衝動性.行為: 第十七節

，話商場漏水影響佢做生意。」
 
瘦削男住客亦即李生，我看了一下他的House File，他為該鋪位業主，在三十年前已經購買該物業，沒有欠交管理費記錄，沒有其他投訴，是一名正常的業主。
 
阿才續說：「李生投訴之後，管理處好快就已經搵到問題既根源，而我地亦都已經搵晒承辦商做報價，打算維修條去水渠。當時我地依足程序做野，發通告通知其他受影響既商場鋪位，就係呢個時候，嗰幾個黑社會就帶左幾個紋身大漢走上黎管理處搵經理嘈！」
 
「黑社會上黎嘈都冇用架，我地依足程序做野，而我地亦都有權安排工程進行，佢地點可以阻止我地？」
 
「上一手個女經理都係咁諗，仲話有咩事就報警！到左工程要進行嗰日，班黑社會就叫晒啲人黎唔俾工人開工，仲話邊個做野就打邊個！」
 




「咁你地當日有冇報警？」
 
「有！不過警察黎到咩都做唔到，黑社會話過黎行街，響商場度行黎行去但係又冇做非法野，最後警察話有事先再搵佢地。相反，其他鋪頭既人話管理處惹嬲黑社會，搞到商場咁多黑衣人而令到佢地做唔到生意，於是集體投訴話暫停工程，漏水就搵個筒接水頂住先。」
 
「所以成件事拖左成年都搞唔到？」
 
「係！上一手經理想同佢地傾，仲投訴埋去反黑組諗住叫佢地拉人，但最後又係不了了之，而班黑社會知道係個女經理玩野，就恐嚇佢，每日都搵個人跟住女經理返工放工，女經理為左自己同屋企人安全，冇辦法唔辭職……」
 
「啪！」我激動到雙手拍在辦公桌上：「點解唔報警？而家擺明知佢係黑社會，知佢恐嚇緊個女經理，點解警察唔做野？咁我地交差餉俾佢地做咩呀！」
 




阿才被我激動的表現嚇倒而征了一征：「詹生…….人地在暗，我地在明！警察冇可能二十四小時保護我地，我地呢啲星斗市民靠既就只可以係自己……」
 
「靠自己…….，阿才！你去做返自己野先。」
 
「知道！詹生！」
 
聽了阿才的說話後，我沒有畏懼黑社會，反而內心的一團怒火卻在燃燒著。也許作為星斗市民，但求過著安穩的上班族來說，遇上黑社會或被他們騷擾當然會避之則吉，可是，我卻不認為靠一個「惡」字，便可以把所有事情顛倒。
 
阿才說得對，任何事情去到結尾，靠的亦只有自己，不要再妄想公司高層會出手幫助，也不要幻想有住戶如超人一樣走出來為自己解困，所有人所有事，靠的，永遠是自己。
 




我緊握拳頭，看著自己青筋暴現的手，在思考自己作為一個物業經理究竟可以走到多遠。
 
區區的垃圾黑社會，可以阻撓我詹瑞仁嗎？
 
不能！絕對不能！我還有一段很長的路要走，我要晉升成為公司的總經理，要改變物業管理這個行業，要所有人互相尊重，而我們對待客戶時的態度是不降不卑，而不是唯唯諾諾。
 
我，不能在這裡倒下！
 
我閉上雙眼，整理一下自己的思緒。如果正常途徑，依正常程序不能讓工程展開，那還有其他方法可以說服黑社會？他們不是租客，不能以免其租金作籌碼；他們如此著重他們的生意額，我想免他們工程期間的管理費他們也不會接受。
 
既然正門不能走，走偏門又如何？
 
黑社會因為自己店舖門前的去水渠沒有漏水而阻止我們作出維修，那如果漏水的位置在他們的正前方呢？如真的如他們所說，店舖的生意好得不能休業，那麼他店舖前的渠漏水，他們便必定極度緊張，還反過來求我盡快更換維修。
 
既然黑社會那麼喜歡用旁門左道……




 
那麼我便比他們走得更加偏門，更加黑暗！
 
想到這裡，身體便興奮得全身在震。