香港戰場: 城大篇‧6.是降是戰
6.是降是戰
團隊：林志剛、李顯明、周偉峰、何明發、李佩欣、黎德文、何芷君
「我地仲可以去邊?」一個市民問。
另一個答嘴：「見步行步啦。」
「見步行步?」問問題的市民即時發颷，「我地困住係度幾個鐘，不停有人殺入嚟，出面係咩世界呀?行過兩條街就安全呀?見步行步!俾人隊冧咗都未知咩事呀!」
「咁你可以點?」
「計我話，向政府軍投降啦，政府唔會唔理我地嘅。」
「你傻咗呀?邊個向我地開槍?邊個周圍殺人?走埋去咪一樣死!」
「你就傻呀!未試過點知?你地要衝你地嘅事，做咩要拖我落水?大佬我行過買野咋，犯法呀?」
「而家唔係有無犯法嘅問題，佢地唔理三七廿一咩人都殺，佢地無人性架!」
「我又唔係咁睇喎，佢地都放咗唔少老人家走啦，真係無人性?」
「佢地放晒老人家，殺晒其他人，咁就有人性?」
「我話知你死呀，我頭都白晒，如果佢地放過老人家，咁即係唔會殺我!有邊個跟我走?」
有幾個人舉手，當中有姓黃的警員。
那警員道：「我唔知發生咩事，我只知道政府講嘅野就係啱。軍人係要搵恐怖份子，唔係我地，與其周圍走不如向佢地投降，仲有一線生機。」
姓伍的警員隨即說：「黃山明!你明明睇到佢地連警察都殺，你投降有咩着數?投降就唔怕俾人隊冧?」
黃山明道：「我唔係你呀伍少國，你廿幾歲仲有得搏，我下年做夠就有柴，屋企有老婆仔女等住養，唔靠政府靠邊個?」
另一個市民接着說：「咪就係，再咁搞落去有無命都未知，大不了咪即刻買機票走人，過去加拿大當坐移民監囉。同你地癲?」
又有市民道：「喂我地係香港生活幾十年，話走就走?見有人搞到亂七八糟就唔理佢呀?」
該市民反駁：「唔係點呀?你要我係度過人世呀?我夠知政府軍開槍殺人，不過我呢就嚟退休，咪由得佢係度玩多兩年囉!同你地留係度反抗咪即係搞風搞雨，有咩事我點算呀?」
「夠啦!」那個叫基仔的警員大叫，「你地嘈夠未?係留就留，係投降嘅唔該放低手上物資，走出去馬路。」
警員黃山明與幾個市民放下手上的東西，向達之路走出去。
學生們安頓好，分批工作及打電話找家人。
嘟......嘟......嘟......「電話唔通，」李顯明道。
「喂?呀媽......我無事......」黎德文打通了。
何芷君近乎命令的說着：「聽住，搵你地本護照出嚟，立即離開香港......」
林志剛叫家人離開：「你地搭車去深圳咪好快嘅?去到再飛其他地方......」
「唔好去機場，大嶼山條路應該爆晒入唔到去，你去深圳廣州澳門搭飛機都得......」何芷君道。
「喂?喂?收唔收到?」何明發打通電話，但對方似乎接收得不好。
「返鄉下唔係唔得，最好就去其他國家......」林志剛道。
李佩欣說：「屋企無人聽，手提又打唔通。」
......
其他人放好障礙物，都走過去陳sir那邊。
「我係西九反黑組陳sir陳佳賢，如果覺得投降有利嘅，我歡迎大家立即離開，」陳sir環視眾人，「留低嘅人就要團結一致，互相幫助。」
「陳sir，使唔使上去帶d野食走?」一個市民道。
陳sir道：「我地只可以帶走乾糧，濕嘅凍嘅拎出嚟唔擺得耐。龍子維，你同屈生、石生上去睇下仲有無乾糧。雪櫃內就唔好搞，如果再有生還者嚟都仲有得食。」
「係!」三個市民應聲而起，走上去美食廣場搜索。其實他們早就搜索過，不過今次要再出走，不知外面情況怎樣，所以都想多帶一份食物。
「妹妹，一陣走嘅時候跟實，大家未必有時間照顧你。」陳sir指的是一個十一二歲的女孩，她叫李詩雅，在這群人之中年紀最小。
「我叫李詩雅，」她向學生們說，「啱啱識得開槍。」
林志剛等幾個理科生，正在取出硝化甘油、高氯酸銨、三硝基苯甲硝胺、雷管等趕製炸彈。何芷君不懂製炸彈，向李詩雅笑道：「你可能早過我識開槍添。總之出到去就要好好保護自己，反應要快如果唔係無人救到你。打咗電話返屋企未?」
「打咗啦，無人聽。」李詩雅說。
黎德文也不懂製炸彈，他說：「一陣唔好走失，但亦都唔同企得太埋，如果唔係一個炸彈就足以殺死幾個自己人。保持係其他人嘅視線範圍內，唔好單獨行動。」
兩個警員走過來說：「你好，我叫伍少國，佢係夏理基，都係跟陳sir做反黑嘅。」
林志剛搭嘴，笑道：「咁最好唔好話你知我地造緊炸彈啦。」
夏理基道：「哈，咁又唔怕，而家唔係你殺我，就係我殺你，用槍、炸彈定係刀仔，其實都無咩關係，保護到自己就得。」
兩個學生推着一箱烈酒過來，另有其他人將時裝店的衣服撕成布碎，用來製造莫托羅夫雞尾酒，即是燃燒彈。
伍少國說：「咁嘅情形，就算你係黑社會都要同你合作，而家最緊要係生存。」
林志剛道：「我地拎咗個對講機，點用?」
伍少國說：「校去頻道三就可以聽到我地講野。」
陳sir指揮其他人執拾物資：「你地都執好野，如果太重嘅最好唔好拎，我地唔知要行幾耐，而且隨時都要跑，拎太重走唔到。」
搜索過剛殺死的軍人之後，槍械與子彈尚算充裕。陳sir在pageone拿出來的地圖，畫逃生路線。
「我地要走去幾個地方睇下仲有無幫手，先去界限街警察體育會，再去旺角警署，之後係西九警察宿舍，其他人應該有線索。」
「如果有軍人守住呢?」一個市民問。
「咁就要改變計劃，」陳sir答，「未必要去晒咁多個地方，但去到就最好，我地要嘅係資料，要知道邊度安全，同埋發生緊咩事。」