喎...
“叮噹！叮噹！叮噹！叮噹 ！叮噹！叮噹！叮噹！叮噹！”
邊鬼個咁鬼早就撳人鐘仔呀？！
“叮噹！叮噹！叮噹！叮噹！叮噹！叮噹 ！叮噹！叮噹！叮噹！”
『黎喇黎喇黎喇！邊鬼個呀？！』我帶住睡意碌左落床之後，遊下遊下遊去開門...
「喂！成九點幾喇！仲未瞓醒呀？！唔好咁懶喇懶鬼！」我隔住道鐵閘都見到阿儀個臭屁樣...
『頂...放假就緊係要瞓多D架喇...唔係等幾時瞓呀？！』我打一打開鐵閘，轉身就走返埋床邊，攤返喺床上...
阿儀入左屋，閂返門後，行到黎我床邊：「起身啦！起身啦！起身啦！起身啦！唔好咁懶啦！」
阿儀一路拉我，又一路搖我...
『丫...唔好搞啦...唔好搞啦...你俾我瞓多陣啦好唔好...』我就俾張床吸住左...
「死懶鬼快D起身出去行下啦！」阿儀仲要繼續搖...
『唉呀...行乜鬼姐...出面咁多蝗...根本就唔係人行架啦...』自從連我地屯門都淪陷之後，香港已經唔適合人行了...
「去邊都好啦～總之唔好懶喺張床道啦～快D起身！快D起身！快D起身！」阿儀仲係唔肯放棄，喺咁搖我...
『唉呀！好喇好喇好喇好喇好喇好喇！醒喇醒喇醒晒喇！』再俾阿儀咁搞落去，根本就無可能再瞓得返...
「好野～～～快D去梳洗梳洗！」阿儀一拉起左我，就推左我入廁所...
唉...點解會咁...只係想放假瞓多陣姐...都俾人上門鏟醒...
唉...點解我會識到D咁既朋友架？
唉...係唔係痴線架...
我一路喺個廁所梳洗，阿儀就一路喺出面口噏噏咁：「好心你就執下間屋啦！亂七八糟咁！食完個杯麵又唔Dom！著過既襪又四圍Dom！」
『有時間執先得架！』我就一路洗住個頭，一路嗌返出去...
之前就話珮琳會久唔久都上下黎，幫我執下屋姐...
而家同珮琳鬧左交，機都唔應下...有鬼人幫我執咩...
「有時間瞓覺！無時間執屋！」阿儀仲係死唔斷氣咁...
有時間緊係要瞓下覺架啦...有時間都唔瞓下覺...咁等到幾時先有得瞓丫？
「好亂呀！好亂呀！好亂呀！你D嫩模鹹書睇完就唔好四周放啦！有無搞錯呀！打完丁既紙巾就咁放喺地下就算？！好心你就掉入廁所沖走佢啦！」阿儀仲係口噏噏咁...
咩打完丁既紙巾呀？！前兩晚鼻敏感咋我！
唉...都係廢鬼事解釋咁多…認認真真沖埋個涼好過...
我一於唔理阿儀喺出面噏乜～好好享受下沖個暖水涼既時光～
當我沖完個靚涼之後...
「有無再沖得耐D呀？！沖成半個鐘咁耐！我屋都幫你執完喇！」阿儀叉住條腰，谷起塊面豬登...
『岩岩瞓醒丫嘛…係慢D架喇...』我抹下抹下個頭，望一望間屋…
又真係執得幾整齊喎衰鬼～
你又真係唔好睇阿儀成日都咁大頭蝦～佢做起家務上黎，又真係有板有眼架喎～
所以話，有時朋友真係要互相幫助先得既～
我總算無交錯阿儀呢個朋友啦～
「喂！你望夠未丫？仲唔快D去換衫！」阿儀推到我埋去個衣櫃前...
『得喇得喇得喇！你擰轉身唔好望過黎丫！廢事俾你睇蝕！』叫鬼我租呢間屋咁鬼細咩...一眼就睇晒喇...
「車～你有鬼野俾人睇咩～扮晒大支野咁～」阿儀得得戚戚咁行去另一邊...
哎呀呀！你個衰妹呀！
由中學到而家，都未聽見過你話有拖拍既！
慌你唔係連男人既JJ都未親眼見過咩？！
扮晒見慣大場面咁！
好！算！我就唔同你計！
免得提起你既傷心事～
簡簡單單咁換返套輕便裝～Set返個頭...
『行得喇～』我就同阿儀出門行街街～
同阿儀落到樓，第一時間唔係話要去食返個Brunch先...
而係...
『做乜拉左我黎書局呀...』野都未落肚，睇乜鬼野書呀又？！
「哎丫～今日冬甩有新書上架丫～所以要第一時間狗衝黎買返兩本先～」阿儀極速走去“新書推介”既櫃檯前搵下搵...
