《情困之時，我遇上了自稱情性的情聖》: [Case 05－已讀不回] PART 06
同阿儀打左兩、三個鐘頭機之後...
「係時候去買飛睇戲喇～」阿儀拍拍屁股拍拍手，起身彈下彈下出門口...
『睇戲？睇乜戲？』點解我好似無聽過阿儀話今日出黎係想睇戲架呢？
「睇EVA丫嘛～～～前兩日上左畫喇～難得今日放假，緊係要去睇啦！」阿儀一對期待既眼神...
EVA…
『而家先買，仲有無位架？』又唔一早買定先喎...
「我地呢D即興架嘛～邊會買定先架姐？況且今日係閒日，仲要係中午喎～邊鬼道有人睇先得架～實有位既～」阿儀一副大安旨意咁...
『而家係下午喇...』一D時間觀念都無...
「係喇係喇～行啦行啦～」阿儀就拉住我黎行...
呢個阿儀丫，成日都係咁無計劃既...
不過算啦～有時無計劃都有無計劃既好既～
Surprise丫嘛～
去到戲院...
又真係無乜人買飛...
而下一場正正就係十分鐘之後就開始！
最重要既係...真係無乜人睇咋喎～
成個場都係得六、七個位俾人買左...
我地兩個仲可以買到個正中間既靚位睇添！
「我都話實無乜人架啦～」坐喺我身邊既阿儀食住爆谷得得戚戚咁講...
『係丫…係丫…你叻晒喇...』講真嗰句...呢D戲又有幾多人會入戲院睇丫？
喺日本既話，話唔定真係場場都爆滿～
但喺香港？D毒男寧願BT算啦～
香港成日都講到自己點樣鍾情日本動漫～
但一講到要洗錢，好多毒男都係鳩縮～
唔係上大陸網睇，就係BT返黎～
明明戲院有上，又扮晒唔知道，留意唔到～
你真係咁毒既話，又點會唔去留意丫？
不過又講真一句，EVA呢套野...真係睇夠喇...
EVA呢套野，已經重製左好幾次...補完左好多次...
但補完左咁多次，總係有好多Bug...
有好多Bug都唔緊要喇，最慘係次次都爛尾丫嘛…
做咩姐而家？
次次都要我地自己腦內補完丫？
等我地補足十年之後，又出多次補完版...
但補完版之中，又有好多解釋唔到既情節出現...
又再次爛尾...
又再次要我地自己腦內補完...
又變成無限補完地獄...
到時真係要叫定個孫燒個終極結局俾我先得囉～
所以話，呢套野真係睇到厭～
但又好奇怪，坐喺身邊既阿儀好似睇到著晒迷咁...
一個女仔睇EVA睇到著晒迷？！
真係估佢唔到...
或者呢D就係叫做...死忠啦～
「其實我真係好鍾意渚薰架～～～」同阿儀睇完套再一次爛尾既EVA之後，阿儀就一輪嘴咁噏...
『好鍾意唔鍾意，鍾意隻怪物？！』我冷眼望一望阿儀...
「咩怪物丫？！係使徒！係使徒呀！」阿儀谷起塊面豬登...
『對我地人類黎講，使徒咪即係怪物囉...』我又冷眼望住阿儀...
「使徒既野，你識條鐵咩？！仲有丫～渚薰係有自由意志架～」阿儀對眼好似識發光咁...
應該係佢副眼鏡反光先岩...
『係喇係喇…不過我都係鍾意綾波麗多D～』我又回味一下綾波麗既美～
「由中學既時候開始，你就一直話自己鍾意無口系既綾波麗架喇～」阿儀冷眼望一望我...
『呢D叫冷艷呀！你識條鐵咩？！』我篤一篤阿儀個額頭！
「係喇係喇～我識條鐵丫～好肚餓喇～去食野咯～」阿儀拉一拉住我。
『嘩！你咩人黎架？頭先先食左咁大筒爆谷，而家又話肚餓？！』阿儀真係好大食架！
不過又食極都唔肥喎...
定係肥左喺D我見唔到既地方呢？
「我都未話你呀！你仲好講喎！頭先筒爆谷係你食既多囉好唔好？！」阿儀又谷起塊面豬登...
『係咩…係咩…』又好似係喎...
「況且，女仔有兩個胃架嘛～」阿儀托一托副眼鏡...
『女仔既第二個胃係用黎食甜品架囉好唔好？！』所以話，我真係唔覺得阿儀係女仔黎架！
「是旦啦～是旦啦～」阿儀一副毫不在意既樣，拉住我行...
