[真人真事]那些年錯過的愛情: 中三５６

「跟號碼出黎拎成績表啦！」天SIR叫著我們 

　　大家拎左成績表之後都好開心，原因唔係因為順利升班同考得好。而係終於放暑假，唔洗再對住天SIR。想起這一年罰抄的英文，應該也超過十萬個。雖然今次成績有全班第四，但因為英文唔合格，天SIR已告知我不能進入精英班。看著啊山那個空出來的位子，就諗返佢以前日日返學邊同我地吹水邊罰抄。可惜啊山不喜愛讀書，幾個兄弟唔可以一齊升中四。 

天SIR：「唉...估唔到啊山真係退左學」佢走過來說 

啊竹：「明明係你逼走人」啊竹笑著說 

天SIR：「玩下佢姐，邊有人真係會抄到六十萬次。估唔到佢咁認真」佢笑著說完便轉身離開 





啊竹：「唉...都話天SIR仆街黎架啦...」 

　　放學鐘聲響左之後，我就去左啊單屋企食野同打機。打到差唔多三點左右，我地就返學校睇下年既分班表。 

啊單：「啊傑，下年我地又同一班」佢淫笑著說 

我：「又同你個仆街仔一班...下年好多人轉入黎喎...」 

啊單：「啊神...啊賢...豬皮...正呀屌你，都幾多中一同班同學轉入黎...而且仲有我隻狗豬皮」佢笑著說 





　　我同啊單睇完分班表後便睇那張選科表，我地是但簡果一科生物竟然也收了我們。 

我：「ON99...我地咁低分都收我地」 

啊單：「你做咩撚，生物咁多女你唔想入咩？」佢摸著我大腿說 

我：「屌你又摸我...有Ｄ離奇姐...不如出去打波啦」 

啊單：「等等，幫我睇下麗婷同啊儀入左邊一科」 





我：「做咩要知人地Ｄ野？」 

啊單：「搵啦，係咪兄弟先？」 

我：「好...依家搵囉」 

「最近啊單經常提著麗婷同啊儀，莫非佢地同啊單有不可告人既秘密？」

「啊爹，我咁早出黎陪你行，乖唔乖先」我邊行邊說 

老豆：「乖...但係...屌...行下行下行撚左黎第二區...都唔知一陣點返屋企」佢笑著說 

我：「一陣我會陪你行返去架啦」 

老豆：「咁乖...咁行入呢個公園坐陣先啦」佢捉著我膊頭說 





我：「好...你慢慢行啦」我向老豆說 

　　我地係公園搵左一個位坐之後，老豆就坐係到吹下口哨望風景，我就睇下老豆電話既訊息，發現思蓓仍然有搵我老豆。而且比我睇到一個訊息，老豆有回覆思蓓的。 

「叔叔，我後日要返大陸探下親戚先，應該都要返去一段時間。呢排唔可以再黎照顧你啦...小心身體」 

老豆：「好，遲點見」老豆的手機回覆了這個訊息 

「嗯...我返到黎之後一定會搵你！」 

　　思蓓那傢伙，竟然要返大陸一段時間都唔同我講聲。雖然我為這件事在意，但我睇到佢地既訊息就笑左一笑，老豆吹吹下口哨見到我笑就問我 

老豆：「睇左Ｄ咩呀你...」佢笑著說 





我：「無呀，行下啦不如」我傻笑著起身 

　　我地兩個行緊果陣，老豆都係邊行邊吹口哨。我就靜靜地係旁邊陪住佢。當我地行左半個鐘左右就打算行返出公園入口，出返去果陣老豆就問我 

老豆：「傑仔，記唔記得老豆同你去過幾多次旅行？」

　　我想了一會後，便笑著回應他 

我：「其實好易計...十次啦」 

老豆：「點解係十次？你撞架？」 

我：「自我四歲果年，你同媽暑假都會帶我去旅行，點會唔記得」我笑著說 

老豆：「好記性喎...我做老豆既只係同你搭過一次飛機出去旅行，其他都係返大陸玩」 





我：「...唔緊要喎...只要啊爹你身體健康，長命百歲...我同你去邊到都會好開心」 

老豆：「其實...對唔住...」 

　　我聽到後便有眼淚流出，我望去第二邊跟他說 

我：「痴線..做咩無啦啦講對唔住...」 

老豆：「我以前返工，無時間照顧你。返日更只可以送下你返學，返夜更只可以同你食幾日晚飯。有時一個月先見得你幾次...我兩個仔女入面，D親戚朋友都話家姐叻D，但其他我細仔一樣好叻。你家姐去左美國果年我真係好開心...就算佢要幾多錢我都唔介意。不過，傑仔你可能慘Ｄ...第日你想出國留學...你啊媽可能無錢比你...」 

我：「...做咩無啦啦咁講呀...我唔介意家姐叻過我架。仲有，去唔去外國讀書我都無所謂」 

老豆：「以前我仲有返工，屋企仲有錢，可能比家姐出國讀書。但你第日可能咩都冇...我真係覺得有Ｄ對你唔住...老豆走左之後，你要跟實家姐。我叫左佢照顧你同啊媽」 





我：「...得啦...」眼淚開始流出 

老豆：「其實...我真係無對家姐偏心...原諒我啦...我依家真係無能為力...」 

我：「嗯...明架啦」我搭著老豆的膊頭說

　走到公園門口後，我們再次找一個地方休息。老豆坐低後仍然一臉輕鬆，吹著口哨地望著天空。我的情緒冷靜過後，便坐下陪著老豆。休息左一陣之後，我地就開始行返屋企。出了公園門口後，老豆便看著天空說 

老豆：「其實我改過架啦...點解個天唔比個機會我...」 

我：「會有奇蹟架，唔好諗得咁負面...」 

老豆：「傑仔....我真係唔想死住...我真係好想睇住你中學畢業...」 

我：「...你一定睇到架」 

老豆：「天啊...不如你比多三年時間我啦...三年就夠架啦...」佢看著天空說 

我：「放心啦！你一定睇到我畢業...！到時你一定要黎！」眼淚再次從眼睛流出 

老豆：「讀書我信你得架...唔好衰比人睇」佢摸著我的頭說 

我：「嗯...」 

　　行多一陣左右，我就向老豆說 

我：「等你好返，我同你返大陸行山好唔好？」 

老豆：「我都好想有呢一日」佢苦笑著說 

我：「如果啊爹你真係好返...我保證唔會再打籃球...我會照顧你一世」 

老豆：「籃球你都放棄到？我知身邊有你呢個乖仔就夠架啦」佢再次摸著我的頭 

　　我們行了大約半個小時，終於看到屋企附近的一條行人天橋。雖然我們兩個汗流浹背，但老豆看到後仍然露出笑容 

老豆：「望見家鄉啦！終於行到返黎！」佢笑著說 

我：「哈...堅持到底就是勝利呀」我笑著向他說 

　　上到天橋吹左陣風之後，我們便慢慢行回家。老豆仲吩咐我今日既野唔可以同啊媽講，廢事佢擔心。我答應過啊爹後便讓他捉著我膊頭行，回家路上我仍然說一些鼓勵既說話，但老豆只說了一句回覆我 

老豆：「謀事在人...成事在天姐...」佢笑著回應我 

　　爸，如果有下一輩子，我能再次做你的兒子嗎？