[真人真事]那些年錯過的愛情: 中四０１

「啊傑，我個頭好唔好睇？」 

「好睇呀，做咩無啦啦染頭髮，而且仲真係轉埋髮型」 

「我都去英國啦，咁咪染埋佢囉」佢邊笑邊說 

「咁你幾時走？」 

「唔知呀...知道先同你講」 





「下...仲未知幾時架咩...好啦」 

　　思蓓挑染左一個啡色既頭髮，剪左一個斜陰。她說改變形象是要到英國開展新生活。我聽到後只是笑而不語，不過改變形象後的她，外表的確是成熟了許多。 

　　由於思蓓媽咪放假留係屋企，所以今晚我去左思蓓屋企食晚飯。雖然我怕羞無咩野講，但思蓓媽咪都無介意，反而不斷講佢返工時既趣事比我地聽，雖然餐飯普普通通，但我們食得格外開心。食完飯之後，思蓓留左係屋企洗碗，我就同豆丁出去公園玩。 

「哥哥，玩唔玩鞦韆？」 

我：「好呀，咁一人一邊啦」 





　　玩左一陣鞦韆，豆丁就問我 

「哥哥，做咩你鍚姐姐既？」 

我：「因為,,,哥哥鍾意姐姐囉」我笑著說 

「鍾意姐姐要講出黎架」 

　　我落左鞦韆後就抱左豆丁係一張長椅上 





我：「如果你係佢，我開口講出黎一定好容易」我把頭碰著豆丁的頭 

「哥哥講咩呀？」 

我：「冇，哥哥鍾意你呀」我笑著說 

「嘻，我都鍾意哥哥」 

　　過左幾十秒，思蓓就係公園門口叫我地 

思蓓：「喂，你地做咩呀？」佢笑著說

我：「無呀，我同佢培養下感情姐」我笑著答佢 

思蓓：「你想抽佢水昨...出黎行陣啦」 





　　我地行到去天橋之後，我同思蓓就開始傾計，豆丁就係橋上面乖乖看著街道的風景 

思蓓：「唉...時間過得好快呀...」 

我：「係囉，聽日就開學...」 

思蓓：「你放左學，我可唔可以去搵你？」佢笑著說 

我：「你點搵我呀...你無野做咩？」 

思蓓：「我都唔洗返學啦...比我陪下你得唔得？」 

我：「嗯...一定得」 





　　我地傾左一陣左右就開始行返屋企，我送到佢地兩個到門口之後，思蓓送左豆丁入屋就同我講 

思蓓：「羅子傑，我第日走左你會點？」佢笑著說 

我：「我會掛住你囉...你呢？」我低著頭說 

思蓓：「我同你答案一樣囉...點解會掛住我先？」佢仍然笑著說 

我：「我....」　我竟然又說不出口 

思蓓：「你唔講，咁不如比我講先。因為我好怕再見唔返一個，好似你對我咁好既男仔」佢突然擁著我說 

我：「嗯...其實我好差...」 

思蓓：「哈...我唔覺咪得囉...比我攬一分鐘得唔得？」佢笑著說 





我：「得..」 

　　一分鐘過左之後，我們兩個仍然擁著對方，大家好像忘了時間一樣。過了很久，思蓓才慢慢放開手，然後送我上天橋離開，期間我們沒有說過任何說話。我在橋上走了一段路後，身後的思蓓向我大叫 

思蓓：「遲Ｄ見啦羅子傑！」 

我：「好啦！拜！！」我在天橋的另一面大叫著

　　今日開學，班上多左好多新面孔。一些是新同學，一些是以前精英班的同學，一些是毒撚班轉入黎的同學。新入黎呢堆人令呢班增添了不少生氣。上到班房後簡左個位就開始傾計，新班主任MISS NG就係到處理班務之類。 

啊賢：「大佬，岩岩轉入黎，睇撚住我呀」佢向我說 

我：「得啦，你唔好激嬲Ｄ女就生存到」 





　　另一邊的班房，豬皮正在煩著啊單 

啊單：「屌你！你好撚煩呀！」 

豬皮：「過黎同我坐啦」　豬皮在角落自己坐著 

啊單：「屌你老母！你再嘈以後唔比你上我屋企」 

豬皮：「得囉屌...」 

　　這時，坐在身後的啊神也開始取笑豬皮 

啊神：「啊單收到隻好狗做細，好撚羨慕」佢笑著搖頭 

啊焯：「屌，你講野好撚狗」啊焯笑著打了啊神一下 

　　放學之後，我沒有和啊單同啊神等人食飯。當我差不多行到去車站搭車返屋企果陣，身旁一架單車在我旁邊經過，還拍了我的頭一下。我向前看了一看，這架單車的主人帶著粉紅色帽子。佢落左車之後就企左係我旁邊，而我就自動上左架車 

我：「做咩呀大小姐，專登踩出黎搵我？」我笑著說 

思蓓：「我話左會搵你架啦，悶咪踩出黎搵你囉」佢笑著回應我 

　　我踩上了單車的座駕後，便伸出手向思蓓指一指後面的座位 

我：「上車，跟我上秋名山」我講出我們看過其中一套電影的對白 

思蓓：「哈....上秋名山之前食D野得唔得先」 

我：「食Ｄ野...哦....咁行啦」 

思蓓：「等等先..司機哥哥，後座有冇安全帶？」佢笑著問我 

我：「我條腰就係安全帶...捉實啦」我低頭笑著說 

思蓓：「哈，踩得啦依加」佢捉著我的腰說 

我：「唔好篤我條腰呀！！」我邊踩邊講 

思蓓：「得啦，你專心Ｄ渣車啦」

我：「大小姐...咁你想食D咩？」我笑著說 

思蓓：「可唔可以，一齊食多一次腸粉？」 

我：「食腸粉呀...咁係咪買返你屋企食？」 

思蓓：「去返上次果個足球場食！得唔得？」佢笑著問我 

我：「哦...好呀，無問題」 

　　買左野食之後，我同思蓓就去左學校附近呢一個足球場食。回想返幫思蓓慶祝生日果陣，我同佢就係係呢個看台到食野。估唔到大家今日有機會一齊，再次坐係到食同一樣既野。 

我：「喂...你記唔記得我上次搶左你個十蚊？」我邊食邊問 

思蓓：「記得....點會唔記得呀」佢瞪著我說 

我：「...唔會又嬲掛...請你食粒燒賣啦」我把袋子遞給她 

思蓓：「多謝喎羅二少」 

　　食左一陣之後，我又提返上次既野 

我：「記唔記得...我話我會比個心你...」我低著頭說 

思蓓：「你個心？唔記得呀...做咩事？」佢邊食邊問 

我：「哦....你唔記得咁算啦」我聽到有點失望 

思蓓：「喂羅子傑，今晚食完飯黎我屋企丫」 

我：「哦....好呀，咁今晚我去搵你啦」 

思蓓：「等等先...你個樣做咩好似唔開心咁架...飲杯豆漿先啦」佢拎起放在看台上豆漿給我 

　　我接過豆漿後，笑左一笑就同佢碰杯 

我：「好啦...飲杯啦！」我拎起豆漿同佢碰杯 

　　食完Ｄ野之後我地就開始踩返屋企，送到返佢屋企果陣，思蓓再次提我今晚要出現。難道今晚會有特別事情發生嗎？思蓓的再三提醒，令我有點期待，又有點害怕。