雖然話，阿儀真係唔多似女仔～
不過...阿儀既性格又真係令人幾舒服～
同阿儀傾親計，講親野，都唔駛點諗～
有嗰句就講嗰句～
鍾意講乜就講乜～
又唔怕會講錯野～
又唔怕會得罪佢，激嬲佢～
阿儀本身就唔係一個易嬲既人～
更加唔駛煩激嬲左佢要諗點樣氹返佢～
就算真係踩中左佢既死穴，只有過十五分鐘，佢就會無晒事咁依舊同你有講有笑～
同阿儀相處左咁多年，都真係好開心～又好自在～
一直都係...一直都係...
一個好難得咁了解自己...咁夾自己既女仔...
雖然話我地成日都頂嘴，不過我地又真係好珍惜彼此之間既關係～好珍惜對方～
「好好搵過個...會懂得珍惜你架啦～」情性...
點解喺我既腦海之中，會無啦啦閃出情性既呢一番話既？
點解會喺呢個時候...諗返起...情性既呢一句話既呢？
「喂喂～行快兩步啦～我就快餓死架喇～」
『咁食乜丫？』
「Outback啦～」
『你係唔係真係咁大食丫？！』
「鋸個扒又有幾大食丫？」
『鋸扒都唔叫大食，點先叫大食丫？』
俾阿儀拉住黎到Outback，呢個鐘數都無乜人～
我地等都唔駛等，可以直接入去～
而我連凳都未坐熱，阿儀就已經拎起份Menu...
「唔...要兩個凱撒沙律～兩個安格斯肉眼牛扒...一個要五成熟～另一個要七成熟～餐飲同甜品就轉頭先嗌啦唔該～」阿儀好快咁同個侍應落單...
『喂…做乜自把自為咁幫我嗌埋野食？』我冷眼望一望阿儀...
「你有乜野特別想嗌丫～嗌黎嗌去都係嗰D野～鬼咁悶～」阿儀回返一對冷眼俾我...
乜咁樣好悶咩？
呢D叫專一呀！唔識野...
「唔怪得之你女朋友都唔睬你啦～悶到死～」阿儀繼續以一對冷眼啤住我...
『喂…唔好咁過份喎...好Hurt架喎...』講到咁直接...直頭好似一刀插入我心咁喎...
「咁係丫嘛～我有講錯咩？點丫～佢真係仲未睬返你丫？」阿儀拎一拎盒MG版Strike Freedom出黎望下望下...
『唉...未丫...都仲未肯睬返我丫...』唉...講起心都灰...
「你有無跟住我所講咁，Keep住晚晚Send個Message俾人架？」阿儀仲係好專心咁欣賞佢盒MG版Strike Freedom…
『緊係有啦！我有Keep住晚晚Send架！』都已經Send左一百二十三晚喇！都仲係無任何回覆囉...
「咁丫...老老實實喇...佢既性格係唔係好似綾波麗嗰D咁架？」阿儀望左我一眼之後，又專注返喺盒MG版Strike Freedom上…
『綾波麗邊D咁呀？』我拍一拍阿儀手上盒MG版Strike Freedom…
「好Cool無感情嗰D咁丫～」阿儀拍一拍開我隻手，唔俾我搞佢盒MG版Strike Freedom…
『佢丫...又唔可以話係好Cool無感情既...只係...有時會好專注喺佢手上既工作姐...』都唔止係有時...
係好多時...
「哦？」阿儀好似唔係好明我講乜咁...繼續注視返喺盒MG版Strike Freedom上…
『即係佢一有野做，就乜都唔理嗰隻囉...喂呀！你可唔可以專心D聽我講野架？！』我再拍左幾拍阿儀手上盒MG版Strike Freedom…
「哎丫哎丫！我咪好專心咁聽梗你噏乜囉！」阿儀再次拍一拍開我隻手，收返好盒MG版Strike Freedom…
真係激鬼死我！
成日就掛住盒Strike Freedom！
『有時候佢一寫起野上黎，就乜都唔會理...全個世界就好似得返佢自己一個咁...點叫佢都唔會應...連“哦”都廢事“哦”嗰隻...所以當我知道佢寫梗野既時候，我都唔敢打擾佢...怕佢會發脾氣...』可以既話，我都會迫免激嬲珮琳...煩住珮琳...
「係丫？唔知係唔係個個作家都係咁架呢...」阿儀又諗左一諗...
講真嗰句，我都唔知係唔係個個作家都係咁...
個個作家既世界就只有自己...
就只有自己既世界，先可以寫到好既文章...
珮琳都有曾經講過，有D時間係需要去攞靈感～
擺完靈感返黎，就要靜靜一個人去FF成個空間...成個架構...成個故事出黎...
珮琳亦都曾經話過，劉青雲得獎時嗰句“每次當我揸住太空船，飛到宇宙唔知邊度，你總有辦法令我安全返地球。”其實真係好到肉...
