[真人真事]那些年錯過的愛情: 中三２９

啊螢：「唉唔玩囉。其實我想問點解今日會係醫院見到你？」 

「唔係掛，咁都撞到啊螢？」 

我：「你幾點撞到我？」 
啊螢：「五點半左右啦，你睇醫生？」 
我：「係呀，你都係？」我懶得同佢解釋 
啊螢：「我陪我啊媽睇醫生...」 
我：「哦...佢仲有冇事？叫佢休息多Ｄ」 
啊螢：「無...你都要」 





　　我同啊螢傾左一陣就無傾。過左幾日放假果陣有班親戚黎左我屋企。我地一大班人睇緊電視同傾緊計既時候，啊媽收到一個來電後就神色大變。

啊媽：「醫院打黎...話佢依家好辛苦...可能頂唔到今晚轉院」啊媽吞吞吐吐說出 
姑丈：「我依家車你地去醫院啦...行啦」 
啊媽：「我唔去啦...你地去」 
姑丈：「咁我老婆係到睇住你啦...行啦家姐，傑仔」 

　　我地去到醫院果陣，老豆個肚就比前幾日更加大。今日佢既面色比之前更加差，連強裝出來的笑容也收起了。臉如死灰訓在床上，我地三個到左果陣佢只係叫左我地，之後就無講多餘野。我地四個係到企左幾個鐘都係傾下計，但老豆因為辛苦就極少講野。差唔多走果陣，老豆慢慢地就向我地三個講 





老豆：「家姐...實習好忙？」佢笑住向家姐說 
家姐：「係呀...啊爹...」 
老豆：「比心機讀書呀...」 
家姐：「得架啦」佢拍一拍老豆的手 
老豆：「屌你四眼仔，好好照顧你老婆」佢笑住向姑丈說出 
姑丈：「咁長氣架，你放心喎」 

　　佢地講左幾句後就先離開病房，而我去完病房個廁所後先同老豆講再見 

我：「啊爹，我地返屋企先啦」 




老豆：「嗯..快Ｄ走啦...」 
我：「好啦你早D休息，今晚轉院架啦」我扮無事準備開始走 
老豆：「喂，傑仔」佢揮手叫我行埋去 

老豆：「我好似未睇過你打波...打場好波比我睇！」佢捉住我隻手 
我：「我一定會...打比你睇...你快D出返黎睇我贏波..」我強忍著眼淚說出 

　　坐上私家車返屋企途中，我自己一個坐係後座偷偷流下幾滴眼淚。老豆簡單既一句說話已經令我好想喊，唔知點解我會覺得佢睇唔到我打一場好波。返到屋企後啊媽聽到老豆無事後就冇咁擔心，而我食完飯就返左入房諗老豆果句說話。一諗到佢訓係病床我就好不安，於是我就傳左個訊息比佢 

我：「啊爹...快Ｄ出院，我愛你」我在電話中發出 

　　由於我老豆唔太識運用電話，我以為佢唔會回覆我。點知過左一個鐘左右，就收到佢既回覆 

老豆：「我也愛你」 





　　望住呢個訊息，再諗返佢今日同我講既野，我再一次係房中偷偷流下眼淚....