[真人真事]那些年錯過的愛情: 中三３２
不知過了多久，醫生宣佈病情後離開了。大部分親戚聽完後都哭了，有的親戚還在安慰我啊媽。雖然我什麼都聽不到，但看到大家的樣子也心裡有數。我見病房內開始少人，我便走入病房搵老豆。
我：「啊爹，做完手術啦？」
入到病房後我假裝什麼都不知道，啊爹聽了後便點了一下頭。坐了一會，佢就慢慢問我問題
老豆：「傑仔，今日唔洗打波咩？」佢笑著低聲說
我：「唔打啦...你開完刀唔好講野啦」
老豆：「咁乖呀...冇野喎，辛苦小小姐」
雖然啊爹的聲線比平時弱了，但大家都把握機會傾計。自我出生以來，我很少有機會真正同啊爹傾計。啊爹的工作很忙，平常返夜更放工返到屋企已經係深夜。返早更比較好，可以有時間一家人食過晚飯。我升上中學後，便迷上了籃球這項運動。自此經常夜歸，相處的時間也少了。雖然中一的時候比啊爹責罵過，但佢最後都比我繼續。呢幾年入面，大家認真傾計既次數，我想還不超過十次。
後來，家姐放工也來了。佢知道啊爹病情後就立即問
家姐：「做咩搞成咁...癌症...」
老豆：「係呀，做手術都救唔到我，哈」佢無奈的笑了一笑
家姐：「Ｄ親戚係出面走廊安慰啊媽情緒..我同肥傑陪你傾計啦...」
啊爹聽後便點一點頭。雖然話就係我同家姐陪佢傾計。但事實係多野講既家姐搶埋我既發言權同老豆傾計。雖然我坐係到一粒聲都唔出，但見到老豆同家姐傾得咁開心，我心中都安慰了一些。啊爹這個笑容，我不知道尚有多少期限，但我正在保存在我的腦海裹。
返到屋企樓下，我便看見一個女孩在燈柱下踱步，這個女孩看見我後便慢慢走上前。她走近後，燈光的投射把她的臉放清楚了。原來是思蓓
思蓓：「不如...一齊出去行下？」
我：「哦...好呀」
我向家人示意後便跟思蓓離開。今日大家都無踩單車出黎，於是我地決定上橋傾計，因為呢到夠寧靜，更可以比大家傾下心事。我同思蓓行去橋期間大家都有話題，但我有時望過去會發覺思蓓臉上好凝重，好似有Ｄ唔開心。雖然我知道老豆有事，但我臉上仍然掛住笑容面對佢。去到橋上面，思蓓看著街外風景對我說
思蓓：「你媽咪同左LULU姨講啦..佢都有話比我知你爸爸..」
我：「哦...原來你都知啦..」
思蓓：「點解？點解你唔同我講？」佢眼紅望著我說
我聽到後只是嘆了口氣，然後望向街外。
思蓓：「唔開心你要同我講呀...羅子傑」佢打一打我隻手
我：「嗯，我會架啦」
思蓓：「你不如答應我一樣野，好好照顧你爸爸」
思蓓開始細聲哭著，但佢假裝沒事發生一樣，仍然望著街外的風景
我：「我會架啦...我會抽多Ｄ時間陪佢」
思蓓：「你爸爸...比到我一種父愛既感覺...而你，就比到我一種男朋友既感覺...」
我：「我邊有對你咁好...成日美化我」我邊笑邊說
思蓓：「你自己當然唔知啦...你又唔係我...」
當我想回答思蓓，佢就對我說
思蓓：「啊傑..我三個月前咪話過...我想係我三個月後生日當日聽到你既答案。你記唔記得？」
我：「我緊係記得啦...而且我已經...」
當我想講，思蓓已經打斷了我
思蓓：「依加...依加我唔想你答我啦」佢邊哭邊說
我：「...你唔係想知呢個答案好耐？」
思蓓：「依家我只係想你專注陪你爸爸...等佢好返，我先要知道你既答案！」佢望住我笑左一笑
我：「我依家開始要照顧我老豆...可能無時間搵你架啦...你真係想再等？」我也開始想哭
思蓓：「我會陪你一齊照顧佢，直到我離開香港為止」
我聽到後二話不說，轉身把思蓓抱在懷內。
我們兩個人就這樣擁著，什麼話也沒有說。思蓓一句說話，已經將我深深打動。大家相擁後，我也不經意在她背後流了眼淚。呢段時間思蓓只是攬著我，輕輕拍我的背
思蓓：「你想喊就喊啦」佢邊哭邊說
我：「你喊姐...依家屈埋我」我擁著她笑著說
思蓓：「唔洗扮野喎...依家我地攬住，我睇唔到你個樣架...羅子傑」
我：「我只係覺得...你對我太好姐」
思蓓：「傻啦...攬完開心返Ｄ未先？」佢在我背後笑著說
我：「開心返晒啦...多謝你安慰我」
思蓓：「以前唔開心果陣有你陪我...依家到我啦...」佢以沙啞聲線說著
我：「因為我地係...好朋友」我笑左一笑
思蓓聽了後便放開了手不再擁著，佢放手後捉住我的手說
思蓓：「羅子傑！你記住唔開心一定要同我講。你呢Ｄ虛假既笑容我一眼就睇得穿！總之以後我會同你一齊照顧你爸爸，你唔洗擔心」
我：「得啦，知你對我好啦。夜啦，送你返屋企啦」我笑著說
思蓓：「哼...邊行邊傾啦」佢拖著我開始行
思蓓捉住我隻手後並沒有放手，我們倆就這樣拖著走到她的家。雖然我沒有告知她，我的答案。但大家的感覺絕不是好朋友那麼簡單，我也相信她知道我的答案。在這段日子得到思蓓的照顧和開解後令我情緒正面了少許。在爸爸患病這件事中，我已經找到一個全然愛我的人。