[真人真事]那些年錯過的愛情: 中三３０
雖然已收到老豆轉院後的來電，但夜晚晚上因為今日呢件事令到我失眠。於是我打算去客廳睇電視，經過媽的房門外時聽到入面傳黎既哭泣聲，我諗佢一定好擔心老豆既情況。我坐左係客廳睇左陣電視就開左部電腦。上MSN果陣就見到兩個人上線。其中一個係啊嘉，我上線之後佢就立即離左線。第二個係啊螢。我上左線之後佢就振一振我
我：「振咩呀？咁夜既」我向啊螢說
啊螢：「訓唔著。做咩咁夜？」
我：「我都係訓唔著」
啊螢：「同我傾計」
凌晨兩點左右，由於得啊螢一個上左線我就逼住同佢傾下計。傾計當中我仲發現深夜既啊螢講野好正常，一Ｄ都唔似平時既佢。傾左一陣佢仲問我一個問題
啊螢：「你近排係咪唔開心？」
我：「冇呀，做咩咁問？」我思考左一陣先答
啊螢：「扮」
一個字既回應令我唔知點應佢，我無理到佢之後就上左網站睇日誌。點知佢又振一振我
啊螢：「講啦」
我：「我冇唔開心，點講姐」
啊螢：「咁算」
我：「傾第二樣啦」
啊螢：「可能我平時睇錯，OKAY」
呢兩個鍾入面同啊螢傾左好多唔同既話題，佢係夜晚真係唔似平時既佢，完全唔似係學校成日窒我果個啊螢。但啊螢點解會知道我近排唔開心？我印象中係學校入面佢只會煩我同阻住我訓教。唔通佢有留意我？呢一個對人忽冷忽熱既女生真係令人摸不著頭腦。
老豆轉左院後就無再好似前幾日咁，換左醫院後人精神左，這絕大部分跟醫院質素同設備有關。屋企人知道老豆情況冇咁差就鬆左一口氣，而且醫院更決定過兩日同老豆開刀做手術。醫院斷定只係一些小問題，大家聽左後就無好似之前咁搶心。啊媽聽到情況無咁差都開心左小小。
老豆做手術前一日，就係學校中五最後一日上堂。今年中五跟以往既師兄師姐一樣，上堂時間係學校周圍玩Ｄ低年級，拎足球省尻人。不過呢Ｄ主要都係師兄所為，師姐當然周圍搵人影相，紀錄低自己青春既樣貌。小息期間我同啊竹落去食野果陣就係樓梯撞到啊魚
啊魚：「羅子傑...」佢拎相機說著
我：「魚姐...今日走啦喎...」我向她打量著
啊魚：「係呀...」
我：「你今日打扮過黎？你好似靚左」我微笑住講
啊魚：「咁耐無見就讚我？不如...同我影返張相」佢低著頭說
我聽到啊魚咁講就答應左佢。啊魚比左部相機啊竹後就開始影
啊竹：「準備...1....2.....啊傑你笑下啦，企咁開做咩姐」
我：「我唔識笑架喎...唉得啦」我企近啊魚後微笑住伸左個V字手勢出黎
啊魚見到我笑又跟住我做左一個V字手勢
我：「喂喂...你都會做呢Ｄ樣架咩？」我笑住講
啊魚：「最後一日...有機會同到你影相緊係要做Ｄ低Ｂ野啦...學界三分王！」
我：「你都係三分王姐，哈」
見到啊魚做埋Ｄ平時唔會做既野就令我笑得更開心，最後我地兩個笑得好燦爛，伸左一個V字手勢影左呢一張相。不過呢一張相只有啊魚擁有，呢個畫面亦只能成為我腦海中的記憶。
啊竹：「1....2....3....！笑！」
下午食完飯第一堂，我係班房睇緊小說果陣，突然聽到啊單係班中大叫
「出現了！！」啊單係班中大叫著
大家聽到後都把目光投向啊單。當我望向啊單時，就見到有一個長髮女孩企左係課室出面既走廊到。呢個女仔就係啊希。佢見到我望出去後，就揮手叫我出去影相。不過我做左一個唔可以既手勢，因為依家上緊既係天SIR既堂。擅自走出課室只會死路一條。啊希見到我唔出，就拍左兩下門入左黎
啊希：「天SIR，我想搵一個人。羅子傑！出黎同我影相！」佢係門口叫著
大家見到啊希咁大膽衝左入黎就係到歡呼。班中既情況可以用兩個字－失控黎形容，我更聽到好多同學羨慕和不滿既聲音。
「點解佢會搵羅子傑影相？」
「羅子傑條女黎架？好正喎」
「屌，啊傑條撚樣收收埋埋」
過左幾秒，天SIR就叫全班肅靜，當大家以為佢開始發火果陣，佢就慢慢道出一句說話
天SIR：「我睇唔到有人離開課室影相，我比五秒你消失」
大家聽到天SIR咁講就再次歡呼，不論男女都食住花生睇戲。我聽到天SIR咁講就立即跑左出去，出到走廊後，啊希就拎左部電話出黎
啊希：「最後一日，同我影幾張相」佢微笑住講
我：「好呀...」我怕羞地說
啊希：「自拍啦不如，我渣機！你要扮可愛架喎！」
我：「點扮呀？我都唔識..」我笑著說
啊希：「得架啦！黎啦！準備，笑！」
啊希自拍左幾張之後先滿意，佢同我影相期間班房不斷傳出奇異既目光，直覺話比我知再影落去一定會引起大新聞。當我想走果陣，啊希就拖住我隻手行左去後樓梯
我：「去邊呀？」
啊希：「我搵緊人幫我地影一張呀，今次我要拖住你隻手影」佢邊笑邊講
我：「下...拖住我？」
啊希：「有咩問題？我當左你係我細佬一樣架啦...呢兩年好開心識到你呢個...無膽既小朋友」佢笑住講
我：「我都係丫...四眼姐姐..」我向佢報以一個微笑
啊希：「勁喎，仲記得我以前個頹樣」
啊希搵左人之後，佢就企得好埋拖住我影左一張相。雖然我最後真係做左啊希契弟，但係呢張相顯得我地好似一對熱戀中既情侶一樣。大家結果都係做唔到男女朋友，但對於我呢個肥仔黎講已經擁有左一段美好回憶。直到現在，有時候我一個人靜下來時都會想，如果時光倒流，我會否有勇氣向啊希表白？那一段在牆上寫歌詞，打籃球，SMS盡訴心事的回憶已經成為歷史，有空便讓我重溫一番。
轉眼間就三年...又多左幾個相熟既朋友離開學校。我日後離開學校，剩下的會是美好回憶嗎？