你要知道，演戲又好，寫故都好，其實好似揸住太空船，喺漆黑又無盡既FF空間裏面飛...
一個唔小心...真係會唔識返落黎地球...
「劉青雲就話有佢既老婆郭藹明帶佢返黎姐...咁我呢？」
我係唔會忘記，當晚珮琳抬頭仰望著繁星閃耀既夜空，講出黎呢說話...
「兩份凱撒沙律～」靚仔侍應放低兩份沙律之後...
「好野～有野食～開餐開餐～好肚餓呢～～～」阿儀就急不可耐咁開動～
望住眼前既阿儀...
唉～～～你話如果個個女仔都係咁簡單你話幾好～
簡簡單單睇下書～打下機～睇下動漫～瘋狂食自己鍾意食既野～
乜都唔駛諗，又唔駛諗佢諗乜咁，幾好～
「不過講真句...佢係你想要既...定係需要先？」阿儀咬住塊菜問...
『想要...需要？！』突然我唔係好明阿儀想問乜...
乜野想要...？乜野需要...？
「你要知道...想要既同需要既係好唔同...想要...係你想得到...需要...係你不可缺少...」阿儀諗左一諗...
想要...係你想得到...需要...係你不可缺少...？
「即係...你想要架Destiny，但實際上你係無能力去控制佢...無辦法Carry全場...你需要既係一部渣古...你係一個揸細機既機師...一個Support型既機師...去Support架大機殲滅對方～」阿儀點一點頭...
我係一個...揸細機既機師...一個Support型既機師...？
或者...真係都唔出奇...
要我揸大機...我總係好快死...又殺唔到敵...
但要我揸細機既話，我既生存機會就會大左...仲會製造到好多機會俾大機去殺敵...
想要...需要...
珮琳係我既需要？定只係想要？
「唉～睇你咁蠢既樣，都係唔明我講乜架啦～食野罷啦～」阿儀擰擰頭...
『咩蠢丫？咩唔明架啦？我都不知幾醒囉好唔好？！唔好以為自己睇過下幾本爛鬼愛情小說就以為自己講野好高深！我有個作家女朋友添呀！』
「咩丫咩丫？咩爛鬼愛情小說呀？！冬甩寫既唔係好似你個港女女友寫嗰D咁爛架囉好唔好？！」
『咩丫咩丫？你話邊個港女呀？』
「咩丫咩丫？失蹤港女女友！」
『咩丫咩丫？你講咩丫？！』
「咩丫咩丫？我講咩唔好丫？！」
同阿儀咩黎咩去咁食完一餐之後...
「咁你就好好地反省下啦～」阿儀拍一拍我肩頭...
『反省D乜呢又？』我冷眼望一望阿儀...
「想要定係需要丫！」阿儀好認真咁望住我...
想要...需要...
「但千其唔好諗我係你既需要喎！我心中有冬甩了～」阿儀合埋對眼，擰擰頭。
『痴線啦你！』我會鍾意你既話，真係同鍾意個男人無分別...
「你咁諗就最好啦～好喇～我都要返屋企砌我盒深愛既Strike Free喇～」阿儀攬一攬住盒MG版Strike Freedom…
『你唔好砌到唔願瞓...聽日唔知醒起身返工呀...』我冷眼望一望住阿儀...
「得啦得啦～有你Morning Call丫嘛～好啦～拜～」阿儀向我揮揮手...
『拜...』我向阿儀揮揮手...
望住阿儀既背影越行越遠...
唉...呢個阿儀丫...成日都要依賴我...要我照顧...
你都係快D搵返個人，照顧下你啦...
想要...需要...
冬甩會係阿儀既想要...定係需要呢？
想要又好，需要都好啦～
我總係唔相信，阿儀可以同到個大作家一齊～
人地咁出名～幾時輪到阿儀丫～
不過又唔可以咁講喎...
我又何嘗唔係...同一個女作家一齊？
點同呢～珮琳佢都唔露面既～
就算係Facebook又好～IG又好～就只得背影照～
又從來都唔搞簽名會～
佢唔講我都唔知...原來佢係一個紅遍網絡既女作家...
不過...都要靠一個屎忽撞棍既機會既...
無錯喇...喺一個平凡既日子...一個平凡既時間...一間平凡既Starbucks...遇上一個不平凡既...你...
我做乜無啦啦講到咁感性？！
睇黎…我都已經俾珮琳感染左...
當珮琳投入喺FF之中之時，總係會咁感性呢...
珮琳...
喺暗黃色既街燈照射下，我一個人慢慢行...
我又一個人慢慢行去七仔...
喺無情既北風吹送下，街上既情侶都攬到實一實...
攬到實一實...
岩岩同珮琳一齊既時候，佢都會咁樣攬實我...
佢話...佢好怕冷...
