[真人真事]那些年錯過的愛情: 中三０９
星期六夜晚，除左家姐外，我地一家三個人去左LULU姨屋企燒野食。人數同上次一樣，只不過今次係多左思蓓媽咪係到。今次聚會我地就當係補捉中秋節活動，燒野食外都有掛Ｄ燈籠係花園到。就算過左正日，仍然充滿中秋既感覺。
思蓓：「啊傑...記唔記得我第一次點叫你？」大家燒緊野食時，佢邊燒野食邊講
我：「緊係記得啦，你第一次叫我咪係２４號仔囉..」我細細聲應佢
思蓓媽咪：「唔好怕羞啦！多Ｄ同我個女傾計啦！」
我：「好呀..」我向佢媽咪點一點頭
思蓓：「嘿..外賣仔..」佢係我旁邊細細聲講
我：「收聲啦你！」我篤一篤佢條腰
其後，我老豆同LULU姨企埋左一邊食煙。我燒左一大堆食之後就拎比佢地兩個
LULU姨：「傑仔真係乖姐」佢食住煙講
老豆：「乖啦，但係我食唔落呀。你食啦」吉左條腸就無食
我：「哦..好啦...」
燒多一陣野食後，我都差唔多飽得七七八八。呢個時候，LULU姨就拎左一袋野比我
LULU姨：「拎去放啦傑仔，孔明燈玩過未？」
我：「未呀...犯法架喎」
老豆：「村屋無人理架啦，放幾隻冇人知」
思蓓：「你又驚呀？？」佢係到煽風點火
我：「玩咪玩囉，邊會有人拉架」
我老豆教左我點玩之後，我就同思蓓係花園一個角落準備放。岩岩點著火果陣，需要一Ｄ時間等佢升。思蓓就係呢段時間係LULU姨屋企拎左兩支筆出黎。
思蓓：「我地寫自己願望上去，孔明燈飛左上天就心想事成！」佢好興奮咁講
我：「係咪真架...」我接過筆後半信半疑
「一齊入ＨＫＵ！！」突然有一大班人在花園外叫著
我：「咦，出面都有班人玩喎」我望去花園外的空地
思蓓：「你睇下佢地果隻啦，都有寫野架，我地把握時間啦！」
寫左兩分鐘左右，我地估計孔明燈差唔多升得。我同思蓓寫完之後就輕輕捉住孔明燈頂上既角，等佢升得起就準備放手。我係燈上寫左四個大字「友誼永固」。而思蓓果邊就唔知寫左Ｄ咩。
老豆：「你地捉咁耐，升得架啦。放手啦」佢係花園另一邊叫著
我同思蓓聽到後就放左手，睇住孔明燈慢慢升起。孔明燈愈升愈高，直到變成天上發光的一點。我望住天上呢盞燈，思考緊係咪真係咁容易就心想事成。不過呢Ｄ野，大家開心就得啦。
我：「思蓓，中秋節快樂」我望住天上笑住同佢講
思蓓：「哈...羅子傑，中秋節快樂」佢都笑住回應我
「聽日就係第一場學界，大家記住準時同剪指甲！」
我地：「收到！」
踏入十月之際，代表籃球學界正式開始。聽日就係我校男女籃第一場比賽。男仔打上午時段，女仔打下午時段。今年籃球隊又轉左教練，由女教練轉返做男教練。呢個男教練怕怕羞羞，大聲小小講野都會面紅。今年中三入籃球隊既人依然得我，豬皮同湯尼。雖然我有邀請啊單同啊竹加入，但都比佢地拒絕左。
練完波之後，我同豬皮就決定留低射波。教練講完野叫佢地開始解散之後，啊魚就走埋黎同我傾左兩句
啊魚：「啊傑，聽日你朝早打完，睇唔睇埋我地晏就個場？」
我：「睇呀，啊俊都會黎。你打埋今年學界就專心溫書，緊係睇啦」
啊魚：「好啦，聽日再見啦」講完佢就行走左
當佢走左之後，我先諗返件手信仲未比佢。我成日等佢走左先記得呢件事。當教練宣佈解散後，啊希就拎左袋衫去女更換。啊嘉就同湯尼去左第二個場射波。啊希同啊嘉兩個表面上仍然係隊友，但其實練習入面佢地根本冇溝通過，完全唔似以前既佢地。見到佢地兩個冇講過野，我漸漸相信啊嘉係學生會選舉填廢票既事。
