[真人真事]那些年錯過的愛情: 中三０７

中秋節前一兩日，我係課室上經濟堂期間太無聊下同老師講去廁所。去完廁所爆石之後，就周圍行HEA下時間，行行下見到啊俊拎住疊簿。問佢之下原來佢以拎簿去教員室為名，但其實去左周圍行走堂。我地兩個山水有相逢下，就由一樓行去六樓，六樓又行落去一樓咁消磨時間。我地兩個拎住Ｄ簿傾住計咁周圍行，比訓導老師見到都有個藉口吹下。我地由二樓前樓梯行去後樓梯果陣，啊俊無啦啦拉住我 

「啊傑，你睇下後樓梯」啊俊係走廊拉著我說 
我：「做咩撚野呀，有咩睇呀？」我望去後樓梯 

　　我望去後樓梯，見到啊希同一個男仔企左係到。我驚比啊希發現，就拉左啊俊入一個暫時無人用既課室入面。我地打開走廊個窗後，就伸個頭出去聽下佢地講咩。 

我：「啊春，聽到Ｄ咩呀？我隻耳廢架喎」我細細聲同佢地講 
啊俊：「屌你啦，英俊個俊呀。果個男仔好似係選學生會衰左果個會長黎」 
我：「係咪架四眼仔，唔好老點喎」 


啊俊：「係呀頂你，應該係啊希之前選學生會果個會長黎。太遠聽唔到佢地講咩」 

　　後尾聽唔到佢地講咩之下我就放棄左，坐左係其中一張桌上面。啊俊就係到偷聽，呢段時間大約維持左幾分鐘 

啊俊：「喂，有野睇！過黎啦！」 
我：「做咩呀？」我行去走廊個窗到

當我地伸個頭出去睇，就見到果個男仔從後攬住啊希。呢個男仔岩岩高啊希一個頭，帶住眼鏡。由於太遠睇唔清楚佢個樣，不過我好肯定果個女仔就係啊希。啊希比佢攬住條腰都無反抗，反而笑住咁捉住佢隻手。不過仍然聽唔到佢地既對話。 

啊俊：「無啦無啦，之前有啊洪，今日又有呢個四眼仔。你地籃球隊最正果個都比人食埋」 


我：「唉...當睇唔到啦，走啦」我拉住啊俊衣服 
啊俊：「唔得！我一定要睇清楚佢個樣！中二果陣我就知你鍾意啊希啦，你輸都得。但唔好連輸比邊個都唔知丫！」 
我：「咁點呀？你依家行埋去問條仔叫咩名？」 
啊俊：「得啦，交比我！食飯果陣話你知！我會搵佢個名出黎」 

　　啊俊講完之後就拎住疊簿走去後樓梯，後樓梯既啊希同個四眼仔見啊俊走緊埋去就無再攬住。啊俊行到佢地身邊果陣望左佢地一眼。佢事後同我講返，食飯果陣佢利用自己係領袖生既權力，把岩岩攬住啊希果個男生做一次學生相，名字的全校校對，終於比佢搵到個名。但係佢堅持食飯坐低先肯講 

　　幾經辛苦等到去食飯時間，啊俊今日都走埋黎同我，啊竹，啊山食。傾既話題都係圍繞住今日件事，當然啊竹同啊山咩都唔知。我地到左一間餐廳後，啊俊就開始講 

啊俊：「今日比人攬住果個女仔...真係啊希黎」 


我：「估到啦..果個男仔呢..」我反而無咩點失望 
啊俊：「果個男仔咪就係衰左果個會長囉！條友中六，叫張權」

我：「張權？條友個名咁撚ON9既」 
啊俊：「依家點呀？睇住條四眼仔溝左啊希？」 
啊山：「屌你都係四眼仔喎」 
啊俊：「屌你！啊傑依家點呀？」 
我：「睇定Ｄ先啦，可能有Ｄ誤會」 
啊俊：「咩都唔撚做呀？以為你會有行動，平時你咁夠膽」佢個樣仲擔心過我 
我：「我對住女仔就無膽架啦..食野啦」 

　　當日返到屋企，我就自己上網申請左個Facebook。聽啊金講加左人做朋友就睇到野，我決定開黎睇下啊希有咩野打過出黎同有咩相片。搞左好耐，終於加晒Ｄ我識既人。到左夜晚九點左右，啊希就確認左我個交友邀請。我禁入去佢果到睇，睇到好多唔同既近況同相片，全部都係圍繞住學校既人同事，仲睇得出佢幾有人氣。 

　　睇到九月頭左右，見到佢打左一段歌詞，歌詞下仲有一句野 



「那溫熱的牛奶瓶在我手中握緊　有你在的地方 我總感覺很窩心 
日子像旋轉木馬 在腦海裏轉不停　出現那些你對我好的場景 

我知道的，這不是愛情。我會尋找另一段有勇氣去愛既愛情」 

　　啊希打出黎呢首歌係張韶涵既親愛的那不是愛情。但呢個近況背後有咩意義呢？係咪暗示左佢同啊洪拍過拖，而且分左手呢？望住呢段野，我真係Ｒ爆頭都諗唔到佢想講咩。