[真人真事]那些年錯過的愛情: 中四０２
食過晚飯後，我便踩單車到思蓓的家去。到達思蓓屋企之後，佢就拎左一大袋野出黎門口，仲叫我陪佢去一個地方。於是我就跟住佢行，去到一個空地之後，思蓓就拎袋入面既野出黎
我：「咦...孔明燈？！」
思蓓：「係呀...陪我放多次得唔得？」
我：「你叫我今晚去你屋企就係做呢件事？」我笑著問她
思蓓：「係呀，你諗左去邊到呀？」思蓓瞪著我說
我：「無..你講清楚咪好囉..等我仲估有咩大事發生...不過未到中秋喎...等多排先放唔得咩？」我仍然笑著說
思蓓：「再等就放唔到啦...」
我：「下，點解等多排就放唔到？」
思蓓：「我話....你再唔幫手做野呢...好多就有警察黎拉你...搞到你放唔到」佢笑著答我
我：「點解係拉我？你先係主謀...」
思蓓：「咁你陪唔陪我放呀？」佢笑著問我
我：「陪呀...你鍾意就得啦！」
怎麼好像有點古怪的？不過算了，我還是專心整孔明燈。廢事時間耐左真係比人見到我地做犯法野。過左幾分鐘後，我地兩個已經整好個孔明燈。等孔明燈升上天期間，思蓓就比左支筆我寫低願望。還記得上年我寫了「友誼永固」。我承認我貪心，今年寫了一句頗長的願望
「希望一生一世在一起 傑上」
思蓓：「我寫完啦..你得未呀？」
我：「岩岩好...咁一齊捉住準備啦」
等左一陣，孔明燈差不多能升起。我們數了三秒一起放手後，思蓓便站在第二邊對我說
思蓓：「羅子傑..中秋節快樂」佢笑著說
我：「傻婆，中秋再放咪得囉！」
思蓓：「車...又係到窒我... 」
我：「快Ｄ執埋Ｄ野就走啦，我FEEL到有皇氣」
思蓓：「嗯...」佢仍然望著天上的孔明燈
希望，願望真的能夠成真...
九月三日，開學後的第三天。今天思蓓打了一個電話比我，再次叫我到她的家食飯。我詢問過啊媽後就答應左佢。當晚去到佢屋企，見到思蓓著左一條黑色連身裙，頭髮的陰全部紮左去後面。這裝扮仍然顯得她十分漂亮，好像一個公主似的。
我：「哇...你今日...」我上下打量著她
思蓓：「做咩呀，有野講就講啦」佢邊拎碗筷邊說
我：「你今日好靚」我傻笑著說
思蓓：「嘻，係咪架？」佢立即跑到鏡前照一照
我：「嗯...」
思蓓媽咪：「食得飯啦！！」
我地三個食飯果陣都係聽下思蓓媽咪講下返工既野，思蓓今日極少講野，只係係旁邊點下頭食下飯。食完飯之後，我地三個就坐左係廳睇電視，還記得電視上播放的正是「公主嫁到」。睇到一半左右，思蓓就走左入房拎左部即影即有相機出黎。
思蓓：「媽咪，幫我同啊傑影張相」佢笑著說
思蓓媽咪：「好呀...你地坐埋D啦」
思蓓坐低左之後，手立即牽著我。我看著她笑得那麼開心，便跟隨著她的笑容一起笑起來，更拖著她影這一張相。
思蓓媽咪：「好...1...2...3..！ 搞掂啦！」
等左一陣之後，我同思蓓既合照就慢慢出黎。佢比左我睇左一陣之後就擺返入房，然後叫我出去行下。我地兩個行去橋果陣，我就問佢
我：「做咩買部相機返黎呀，好似好貴架喎」
思蓓：「其實買左好耐架啦...我都係買黎玩下姐」佢笑著說
上到天橋望左一陣風景，思蓓就同我講
思蓓：「啊傑，記唔記得你問過我返左大陸一個月果件事？」
我：「記得呀...」
思蓓：「我依加講比你知啦...」
思蓓深呼吸一口後便說
思蓓：「其實我返大陸，就係見我媽媽最後一面」
我聽到後表情立即一百八十度大轉變
我：「你...媽媽....咁.....？」
思蓓聽到我咁問，雙眼立即湧出淚水。冷靜左一陣，佢先慢慢講出成件事既由來。
思蓓：「嗯，其實依加呢個媽咪係我養母，我真正既媽媽一早唔要我返左大陸。由細到大，我亦都無見個我爸爸一面」
我：「....你真正果個媽媽...佢發生左咩事...」 我聽到思蓓咁講都開始想喊
思蓓：「同叔叔一樣，有左果Ｄ病」
我：「下....」
思蓓：「一直以黎，我都覺得佢係唔負責任既母親。但係我呢半年...見到你成日係屋企同醫院來來回回探你爸爸...我就係到諗，我都要盡下做仔女既責任，叫左個啊姨陪我返上去照顧下佢，見佢最後一面」佢笑著說
「我...真的很笨...」
我：「對唔住...我頹果陣咁樣對你...原來你都...」
思蓓：「唔緊要，因為我明白，雖然我同果個親生媽媽無感情。但佢走左果陣，我都有傷感既感覺...所以我都算明白...你當時既感受」佢眼中開始有淚水落下
我：「對唔住...其實你一定難受過我....」
思蓓：「唔係呀，其實我已經當左依加個媽媽係我親生媽咪，佢一直都對我好好，好錫我。我話過想去外國讀書，佢就立即答應左供我出國讀書...至於爸爸...我真係無咩感覺。但係，我已經當左叔叔係我爸爸...我第一次就係你屋企...真真正正感受到...家庭既溫暖...」 佢哭泣著說
我：「思蓓...你喊出黎會開心D...你咬我啦...我唔會介意」
思蓓：「其實我無野....我習慣左....不過我仲想同你講...」佢說完便開始喊
我：「你想同我講Ｄ咩？」
思蓓：「我聽朝走，早上七點機」
我：「下....」聽到後,我真的呆了