尤其係一個人既時候...
你又點會估得到，一個咁嚮往自由既人，原來都會有怕凍既時候...
珮琳話...未試過溫暖，係唔會覺得凍...當你試過溫暖，再唔會想凍...
珮琳喔珮琳...呢幾晚會係入冬以黎，最凍既晚上...
你有想我的溫暖嘛？
入到七仔，拎支生力去櫃檯...
「咦～先生又係你丫？你晚晚都係呢個時候買酒飲架喎～」個男店員親切咁同我講...
『哦...係丫係丫...習慣左丫嘛…』我再望一望呢個差唔多晚晚都見到既男店員胸口前個名牌...
尹...曉揚？
呢個同我咁上下年紀既男店員...
又會咁岩既～原來大家都係姓尹～
「係丫…見你晚晚都黎幫襯，呢支酒就我請你既～我地出去坐陣，一齊出去飲啦～」呢個姓尹既男店員就行左去個雪櫃道，拎多支生力出黎...
『會唔會唔係咁好意思丫...』平日我都好少會受人恩惠...（除左阿儀...）
「無所謂啦～只要你賞面既話～」尹先生打左個眼色...
『咁...恭敬不如從命喇...』我帶住笑意點點頭。
「Zoe～幫我睇睇舖先～我出一出去出面坐陣～」尹先生同個年輕既女店員交低一句後，我地就出到去，坐喺平時都坐開既石凳上...
估唔到，平日呢個時候都係自己一個飲悶酒...
今晚身邊多左個男仔一齊飲...
總係好似有D...HEHE？！
「係呢～平時都見你一個坐喺道飲悶酒～都飲左好多晚架喇喎～為左D乜丫？」尹先生敲一下我支酒，飲一口...
『唔...我同女朋友鬧左交...瞓唔著咪諗住飲D酒好瞓D...點知就變成習慣～』我又飲一口...
「係丫…為情所困丫...」尹先生若有所思咁...
『嗯...都可以話係既...男人飲酒...唔係為錢銀，就係為女人架啦...』男人其實真係好單純架咋...
「女人...唉...有時真係唔明女人諗乜...」尹先生長嘆一口...
『睇黎你都係為女人煩惱喎...都係同女朋友鬧左交？』我又敲一下尹先生支酒，飲一口...
「同女朋友鬧交？我都想係同女朋友鬧交～首先要有女朋友...」尹先生諗左一諗，又飲一口...
『要有女朋友其實唔難～追咪得囉～』全能既高登仔成日都咁講架啦～
「話咁易咩...連講句野都嚇走人咁...或者人地連朋友都唔想同我做呢...」尹先生一面難過咁飲一飲...
『唔...朋友都未算？』我打量一眼尹先生...
「唔...可以話只係萍水相逢...連點頭之交都唔算...」尹先生無奈咁擰擰頭...飲左一飲...
『唔...萍水相逢...』我又諗左一諗...飲左一飲...
就好似...我初初遇到珮琳咁？
『或者...要再多D時間...』就好似我一直坐喺珮琳對面...一直等佢留意到我...
「要再多D時間...」尹先生諗左一諗...飲左一飲...
『或者...要放膽D...』放膽D去打開心窗...
「要放膽D...」尹先生再諗左一諗...飲左一飲...
『或者...要放膽D解開情困...』
「要放膽D解開情困...」
情困...？！
『或者...你可以請教下情性喎...』我突然諗起情性呢個人...
「情性？」尹先生一頭問號咁望住我...
『嗯...網上面有一個人話所有情困也可以一一解開～』雖然我就唔係好覺得佢幫到我D乜...但推介下俾尹先生都唔錯丫～
或者又真係可以幫到尹先生解開情困呢～
「係丫…網上面...真係有D咁既人架？」尹先生望住手上支生力...
『嗯...希望佢幫到你啦...』我都望一望住手上支生力...
「嗯～希望啦～」尹先生敲一下我支酒...
我地一飲而盡～
同尹先生吹多一陣風...吹多一陣水...
「我都要返入去打理下間舖喇～唔係就做死嗰個女仔架喇～」尹先生起一起身，指一指住七仔入面正手忙腳亂既...Zoe？
好似係叫Zoe...
『嗯～多謝你支酒～』我向尹先生揮揮手...
「唔多謝～我多謝你陪左我咁耐先真～你都唔好坐咁耐喇～天氣凍丫～」尹先生背住我揮揮手...
嗯...天氣凍喇...我都唔可以坐得太夜...
不過...
仲要做埋每晚都要做既事...
我拎起部電話...Send第一百二十四個Message...
眼定定咁睇住你上線...睇住你送個雙藍剔俾我...睇住你離線...
第一百二十四日了...已經係第一百二十四晚了...
我已經...習慣了...