『又係嗰個冬甩...你真係悶唔悶架？』我冷眼望一望阿儀...
「文藝既野，你識條鐵咩～～～嘩嘩嘩！得返幾本咋！要揀返兩本四四正正先～」阿儀喺幾個?妹仔身邊揀下揀...
睇住阿儀眼中只有冬甩既背影...我真係望唔透...
其實嗰個冬甩又有乜咁巴閉呢？
咪又係嗰D只會用文字去迷惑人心既偽文青～
老老豆豆，你地呢D所謂既作家寫到點樣天花龍鳳都好，咪又係呃D無知既讀者幫你上位～
Facebook專頁十幾萬個LIKES咁又點？代表D乜？
代表你好識得利用文筆去呃人錢囉～
講真嗰句，你手寫既文字、故事、道理，又有幾多係真人真事？又有幾多你自己係做得到？
所有所有既，都只不過係你捉得緊嗰十幾萬人既心～
寫佢地想睇既野～佢地FF既野～
事實上，你都係一個為左錢而滿足部分人需要既偽君子姐～
「好彩仲有兩本係新新淨淨～靚靚仔仔架姐～喂～你買唔買返本丫？」阿儀好興奮咁隊一隊本粉藍色封面既書俾我睇一睇...
我睇到本書封面寫住《完美男友》…
『我無性趣...』屌你咩...男人老狗睇本完美男友托柒呀？
「一D品味都無架你～算～我自己買～」阿儀攬住兩本粉藍色封面既《完美男友》擺下擺下咁行...
『點解要買兩本呢？』我打量下阿儀...
「一本要黎睇～一本要黎收藏架嘛～細路仔唔識野～」阿儀甜絲絲咁笑一笑後，又冷眼望一望我...
呃...死忠就死忠啦...
同阿儀買完書之後，我地終於都有機會食返個Brunch～
坐喺太興入面，今日都唔算係多人～
平日丫嘛～平日放假真係好D既～
起碼蝗蟲都無咁多～
「食D乜呀？！」我同阿儀一坐低，個火爆阿姐就行埋黎問我地食乜...
『一個A丫...凍奶茶...』成個餐牌，都係差唔多咁上下既野...
仲要鬼撚死咁貴…
「一個C丫～凍檸賓～」阿儀仲係好開心咁，望住手中本《完美男友》…
個火爆阿姐單都唔覆，就轉身離開...
呢個火爆阿姐都喺道做左好幾年...脾氣都仲係咁臭...
點解唔撚炒鳩左佢架呢？
反正而家越黎越多好似呢個火爆阿姐咁既大媽入侵香港架啦～
炒鳩左佢請過另一個唔係會更好咩？
分分鐘可能會人工仲平D～又任勞任怨D～
定係因為覺得就算係請過個，都係一鳩樣呢？
係都唔出奇丫～
呢D新來港既侵略者都唔撚願做架啦～
最好日日都食綜援～等我地D香港人養～
反正大部份既香港人都Who Fucking Care架啦～
就好似面前既阿儀咁，只係專注喺佢面前本《完美男友》…
阿儀已經急不可耐又小心翼翼咁撕開封套...咬住唇咁細味書中內容...
『喂…你唔係已經喺紙言上面睇左好幾百萬次喇咩？你而家仲睇乜鬼姐？』我冷眼望住阿儀...
「點同姐～拎住本書細味，同你拎住手機睇係唔同感覺架～」阿儀連眼尾都唔望下我...
我開始覺得，我今朝應該唔鬼理阿儀，繼續瞓喺張床上好過...
出到黎就係掛住睇書！都唔理下我既！
咁捉我出黎把鬼咩？！
『唉～我就真係唔鬼知嗰個冬甩有乜鬼野咁吸引～』冬甩嗰Page喎～睇過啦～
我反而覺得情性仲好睇過佢～
情性講D野，可能係直D，難聽D...
但起碼都叫一針見血丫～
而且仲好著地添～
唔似得嗰個冬甩咁...講D野鬼咁離地...
完美男友？都痴撚線既～
俾你遇到個似返個人丫，你都執啦～
仲話乜春完美男友？！
只見阿儀好認真咁望住我...
『喂…喂喂…唔好咁望住我啦...唔鍾意既...唔講囉...』我好似踩親阿儀條尾...
「你知道嘛？冬甩佢...花左好多時間...用左好多心機...犧牲左好多好多…先有今日咁多Fans咋...」阿儀一面憐憫樣...
『呃...』望住阿儀呢個憐樣...搞到我都唔係咁好意思...
