《情困之時，我遇上了自稱情性的情聖》: [Case 05－已讀不回] PART 04

坐喺一間以黑色為主既咖啡店...我諗應該可以話係咖啡店掛...

佢呢道個店名係叫做“Whirling Coffee”。

咖啡店...我同咖啡店都好似真係幾有緣呢...

之前識到珮琳都係因為Starbucks Coffee...

而家想搵人幫手，就黎到呢間Whirling Coffee…



搵咩人？幫咩手？

講起上黎都真係有D神推鬼㧬...

是咁的...

昨晚，同阿儀仲有迦迦食完晚飯之後...

「咁下次見啦～拜拜～」迦迦同我地揮揮手。



『嗯...下次見～』我同阿儀向迦迦揮手道別...

「喂～你返去真係認真咁睇下冬甩個Facebook啦～」阿儀蹬起對腳，搭住我膊頭搖下搖下...

『我唔係無知少女呀...』我無咁容易俾呢D甜言蜜語氹到囉...

「咩無知少女呀？你咁講即係話我易呃姐？！」阿儀箍實我條頸...

我個膊頭就壓左埋去阿儀對小饅頭上...



阿儀胸前真係無乜肉…真係又宅又發育不良咁...

『喂喂喂喂喂…我抖唔到氣喇！』我掙一掙扎，鬆一鬆開！

費事俾你話我抽你水丫！

「冬甩講D野真係好有道理架！話唔定真係幫到你架！你就信下我啦好唔好？」阿儀托一托副眼鏡，谷一谷起塊面豬登...

『好好好...好好好...』老老柒柒，由中一識阿儀到而家，真係無一次可信...

講好左第二朝要佢叫我起身返學～點知佢就唔記得Set鬧鐘，結果要我叫返佢轉頭...

話左一人做一樣功課，第二朝交換抄～點知佢做左又唔記得帶...結果要將我嗰份俾埋佢交...變左我欠交...

考試範圍又抄錯，結果單憑我上堂聽書既記憶做好份卷...仲要偷偷地借埋俾佢抄！



到交Project就仲大件事！成份Data都打到亂晒！結果咪又係我幫佢通頂執返好...

所以話呢...你叫我點信得佢過呀？

「記住返去睇下喇！聽日見啦～拜拜～」送到阿儀返到屋企樓下，佢向我揮揮手...

『哦哦哦...聽咩日見姐...聽日Off呀...後日見啦...』我冷眼望一望阿儀...

「係喎…記錯左添...嘻嘻...後日見啦～」阿儀伸一伸脷後轉身彈入大門...

唉...真係信你一成，雙目失明...

不過既然阿儀極力推介左咁多次...我點都要支持下既...



尤其係喺我喺七仔買完支酒，坐喺張石凳上，拎出部電話，Send第一百一十二個Message...

等下等...同之前嗰一百一十一日都係一樣咁等...

等到你上線...等到你雙藍剔...再等到你下線...

我都已經等到苦無對策...

或者真係要...睇下D愛情專家有咩至理名言啦～

我飲一啖生力...打開個Facebook，撳入去阿儀...

頁面一打開，就見到阿儀讚左冬甩幾個Posts...

果然係忠實Fans～



我一路睇下，又一路碌下...

差唔多成版幾兩版都係冬甩既Posts...

果然係超級忠實Fans～～

不過阿儀讚親既，都係講女仔想男仔點點點...

女仔鍾意D點點點既男仔...

內文唔係話要千依百順...就係要無微不至...

十足十軍法咁...



大佬～呢D法則喺入伍之前就已經列明得清清楚楚啦～

唔駛而家又黎重溫一次嘛？！

好啦～我都係撳入去冬甩個專頁裏面，睇下有乜實用D既資訊...

當我一撳到入去冬甩個專頁，第一樣吸引到我視線既野唔係佢D圖片或文章...

第一樣吸引到我既係...