我同豬皮練緊射波果陣，啊洪無啦啦行埋豬皮到，跟住係到彈佢條撚
啊洪：「我屌你，迷你撚！？」
豬皮：「做咩呀！？」佢開始跑走
啊洪：「你心照啦，咪撚走呀」佢又追住肥皮
「哦，原來係我出賣豬皮個件事，令到啊洪追住佢條撚黎彈」
第二日到球場熱左身之後，差唔多比賽開始前十分鐘。乙組籃球隊最強既啊格竟然仲未到，直到比賽開始到完結，佢都無出現。今場由於太早太熱，黎睇既觀眾得啊魚，啊希，啊俊同豬皮。啊魚仲渣住佢部新機幫我地錄比賽影片。由於教練無選豬皮打學界，所以佢只能當觀眾的份。今場對我黎講有特別意義，因為對手就係中一令到啊單受傷果班人。如果贏到佢地，就可以正正式式幫啊單報仇。可惜的是啊格不在，令我地失去一個強勁的得分高佬。
比賽開始後，開始時還可以跟對面打成平手。但我地冇左啊格，全隊既得分責任就落係我身上。相反，敵隊比兩年前更加進步，場上五個位置點點開花。打到半場就將分數慢慢拉開，我地更加處於劣勢。休息期間更聽到幾名隊友細細聲講我
「條友上年打甲組。打比賽唔係好勁昨喎」
「佢係學校就勁...」
自從打返落乙組之後，一直都受盡某幾位球員冷言冷語。只要你達唔到佢地要求，你就會係背後比佢地批評。呢個亦都係我唔鍾意某Ｄ球員既原因。中場休息果陣，教練講完野，湯尼就走左出去射一球三分，呢一球入左仲要穿針。返到黎佢就同教練講
湯尼：「啊SIR出我啦，我今日手感好」
教練：「得啦，你坐多陣先啦」
下半場開始之後，打左十分鐘就由落後七至八分變到十幾二十分。教練見正選打得差就換左Ｄ二線球員入黎。包括北仔同DAVID。教練仲叫我係場上做領導帶住佢地拎下經驗。打到最後一分鐘左右，已經落後二十分。基本上比賽已經完結。但係殺人王北仔五犯，令教練換左湯尼出黎。
湯尼：「坐左咁耐終於有得出場啦」
我：「依家先出...」
當湯尼由後備席出黎跑左一個來回，球證哨子就響左，比賽正式完結
湯尼：「下？完場啦？我波都未掂喎！」佢係場上對我說著
我：「你汗都無出到啦」我氣喘著說
學界生涯第二次輸比呢班仆街，仲要輸二十分。本身心情唔多好，但聽到啊希同啊魚既對話，令我係失落中笑返
啊希：「湯尼哥，你出左幾多秒？」佢笑住走埋黎問
湯尼：「一兩分鐘啦」
啊魚：「我有影片呀，睇下先」
啊魚睇左一陣之後就答湯尼
啊魚：「你邊有一兩分鐘！得２１秒昨喎」佢笑住同湯尼講
啊希：「湯尼，睇黎你返到屋企唔洗換衫。乾既」啊希篤一篤佢件波衫
湯尼：「妖。我手感好佢都唔出我昨」
「無運動細胞之外仲要比人笑出得２１秒。我係湯尼既話真係自動退隊算」我心中想著
湯尼：「屌，下次有我落場贏硬啦」
豬皮：「收皮啦。今場輸先出你昨」
我地收拾好物品後，我就同豬皮，湯尼，DAVID，啊俊五個人平排行，準備去食午飯。尾隨我地既係啊魚，啊希同啊洪。其他隊友打完比賽後就各自解散。我地五個行到去一間餐廳門口後，望左兩眼就決定入去食。入去之前，啊希同啊洪同我地講左再見就兩個人行走左。
我：「啊魚，食唔食LUNCH？」
啊魚：「唔啦...我返屋企食」
我：「咁一陣見啦，晏就睇你比賽」
