[真人真事]那些年錯過的愛情: 中三０８

中秋節過左之後，又係返學校呢個人間煉獄上堂既日子。自從上次見到啊希同個張權係後樓梯攬腰之後，我同啊俊都會係小息果陣故意行去啊希果層樓，睇下會唔會見到個日類似既事件。但我地次次行去啊希果層果陣，只係見到啊希係走廊問條四眼仔功課，無好似果日後樓梯咁明目張膽，可能因為多人既關係吧。 

　　至於啊俊，佢好似比我更加關心呢件事咁。雖然呢個月我見到啊希同個四眼仔行得好埋，又無意中比我見到佢地攬腰。但唔知係咪我一早認定左佢係同啊洪一齊，反而無咩特別感覺。對我黎講，只係驚訝點解唔係啊洪，而係四眼仔得米。 

　　有一日放學，我見落雨無波打就去左思蓓屋企搵佢。幸好佢返左屋企，如果唔係真係白行一趟。 

我：「好彩你係屋企...差Ｄ摸門釘」 
思蓓：「你今日行運啦。係啦，星期六你屋企係咪去LULU姨屋企燒野食架」 
我：「係呀。佢搵左我老豆啦。唔好講廢話，開套戲黎睇下先」 
思蓓：「ER...睇頭文字D啦！上次你問咩係８６，睇完你就會明８６係咩」佢笑住同我講 




我：「好呀，你開啦」 

　　我以為呢套野頭文字Ｄ係卡通，點知係一套電影黎。戲中男主角仲要係周杰倫，雖然周杰倫係我偶像，但係戲入面有個杜汶澤更加吸引到我。頭文字D，杜汶澤才是主角。睇完戲見仲未到食飯時間，我同思蓓就去左路口天橋傾計。上到天橋，佢第一句就問我 

思蓓：「羅子傑，你摺心心送比佢果個女仔依家點呀？」 
我：「下，做咩無啦啦咁問？」

思蓓：「我見你好耐都無提起佢...咪問下你囉」 
我：「咪又係咁」我笑左一笑應佢 
思蓓：「你知我咁多野，依家叫你講小小都唔得咩！」 




我：「咁你想知Ｄ咩呀蓓姐」 
思蓓：「ER...你近排同佢點呀？有冇咩進展？」 

　　既然佢問到，我就略略地講左我同啊希之間發生左Ｄ咩事，今個月係ＦＢ見到段野同有個男仔攬住佢等等。佢就係我隔離一邊聽一邊嘆氣 

思蓓：「你真係好無膽。聽你講你都錯失左幾次機會咁...做咩之前唔表白？」佢啤住我講 
我：「講左又點姐...就算拍拖我又唔覺得會照顧到佢...況且依家我都唔太鍾意佢啦」 
思蓓：「你都識話之前佢唔介意你細過佢啦。你又介意佢點睇你？點解唔試下一齊？」 
我：「算啦。暑假開始後我同佢都傾少左好多。學期尾又傳過佢同我另一個隊友一齊...我點敢表白姐」 





　　大家靜左一陣之後，思蓓就講 

思蓓：「唉...羅子傑。應承我，如果你有一個好鍾意，好鍾意既女仔...你一定要同佢表白，同佢講清楚」佢無啦啦講出口 
我：「做咩講遺言咁呀？好似有Ｄ意思喎」 
思蓓：「如果你鍾意果個女仔...佢心入面都係鍾意你...但因為你既無膽同懦弱...最後無講出黎而錯過左...你唔會覺得好可惜咩...」 
我：「你真係好為我著想，好似我一個小學同學...」我望住佢講 
思蓓：「...我都想你幸福，有女朋友架。如果唔係我第日走左你一定好寂寞...哈」

我：「你走左會返黎搵我架MA。上車啦，我要踩你架車返我屋企」 
思蓓：「我先唔搵你...你咁無膽。姐係一陣你走左之後要我自己一個踩返我屋企？」 
我：「安全架啦，停左雨咁耐。地下濕左小小姐」 
思蓓：「唉...要我自己一個踩返屋企」佢邊講邊上車 
我：「講笑昨，我車你返屋企啦。之後我自己行返去」我開始踩去佢屋企 
思蓓：「做咩無啦啦咁好人？轉性呀羅子傑？」 
我：「見你今日同我傾下計，咪車你返去囉」 




思蓓：「算你識做啦！」佢係後座捉住我條腰 
我：「捉住好啦！唔好篤我條腰呀！一陣有交通意外」 
思蓓：「得啦啊木..你真係好長氣」啊木係頭文字Ｄ入面杜汶澤既角色 
我：「我先唔做啊木..我要做拓海」 
思蓓：「算啦你！你連人地0.01%都唔似。似既地方咪細眼單眼皮囉！」 
我：「成日窒住晒...你唔悶架咩」我邊踩邊講 
思蓓：「嘻，窒你點會悶架」 

　　車左佢返屋企之後我就自己一個行返屋企。睇一睇電話已經係夜晚八點幾，估唔到已經同思蓓傾左咁耐。返到屋企之後都係挨罵了。但今日知道思蓓咁關心我，心入面有一種莫名既高興。