『情性？』我喺個“這個專頁讚好”嗰欄道...見到一個叫...“情性”既專頁...

情性…總係好似怪怪地咁...係情定係性？

點解會改個咁既名架呢？

不過又唔出奇既～

而家既資訊咁發達，秒秒鐘都有幾十億條訊息喺網絡上飛黎飛去～

你唔改個突出D既名，又邊道吸引到人地既目光呀～

而“情性”呢個名，又真係吸引到我去停留喺佢身上...

情性...情性...

我不自覺咁撳左入去情性個專頁裏面...

視窗一打開，有個置頂Post就寫到明話“只要你不是戀兄、搶男友、師生戀，所有情困我也可以為你一一解開。”...

『所有情困我也可以為你一一解開？！』我呆呆咁望住個芒...

所有情困...所有情困？

世上情困那麼多...呢個人竟然大口氣到話可以一一解開？

何許人也喔？

但就係因為呢個何許人有咁大口氣，又令我更加好奇...

好奇心之下，又真係令我想睇下呢個人，有乜本事可以幫我解開情困...

『好啦！就Inbox左你先！』

我喺個Facebook Messenger快快手手打左幾隻字：“我有情困”

唔駛過幾秒就有回覆！

我睇一睇個Message Box...係一個日期、時間、地點...

故乜鬼野弄？玄乜鬼野虛呀又？

喺個Facebook Messenger裏面講就唔得既？係都要約出黎面對面傾先得既？

而家咩年代呀？咁Out既？

D奇怪既人，係唔係特別鍾意搞咁多花臣野架？！

不過唔緊要啦～反正咁岩我就得閒～

我再飲一大啖生力...

“OK”

“到時見。”

咁爽快…係唔係真係咁神丫？

就等我睇真D你係唔係真係咁有料～

於是，我就係今日呢一個時間，黎左呢間名為“Whirling Coffee”既咖啡店中，等一個自稱情性既情聖出現。

坐喺呢間白色為主，被黑白相包圍既咖啡店中...整間咖啡店就只有一個女仔打理。

個女仔睇起上黎都幾靚女下...

眼大大...鼻高高...面尖尖...皮膚又夠白...對腳又夠長...

嗱！你地唔好誤會丫！

唔好以為我同一般既狗公都係一樣，一見到靚女就狗衝呀！

我個心仲係只有珮琳架咋！

只係...我只係覺得...一個靚女竟然都可以為一間咖啡店打理得上算唔錯...

都真係唔可以睇小而家D靚女...

呢個靚女會唔會係呢道既老闆娘？

真係唔知…

睇呢個靚女既年紀都只不過係廿歲左右...

如果話咁年輕就可以做到老闆娘既話，又太過FF～

但如果話係打工既...咁又駛唔駛咁俾心機呢？

而家打工既，個個都係搵啖飯姐～

邊鬼個會同你賣命咁笨柒丫？

你估真係搵好多咩？

睇住腦細揸住部瑪莎拉蒂四圍兜女，你自己就朝朝晚晚迫西鐵...

你仲甘心同佢打工幫佢搵錢？

咁都甘心既話，你唔係戇鳩，就係笨柒啦～

所以話，我硬係覺得...眼前呢個女仔...一定係同呢間Coffee有住千絲萬縷錯綜複雜既關係～

「你要既Espresso～請慢用～」個靚女店員放低左杯咖啡，向我點一點頭後...

『唔...唔該...』我都有D怕怕地羞咁點一點頭...

個靚女店員轉一轉身，條粉藍色短裙飄一飄起後離開...

嗱！都係嗰句呀！我唔係鹹濕人地丫！

我只係純粹欣賞！以欣賞既角度去望個女仔姐！

絕對無任何既非分之想架！

唉～都係唔好講咁多…飲返啖咖啡定定神先...

我飲一口Espresso...呢種味道...又勾返起我第一次喺Starbucks道見到珮琳時既情境...

