衝動性.行為: 第九節

我一直認為要好好的當一個物業經理，除了要有豐富的物業管理知識外，最重要的是處理投訴、面對法團成員質問或面對如今次事件，有大量業戶列席旁聽發表意見時，做到不亢不卑不驕不謅，把所有事也處之泰然。
 
曾經有一個合作過的經理，他是一個大好人，對同事很諒解而且工作亦一視同仁，深得同事愛戴，只是他有一個缺點，就是每在處理投訴或面對住戶質問的同時，總把自己的身段放在一個很低的位置，久而久之，住客被服侍得像高人一等，而管理處則像狗一樣被勞役。
 
我，不要做這種經理。
 
先不要說工作方面，自己或同事有否出錯，我只認為人與人之間的溝通和相處最重要的是溝通、體諒和尊重。
 
既然住客把我們當狗，那麼我也會把對方當成畜牲看待。
 




這個，就是我詹瑞仁的做人宗旨。
 
「好啦，既然啱啱有關會所既泳池管理合約留返下次商討，咁我地而家就去第二個議題，有關屋苑管理費需要調整事宜。」施主席說。
 
「管理處就今次事項已經做左一份詳細既建議書.....」我示意阿健把文件交給各委員查閱，我續道：「而家屋苑既結餘只有大約一百萬元，隨住最低工資響過年既幾年間上漲，而響管理費既恆常收入冇增加既關係，屋苑每個月都係蝕錢既，依估計，如果我地再唔加管理費既話，盈餘二個月之內就會用晒。」
 
「咁管理處建議既加幅係幾多？」林小姐問。
 
「我地參考左鄰近屋苑既管理費，如果想屋苑既財政回到正常水平，管理處既建議加幅係20%。」
 




「嘩！」
「加咁多，有冇搞錯呀！」
「肯定係法團同管理公司亂咁用錢啦，我交左咁多管理費，都唔知啲錢去晒邊！」
 
旁聽的觀眾又在旁起哄。
 
咒罵管理處和法團聲音的人士此起彼落，我望一望在場的法團成員，只見他們均臉露難色。
 
難怪，如阿健之前所說，之前的會議一般也相安無事，每次會議均以禮相待順利完成，對於處理被住客質問的環境，法團成員當真沒有相關經驗。
 




一位身形頗胖的男住客走到會議桌旁邊大聲質問：「你地講！突然之間要加咁多管理費，我真係好想問我地既錢你地究竟係點處理既！點解唔每年加啲，而選擇一次過加咁多？咁樣對新搬黎既業主係咪唔公平！」
 
四眼男住客此時也插嘴說：「我之前睇過屋苑既會計報告，上年年中突然間有一筆接近五十萬既工程費用，我想問下呢五十萬用左邊度！你地用呢筆錢究竟有冇問過我地！」
 
「搞錯呀你地！」
「咪係囉，駛成五十萬都唔通知我地！」
「法團同管理公司點做野架？係咪夾份想偷晒屋苑既錢呀！」
 
又是旁聽住客一輪質問的聲音。
 
法團成員均面面相覷，沒有一個人有勇氣站出來回應住客的質問，施主席無可奈何的站起身回應旁聽住客。
 
我發現施主席雙腿不其然的在震，他口窒窒說：「其.......其實，嗰五十萬係一個必要性既......既維修項目，大家應該記得上一年，屋......屋苑做完WR II，承辦商報告有好多電力設備出現故.....故障，所以我地決定左招標更換......」
 
身形頗胖的男住客搶著回應：「招標？你地係點招標呀？公開招標，定係自己一早已經夾定幾間承辦商呃我地屋苑錢？」




 
四眼男住客接力發問：「依家屋苑突然間冇左五十萬，你地唔交待清楚唔好話加管理費，你地今晚個個都唔準走！」
 
「大....大家冷靜，件事唔係你地諗成咁，我地冇做對唔住大家既事......」施主席面露難色的解釋著。
 
只是，旁聽的住客已經被四眼男住客和胖男住客所煽動，任憑施主席和法團成員如何解釋，他們根本就聽不入耳。先入為主，我知道現在的所有人均一致認為法團成員和管理公司監管不善，又或者我們雙方背後互傳利益，淘空屋苑儲備。
 
現在的情況已經發展到不再是法團會議，而是腹背受敵的質問大會。