啊魚：「嗯好啦，一陣見」
我地五個食完野之後就去左籃球場打波，打到女籃比賽差唔多開始，我地就埋位坐定定睇波。未開波之前，啊俊佢地係到討論緊Ｄ女
啊俊：「睇下啊希，平時練波佢都唔紮頭髮。今日比賽終於紮啦！」佢好興奮咁講
豬皮：「平時係學校唔紮頭髮既女，今日都紮頭髮。原來佢地紮頭髮係咁吸引」
湯尼：「啊希好正喎！對腳白撚到呀」
DAVID：「啊傑，我地坐第二張櫈。佢地三個變態自己坐」佢拉走左我
比賽開始左之後，我地五個觀眾就係到幫佢地打氣。比賽開始後女籃一直落後，啊俊就話
啊俊：「我地係時候擾敵啦」佢企左起身講
豬皮：「點擾敵呀？」
啊俊：「屌，睇野啦你一陣」
過左一陣，對面隊有個女仔係場上近觀眾果條邊線拍波過場果陣。啊俊就講
啊俊：「靚女，我想渣你波呀！」佢好淫賤咁講
我：「屌，性騷擾！？」
呢個女仔聽到之後就啤左啊俊一眼。之後就無再望過黎。下半場開始左一陣，對面有個女仔射罰球，啊俊又講埋Ｄ衰野
啊俊：「你入一球比我屌！兩球都入就更加要比我屌！」佢一邊笑一邊講
豬皮同湯尼坐係佢隔離，聽到之後就跟住啊俊一齊笑。我同DAVID望住佢地三個Ｏ撚左咀，十幾秒後，暫停個陣球證就過左黎我地呢面
球證：「喂，你三個邊間學校架！？」佢問啊俊果張櫈
我同DAVID聽到球證無啦啦咁問就係到偷笑。啊俊佢地三個就啞口無言咁望住球證。
球證：「你地唔好再比我聽到你地侮辱球員！？清楚未！？」
啊俊：「得架啦..對唔住...係我地錯...我地唔再亂講野...」佢企左起身向球證道歉
球證聽到後講左兩句就去返場上準備比賽。豬皮同湯尼兩個人就係到細細聲屌啊俊，啊俊只係以傻笑回應。佢地三個比人罵完之後真係靜左好多，令到我終於有睇波既感覺。雖然落後好多分，但係佢地仲未放棄。望到啊MAY傳左個波比啊魚，見佢拎住個波係三分線好似唔夠膽射個波出去咁。我就開聲同佢講
我：「放膽射啦！！啊魚！！」我係場邊大聲叫
啊魚聽到我之後就射左個波出去，最後個波應聲入網，後備同場外觀眾就為佢歡呼。見佢跑緊返黎回防，我就企去場邊伸隻手出黎，佢見到我伸隻手都主動埋黎拍左我一下。如果佢無視我就柒撚死
我：「頂住呀！仲有幾分鐘！」我伸隻手出黎
啊魚：「嗯！」佢拍一拍我隻手
拍完手之後，啊俊呢把賤口又係到講野
啊俊：「我係啊傑身上，見到陳SIR既影子」
湯尼：「屌，又提起呢個傻佬。啊傑邊似條友」佢好憎陳SIR
啊俊：「嗯...食女方面」
我：「屌...你收下口啦」我細細聲講
比賽完左之後，女籃雙方就係場上握手。我地學校女籃大約輸十分左右。教練同佢地訓話完後，啊魚就走左過黎
啊魚：「多謝你..比勇氣我」
我：「嗯...岩岩果球三分？傻啦」
啊魚：「我一直都唔練波去到溫書，今年學界好怕成為負累，估唔到我會有貢獻...哈哈」佢由心而發笑出黎
我：「女籃三分王都咁謙虛！？」我笑住同講
啊魚：「我係女籃三分王？咁你咪學校三分王？」佢笑住回應我
傾多陣計，啊魚話有野做之後就走左，我地五個都決定返屋企。點知去到球場外就見到啊希同啊嘉岩岩嗌完交。啊嘉就嬲到走左，啊希就行左過黎搵佢細佬
DAVID：「做咩事呀你兩個？」
啊希：「無，我同佢嘈比賽野姐。走啦」佢同DAVID講