珮琳丫...陸珮琳...我又想你了...

「好準時喎。」當我仲喺道回憶梗坐喺落地大玻璃窗隔離既珮琳之時，一把成熟既聲音突然出現！

我定一定神，望一望返前面，見到有一個貌似...古天樂咁既人坐喺面前！

呢一個既成熟，又穩重既男子...就係...情性？！

『你就係...』我都仲未將我要講既說話講完...

「嗯～我就係可以幫你解決情困既情性。」古天樂...唔係！情性帶住微笑點點頭...

呢個情性...就連笑容都十足十古天樂咁...

「你就係Timothy？唔知你有乜野情困需要解開架呢？」情性保持住古天樂式微笑望住我。

扮咩姐？

你係似古天樂，但可唔可以做返自己姐？

不過仔細D睇真D...眼前呢個情性...大約都只係廿六、七歲左右...

『係丫...我就係Timothy...我既情困...』我都仲未講完...

「你既情困，唔會係有關於戀兄、搶男友、師生戀架嘛？」情性打量下我...

『唔係…唔係～』講起又奇怪...

點解情性會在意係唔係同戀兄、搶男友、師生戀有關架呢？

「唔係就OK喇～咁有乜野困擾住你呢？」情性再次展露出古天樂式微笑望住我...

夠喇...扮夠喇...

『我...我同女朋友鬧左交...佢唔睬我...唔肯應我機...』我好似講到小朋友鬧交咁...

「咁兩個人相處，鬧下交都好平常姐～冷靜下就無事架啦～」情性輕輕鬆鬆咁點一點頭。

『都冷靜左一段時間...都有成四個幾月無睬過我喇...』四個幾月唔短既日子喇...

「四個幾月...一句話都無講過？」情性打量下我...

『一句都無...』四個幾月無聽過珮琳把聲...

「Message呢？一句都無？」情性再打量下我...

『只有我每晚Send一段Message俾佢，佢一句都無覆過...都有成一百一十二晚架喇...』一百一十二晚...我Keep住晚晚Send...亦Keep住晚晚等...但晚晚都等唔到佢既回覆...

「咁丫...」情性諗左一諗...

「你要既Espresso～請慢用～」個靚女店員放低左杯咖啡...

『唔該～』情性向靚女店員點一點頭後，靚女店員轉身離開。

原來情性都鍾意飲Espresso既～

呢D算唔算係英雄所見樂瞳？

「你有無試下由佢D朋友入手...打探下咁丫？」情性飲一口Espresso...

『我...我唔識得佢D朋友...』我都飲一口Espresso...

「一個都唔識？」情性困惑咁望住我...

『一個都唔識...』我擰一擰頭…

「你地拍左拖有幾耐丫？」情性繼續以困惑既眼神望住我...

『半年喇...』我地拍左拖都有半年時間喇...

「半年來，就連帶你去見下佢D朋友都無？」情性一頭問號咁...

『無丫…』我繼續擰擰頭...

「一次都無？」情性打量多我幾眼...

『一次都無...』我又繼續擰擰頭...

「唔…」情性諗左一諗…又飲一啖咖啡...

咁即係點丫？

情性都諗左好耐下…又飲再幾啖咖啡：「你都係搵過另一個會應機既人仲好啦...」

『下？！』我唔係好明情性既意思...

「你要知道...兩個人喺埋一齊...唔好話融為一體...最少都要融入對方既世界啦...」情性又飲一啖咖啡...

融入對方既...世界？

「你連佢既朋友都未見過...好明顯就係佢無俾機會你融入佢既世界啦...」情性又飲一啖咖啡...

琳珮佢...無俾機會我...融入佢既世界？

「竟然佢都無俾過機會你融入佢既世界...咁佢對你既感情...都唔可以話好深...」情性諗左一諗...

珮琳對我既感情…唔可以話好深？

「應該話...佢唔當你係自己人...唔當你係佢生命既一部分...」情性諗左一諗...

