衝動性.行為: 第十節

「搞錯呀你地！快啲出黎交待返盤數呀！」
「罷免佢地！抄晒佢地！」
「我地係咪可以報廉署架？」
 
一句又一句的叫罵讓現場的氣氛十分織熱。
 
四名住宅委員均一臉茫然，相反，車場和商場委員則一笑置之，置身事外。他們也許天真的以為現在的情況只屬於住宅管理部分，而自己所屬的車場和商場因沒有搞事份子，所以本著「關我Ｘ事」的態度而處之泰然。
 
太天真了，他們難道以為在這質問大會，其他委員可以幸免於難嗎？
 




話畢，一個身材瘦削的男人走到人群前：「仲有你呀！商場委員鐘太，我係商場既業主，開精品店既，每次落雨鋪頭出面條走廊就一定滴水，我反映過好多次，又報告晒俾管理處知，但我最後發現管理處報告俾你聽既時候，係你唔批條數出黎做維修，我真係好想知點解，我想問下我既損失係咪你做賠償！」
 
鍾太回應：「我知你係邊個，亦都知你既鋪位有滴水情況，不過呢件事比較複雜，主要原因係平台既雨水渠淤塞所做成既，我地仲要多少少時間去跟進。」
 
瘦削男追問：「仲要時間？我已經反映左成年啦，仲要咩時間呀？你地幾個委員點做野架，五十萬話用就用唔問我地，我而家間鋪滴緊水就冇人理我，我地在場既人選你地出黎係幫我地，唔係要你玩我地呀！」
 
我低聲問阿健：「你知唔知點解唔做維修？渠塞左咪換喉囉，做咩佢地唔批錢去做工程？」說實話，聽完該瘦削男的投訴後我有一點疑惑，只要更換或維修淤塞的渠便可以把事情解決，那為法團成員不撥款把工程完成？
 
先不說那些旁聽的住客，現在連我也開始質疑法團的辦事能力。
 




阿健低聲回應：「其實工程既維修費係大約十萬元，唔算太貴，不過如果真係要做工程既話，就會有成十幾間商鋪要同時間暫停營業差唔多一個星期，牽連極廣，而更重要既係其他被牽連既業主係黑社會！」
 
「黑社會？而家仲有啲咁既野？」我有點好奇，我以為黑社會已經隨著鄭伊健不再飾演陳浩南這個角力而悄然逝去。
 
「緊係有啦！之前同佢地傾過一次話要停鋪做工程就已經話要打人，所以我地冇人咁去招惹佢地……」
 
聽罷，眉頭又是一皺。
 
「大家唔好咁激動，大家有商有量，我地都係本住為住客服務既宗旨辦事，我地冇糧出，係自願架！我地用自己既私人時間為屋苑服務，希望你地可以體諒一下我地。」施主席放下身段說。
 




在這個行業待了很久，見過太多委員以前作為理由希望得到住客的支持，只是在香港這個交管理費就以為自己「大撚晒」的物業管理文化，說出這句說話的下場，是被人罵得更加淒烈。
 
「我屌你老母！咩冇錢收冇糧出呀！而家你攞左我地五十萬呀！」
「成班人係咪廢架！」
「唔止法團成員！我地要連管理公司都抄埋佢！成班廢柴垃圾！」
「個管理公司經理咁後生，肯定做唔掂啦！抄埋個經理！」
 
要破解現時的困局不是沒有辦法，我知道行內有些管理公司會在此激進時刻採取非常手段，如有保安員突然之間暈倒造成混亂，或通知警察屋苑有打鬥事故，讓警察介入，借機中止會議。
 
四周盡是旁聽住客的咒罵聲，粗言穢語不絕於耳，換著是以前的我，或許會對現在的情況感到不知所措，只是現在的我內心卻是出奇的平靜。
 
我反問自己，我詹瑞仁究竟要做一個怎樣的經理？
 
是那種趨炎附勢，見風駛舵，但求穩打穩紮每個月人工也袋袋平安的經理；還是，我是一個捍衛自己專嚴，為住客盡心盡力，不亢不卑的物業經理？
 




我，是後者。
 
或許其他同業說我未做過經理，不知道如何在管理公司和法團之間取得平衡，可是，我要的是撥亂反正，而心裡面相信的是以理服人。
 
我接受意見，但並不代表我接別人無理的辱罵。
 
在所有管理公司職員、法團成員被旁聽住客侮辱得幾近卷縮一角之際，我猛然站起，並行到了人群中的中央，大聲叫喊：「2526 6366！」