「你知道嘛…寫作呢條路，一D都唔易走呢...尤其喺香港...無人識你既時候，靠寫作係搵唔到食...好辛苦咁挨住窮去寫...寫足幾年...終於挨到有返少少名氣...但只靠版權稅，又唔係多…」阿儀講到想喊想喊咁...
『呃...』咁邊鬼個叫你要喺一個毀滅夢想既社會裏追尋夢想姐...
「我由冬甩佢開設專頁開始...一直支持佢...一直睇佢既文章...睇佢既故事...由一百個Likes都無...睇左佢五年...五年累積到十六萬個Likes...其實真係一D都唔容易架...」阿儀講到就快喊出黎...
『呃...』五年時間...其實真係唔算短...
要追尋一個唔知會唔會到達到既夢想...期間...真係會好絕望...
「所以...我見到冬甩有而家既成就...我作為佢既死忠...真係好興奮～又好安慰架～」阿儀擦一擦自己既眼淚…
『嗯...我明...』我諗我...真係明既...
記得男神子華講過：「一個偉大既藝術家只有死後才會受到世人既尊重，而我比起D偉大既藝術家仲要偉大，因為我死後都唔會受到尊重！」
我諗...喺香港搞文化...搞藝術...搞創作既...個個都好似子華所講咁...真係預左死後都唔會受到尊重...
好現實咩？
未算...
更現實既係...又有幾多人可以好似子華咁...有咁多人聽到佢講呢一番話呢？
同阿儀嘆完個Brunch之後，阿儀話要去買模型喎～
係丫～你無聽錯丫～阿儀係話去買模型丫～
或者你仲會猶豫，一個女仔竟然會去買模型？
無錯...阿儀就係一個咁宅既女仔～
我有上過阿儀屋企，佢真係有個工作間，專係用黎砌模型，為模型噴油上色～
而阿儀玩模型既技巧又真係到達大師級既境界～
所以話...阿儀真係非一般既宅架～
望住阿儀拎起部MG版既Strike Freedom，我不禁又要多口了：『我真係唔係好鍾意基拉囉...』
我個人就鍾意真飛鳥多D...
但就係唔知點解有咁多人都鍾意搶人女友最叻既基拉囉！
開口埋口都喺到講乜乜正義...乜乜道理...
挑你媽的，搶人女友好撚正義咩？
幾時搶埋阿斯蘭部無限正義黎揸呀正義撚？！
「我就係鍾意基拉佢夠靚仔丫～部Strike Free都型過Destiny多多聲啦～你睇下～你睇下～Strike Free有超級龍騎兵架～～～Destiny有無丫～有無丫～」阿儀擰左個盒邊俾D浮遊砲我睇...
『浮遊砲就浮遊砲啦！超乜鬼野級龍騎兵姐？！』扮晒蟹咁...
「丫～你好似好唔順超咁喎～」阿儀一對挑機眼咁望住我...
『咁係丫嘛～人地Destiny既設計係萬能型！』我拎起盒MG版既Destiny，『你睇下你睇下！近戰有掌部光束砲、光束迴旋鏢、光束巨劍！中距離有高能量光束步槍！遠距離仲有高能量長射程光束砲添！防禦方面仲有反光束盾！我都仲未計佢個光之翼丫！真係要打起上黎，基拉收皮啦！』
真係講起就扯火！
飛鳥同基拉咁大仇口，最後竟然唔係佢地兩個黎返場生死決！
仲要握手言和喎～
點講都唔通啦！
「講就兇狠！有本事既話...隻揪丫～」阿儀得得戚戚咁既樣...
『隻...』隻揪？！
同阿儀買完部討厭既MG版Strike Freedom之後，我就俾阿儀拉左黎...
『機舖？！』我望住唱梗錢既阿儀...
機舖...都好耐無黎過喇...
而且...間機舖都變細左...
「隻揪丫嘛～緊係黎機舖架啦～喂！唔好扮晒野！快D唱錢！唱夠一百蚊啦～夠你輸架喇～」阿儀唱完錢之後，偷走左我個錢包，仲要喺我個錢包裏面拎左張一百蚊紙出黎...
『喂喂…兩蚊夠打贏你啦！』駛鬼成舊水咩...
事實上...屯門就好似執剩呢一間機舖...
「而家仲邊有兩蚊機打架？！」阿儀將載有一百個一蚊既膠兜放到我手上...
原來...喺無聲無息之間...世界已經變左...
喺讀書既年代，屯門仲有好幾間機舖...
以我所知，至少都有六間～
聽佢地行內人講，好似分別係三個大老闆擁有～
嗰陣時，機舖都真係幾熱鬧～
一大班人同一大班人喺道互相挑機～
車有車挑～拳皇有拳皇挑～高達有高達挑～
喺嘈雜既喇叭聲之中，仲夾雜左好多歡笑聲～好多起哄聲～
但由幾時開始，機舖呢個行業開始式微呢？
我諗...大概係家用遊戲機可以上網連線對戰開始...