唔當我係自己人...唔當我係佢生命既一部分？

「既然佢都唔重視你...你又何必再浪費時間喺佢身上呢？」情性認真咁望住我...

何必再浪費時間...喺珮琳身上？！

「好好搵過個...會懂得珍惜你架啦～」情性飲埋最後一口Espresso，拍一拍我膊頭後，頭也不回咁離開咖啡店...

好好搵過個...會懂得珍惜...我？！

情性步出門口後，成個空間又剩返我同個靚女店員兩個人...

我靜靜地坐喺道諗...

喺道諗頭先情性所講既野…

好好搵過個會懂得珍惜我既人？

乜珮琳好唔識得珍惜我咩？

無帶我去見過佢既朋友就代表唔珍惜我架喇咩？

我的確唔係好理解呢個邏輯運算...

珮琳一直都話想有多D私人既空間...

就算兩個人一齊，都唔一定要好似連體嬰咁每分每秒都要黐埋一齊，永不分離！

雖然話我都有黐身既時候...但我明白...我真係好明白珮琳想要既自由係乜...

我都盡量會俾多D私人時間珮琳...俾佢做多D自己想做既事...

但呢種相處既方式，真係叫做唔懂得珍惜咩？

乜真係需要搵過個咩？

搵過個...搵過個...

離開咖啡店之後，我就一個人行...

一個人漫無目的咁遊離浪蕩...

遊下遊下...蕩下蕩下...不經不覺又到左夜晚...

不經不覺咁蕩到黎蘭桂坊...呢個人間妖域...

蘭桂坊...每晚都上演住唔係條女出黎偷食，就係俾人落迷姦水拉出後巷中出二百連發～

你可能話D男人賤格，但我就覺得係女人戇鳩多D～

有Friends陪又好，無Friends陪都好，約得你出黎飲野，你估真係Dry飲野咩？

睇你有返幾分姿色，咪想約你出黎隊你～迷你～中出你囉～

喂～我唔會認為你真係咁單純，真係諗住純粹飲野丫嘛？

我以為你肯應約，就係默認約戰咋喎～

我邊估到你咁單純姐？

玩完咯～開心完咯～射到你一西都係咯，咪Say個Bye囉～

你唔係真係以為我會負責任丫化？

負咩責任丫？咩年代丫？自己搞掂啦～

有仔咁又點丫？有仔就咪出黎玩啦～

又要出黎玩，又怕俾條仔知你俾人中出二百連發好傻西？

自己搞掂囉～

俾錢？俾咩錢丫？你唔係當正自己係雞咁Cheap丫化？

萬一真係有左要落仔，你問條仔拎啦～

唔係既話，我又唔介意你幫我生埋出黎既～

不過我係唔會養架喎～

講開條仔又係戇鳩仔黎既～

自己條女俾人中出二百連發都仲喺屋企守住條中路～

真係唔怪得而家D港男俾人話無撚用～

就係識得宅喺屋企打LOL～

有時間打LOL，不如用多D時間管下條女啦～戇鳩仔～

以上內容我都係喺上網睇返黎...

有幾多成真？我都唔知～

我平日都好少會黎老蘭...

之前仲未同珮琳鬧交都話會上下佢道...又或者佢上下我道煮下飯仔既～

而家？放左工有時間，都只會坐喺屋企樓下間七仔出面飲下悶酒...

飲夠就上樓瞓...

而我...又會唔會係網上D人所講既戇鳩仔呢？

我真係唔知...

珮琳成日都話要自由...要自由...我都真係唔知佢口中既自由...係用黎做D乜...

我亦唔會過問...從來都唔會過問...

或者...可能...珮琳真係久唔久都會...黎老蘭飲野...

喺條大斜路行落黎...行到去一間酒吧門外...突然有個人撲左埋我身上！

「飲！再飲！我要飲飲！飲飲飲...」一把女仔聲就喺我耳邊亂噏...

