[真人真事]那些年錯過的愛情: 中三５５
「飲杯先啦！！慶祝我終於脫離天SIR魔掌！！」啊山拿著杯向我們說
今日啊山約齊幾個在校既好朋友食飯，慶祝佢即將離開學校既日子。大家碰過杯後，就向啊山詢問去向
啊竹：「點呀？仲有幾日正式離開學校啦，走左之後有咩做？」
啊山：「留係屋企打返幾個月機先啦，跟住再食大茶飯」佢笑著說
我：「你想返Ｄ咩工？」
啊山：「輕鬆Ｄ就得架啦傑哥，今日咁難得約到大家食個飯，唔好講Ｄ傷心野啦」
啊森：「食完返唔返學校玩呀咁？」
啊山：「好，就你地啦」
我地幾個返到學校拎左羽毛球拍準備打之後，就見到啊螢同幾個中二女仔走去排球場。啊螢見到我地後就叫我地出去打排球
啊竹：「啊山啊傑，出唔出去打排球？」
我：「唔出啦，上次我先整喊完啊螢，廢事面阻阻」
啊山：「啊傑唔出我都唔出啦，你地去啦」
啊竹聽到後就同啊森佢地出去排球場搵啊螢，啊山就留低同我打羽毛球
啊山：「啊傑，你幾時同啊螢唔岩？做咩唔出去打？」
我：「一言難盡....話說係考試前...」
----------------- 約一個月前 -------------------
小息期間，我同啊森坐左係啊螢前面傾打機既野。我同啊森傾得興起果陣，啊螢就黎搞破壞
我：「屌你，玩30人場一定係用光光」我笑著說
啊森：「光光咁廢」
我：「你ON9咩....我...」
突然間，身後有人用筆篤我背脊打斷我既說話。直覺話比我知，只有啊螢會這麼無聊
我：「做咩呀你？」我轉身同啊螢講
啊螢：「傾計細聲Ｄ啦！」
我：「哦」
我敷衍啊螢便再度跟啊森討論打機既野，點知啊螢再黎一擊。雖然啊螢再次攻擊我，但好男不與女鬥，還是算吧。但我當退一步時，竟然沒有海闊天空，還比她踢了一腳。此時我終於按捺不住，轉身面向啊螢
我：「我屌你...」當我轉身時，啊螢的枱子被我的大動作弄趺了。櫃桶的書全部散落在地上。當我望向啊螢，看到她兩眼瞪大，雙眼通紅。係呢個 moment 我就感覺到，今次仆街啦。
啊螢雙眼通紅後一言不發，只坐在櫈上望著我。呢個時候，班上既大家姐開始走埋黎
啊詩：「幫手執返Ｄ野啦，唔洗做呀？」
黑鬼：「搞到人地喊，你係咪男仔黎架？」
「原來成件事係我錯... 女人既眼淚真係最強武器」 我邊幫啊螢執野邊想
------------------------------------------
我：「就係咁囉，果日之後佢就無咩點搵過我」
啊山：「話左Ｄ女人煩架啦...你睇下出面班傻仔」佢用球拍指著排球場
我：「哈...有你明白我咪得囉，打波啦」
考完試後學校就開始提早放學，屋企許可的話，我會到思蓓屋企睇下戲消磨一下時間。
思蓓：「羅子傑，問你一樣野」佢看著電視說
我：「下？問啦」
思蓓：「牽牛講左十大規條比相睇果個男仔就走左...好感動呀...」佢仍然望著電視說
我：「哦...你唔係話問我野咩？」我望著電視笑著說
思蓓：「係啦...你係唔係好似牽牛一樣咁了解我？」佢望著我說
我：「...做咩咁問？睇完先講啦」我指向電視
今日我們看的電戲不是星爺，不是其他港產笑片。而是韓國電影「我的野蠻女友」。看到某些情節時，思蓓便會捉緊我的手。在牽牛同女主角一起把時間囊埋了後，思蓓開始流眼淚了
思蓓：「牽牛Ｄ獨白好感動呀...佢地就係咁要等兩年...」佢捉著我的手說
呢句獨白係牽牛同女主角埋時間囊果陣講，內容大約係「兩年後我地可以再見，當我地再見果陣，我地會同依加唔同，可能我地變得更親近，更可能永遠分開，兩者只能擇一」。老實說，睇到呢到我都有小小感動，不過沒有思蓓這麼大的反應。
我：「唔知等一個人...係咪真係咁辛苦」我望著思蓓說
思蓓：「我都唔知...第日我走左，你會唔會好似佢咁等我？」
我：「真人點會同拍戲一樣呀，傻妹」我笑著說
思蓓：「哼....咁你係套戲入面最鍾意邊個情節？」
我：「逃兵果段囉，幾好笑」我笑著說
思蓓：「...伸隻手出黎！」
我聽到後便乖乖把手伸出，我知道我一定係佢面前講錯野。主動接受懲罰比較好。我伸出手後，思蓓便在我手上咬左十幾秒先放口
我：「啊！！！我屌！！」我躺在床上大叫
思蓓：「你真係一Ｄ都唔浪漫，竟然唔係後面最好睇」佢瞪著我說
我：「又無啦啦咬我...你根本同戲入面個女主角無分別...」
「唉...其實我只是說笑...我最鍾意就係後面果段情節」我心中想著
睇完呢套戲之後，我同思蓓都靜左落黎，大家都好像諗緊野一樣。訓左係床上既我係到諗，思蓓走左之後，我地仲可唔可以相見？可唔可以好似戲中男女主角一樣再度重逢？不知怎樣，我感覺思蓓走了就不會再遇見她。不會再遇見一個對我好的女孩。
「我地將來會點？」 可能會像戲中所說...可能我地會變得更親近，更可能永遠分開，兩者只能擇一。這個問題一直出現在我腦海裏，揮之不去....