「我用Strike Free～你用Destiny～就睇下邊個揪贏邊個～」阿儀得得戚戚咁坐喺部Gundam Extreme vs. 唔知乜野 boost前...
而家高達出到第幾代丫？我真係無留意好耐...
不過...重要咩？
唔重要...一D都唔重要...
因為...
『唔好睇少我！想當年，我都係橫掃柏麗機舖高達界既...』我都未將我個朵撻出黎之時...
「入錢喇！咁多野講～」阿儀就幫我入左八蚊落部機道...
喂！仆你個街丫...一舖機都要八蚊咁貴架咩？！
好彩唔一定要出卡先玩得到...
出張卡又要五十蚊...
打一打舖機...真係閒閒地都唔見幾百蚊...
唔怪之得而家D毒撚寧願花四千幾蚊買部PS返屋企上網同人揪好過啦...
不過...
唔係問題既...只要唔輸既話...
只要Keep住連勝既話...
八蚊都可以打足幾個鐘！
阿儀揀好左部Strike Free…仲要用基拉做機師...
我睇到基拉個日文名都眼火爆！
『受死啦！基拉！！！』我亦都揀好左部Destiny，仲要用真飛鳥做機師！
喺Gundam Seed Destiny裏面，因為神筆加護之下，無辦法將基拉手刃...唔緊要！
今日就等我黎秒殺呢個專著紅鞋既死仆街啦！
而事實往往並不如人意...
被秒殺既…係我...
阿儀不費吹灰之力...
“轟”...我部Destiny就被阿儀部Strike Free砍爆左...
「入錢啦～」阿儀冷眼望一望我...
『呢舖唔計！』我又再貢獻出我既八蚊...
再揀多次Destiny…揀多次真飛鳥…
又唔駛一分鐘...
“轟”...我部Destiny就被阿儀部Strike Free再次砍爆...
「入錢啦～」阿儀冷眼望一望我...
『呢舖唔計！』我又再貢獻出我既八蚊...
再揀多次Destiny…再揀多次真飛鳥…
又唔駛一分鐘...
“轟”...我部Destiny就被阿儀部Strike Free又再次砍爆...
「入錢啦～」阿儀望都唔望我一眼...
『呢舖唔計！』
如事者入左好多次八蚊...
又唱左好幾次一百蚊...
“轟”...次次都係我部Destiny被阿儀部Strike Free砍爆...
點解丫...點解丫？？？
點解真飛鳥都係要輸俾基拉架？！
點解勾義嫂既仆街仔唔得到應有既懲罰架？！
點解我想替天行道都唔得呀？！
點解我又要咁傻，洗左成五百幾蚊同阿儀癲呀？！
點解呀？點解呀？！？！？！
主角大撚晒咩？！？！？！
唉...
「認輸未丫～～～」阿儀得得戚戚咁望住我...
而家佢個死人樣，真係十足十基拉同真飛鳥握手嗰幕...
扮乜春正氣凜然，大方厚道？！
明明就係貓哭老鼠假慈悲啦...
『認喇認喇...』不過唔認都唔得啦...
叫鬼我技遜一籌咩...
而事實上...以前之所以橫掃柏麗機舖高達界，都係因為拍住阿儀...
仲好記得以前放左學，我同阿儀返到屋企換左衫，就會落去柏麗機舖打高達～
而阿儀用親大機，都可以Carry全場～
我呢D只要補住條命仔唔死，阿儀就可以大殺四方～
好多時阿儀仲有時間黎救我添～
所以講真句，我又點會夠佢打丫～
「好啦～乖乖地認輸就一齊打電腦啦～」阿儀喺自己既機面前拎起八個一蚊～替我入～
阿儀就係一個咁樣既女仔～
總係鍾意D...男仔既玩意～
所以喺中學時期，阿儀除左迦迦呢個好姊妹之外，就無乜其他女仔朋友～
阿儀身邊既，大多數都男仔Friends～
開口埋口都係傾有乜動漫睇～有咩新Game出～有乜新既模型出～
平日放學或者假日，一得閒就係去行模型店丫～Game舖丫～再唔係就落機舖打機～
絕對唔會走去飾品店睇下D呃錢飾物，或者去H&M睇下D著唔夠幾次就甩色既爛衫～
阿儀總係好似好男仔性格咁～
或者正正就係男仔性格～縱使身邊有好多男仔Friends，但都唔聽見有邊個男仔對阿儀有意思～
相對地，我都唔聽見阿儀話對我地身邊既男仔有意思～
唔知呢～真係唔知呢...
或者係啦～或者我地真係當左阿儀係...兄弟啦...
或者真係啦...