『喂…小姐...喂...』我推一推撲左喺我身上既呢位小姐...

呢位小姐身上都...好重酒氣...

飲左好多喇嘛？時間尚早咋喎...

『喂喂…小姐你...』我用力推一推起呢隻飛來猛...

「飲！飲呀！轉場再飲過！」呢隻飛來猛唔係大件，但就好有力咁...

係唔係飲醉左既都大力D架？！

『喂喂…小姐...唔好...唔好...喂...』我再推一推起隻飛來猛...睇清楚D...

呢個一頭灰銀髮既少女...面紅紅咁...五官端正...面尖尖咁...又幾吸引架喎...

而且個身形...個身形都好平均...仲瘦瘦地咁...

都真係可以話係...獸色可餐架喎～

獸色可餐？！我喺道諗梗乜野？

就喺我仲諗梗應唔應該用獸色可餐黎形容之時...

「喂！喂你想點呀？！放開佢！放開佢！」有把男仔聲由前面傳過黎...

我再望返上前...有個同我差唔多年紀既西裝友衝梗埋黎...

『喂喂喂…嗱嗱嗱...我無想D架喇...』我立即推左個女仔去個西裝友身上...

「Catherine…Catherine…」西裝友好緊張咁拍一拍個女仔...

「嗯嗯...飲呀！飲...嗯嗯...」個女仔仲係醉到斷晒片咁...

『喂！你唔好求鳩其噏個名出黎就話係佢個Friend喎...』呢個妖域好多白撞架嘛！

「我！唉...」個西裝友喺個褲袋道拎出部電話...

撳左幾撳...

再隊俾我睇...

我望一望個芒上顯示住正在撥號俾一個叫Catherine既畫面...

畫面中仲有一頭灰銀髮既女仔相...

好明顯就喺面前呢個醉娃...

而喺醉娃身上，亦都傳黎“我願意為你 我願意為你 我願意為你被放逐天際”既聲響...

「咁可以證明到我係佢朋友啦？」個西裝友有D無奈又帶點唔順超咁啤一啤我...

『可以...可以...』其實睇你咁緊張佢，都知你同佢又點止係朋友咁簡單丫～

我只係隨口噏下姐...都咁認真...

「咁我地可以走啦？」個西裝友仲係好唔順超咁...

『可以...可以...』唔係可以點？

「Catherine…Catherine…我送你返屋企丫...」個西裝友就好小心咁扶實個醉娃...上左的士...

睇住架紅的駛走之後...

唉...睇黎老蘭都係唔岩我架喇...我都係快D返去我樓下間七仔罷啦～

趕快離開呢個人間妖域...趕快坐上巴士...趕快返到黎我樓下間七仔...

冷風吹送...寒冬漸凍...

街上既路人都趕住返屋企...

而當我行到去七仔門口之時，我見到有一個坐住輪椅既女仔，停左喺七仔門口出面...

行近兩步，仔細咁睇真D...呢個坐喺輪椅上既清純女子望下望下咁...望入去七仔入面...

係想入去買野嘛？

『小姐...有無野可以幫到你？』就等我做下好心，幫下人啦～

只見個女仔嚇左一嚇...然後帶點失落咁擰擰頭...急急忙忙咁離開...

我望住呢個輪椅少女既背影離我越黎越遠...越黎越遠...直至喺我眼前消失...

係我嚇親人嘛？

乜我個樣真係咁嚇人？咁似壞人？

唉...真係好人難做...

我都係唔好理人咁多，做返我每晚都做既事好過...

我喺七仔買完支酒...

坐喺張石凳上...

拎出部電話，Send第一百一十三個Message...

痴痴迷迷咁等...望住個芒等...

等到你上線...等到你雙藍剔...再等到你下線...

又再一次已讀不回...

唉...我都預左你會又再一次已讀不回架喇...