[真人真事]那些年錯過的愛情: 中三０６

第二日午飯時間，MISS NG真係遵守承諾請我地食飯。岩岩落堂佢就係班房門口等我同啊竹，最後我地仲叫埋啊山去，逼MISS請埋佢果份。我地經過一間餐廳之後，就比門口熱情既伙計招待左入去。唔講唔覺，次次經過呢到，呢個伙計都會係門口講 

「入黎丫！入邊有位喎！」 

　　我地四個坐左一張枱後，叫左野食就傾下計。但當然避唔開MISS NG既長氣 

MISS NG：「啊傑啊山，今年我無教你地，你地上堂點呀？」 
我：「還可以啦，你教得我地最好」 
啊山：「係囉，依家個MISS CHAN都唔識教書既」其實啊山差唔多堂堂都訓 
MISS NG：「把口咁乖呀..你地三個有冇興趣跟我返教會呢？我地教會呢...」 





　　MISS NG係一個基督徒，只要佢一主動講起就好難停口。由於我同啊山無呢方面既興趣，啊山就拎部電話出黎玩，我就係到睇餐廳架電視。可憐既啊竹就同MISS NG大話西遊，講下聖經咁。睇睇上電視就感覺到袋中振左一振，應該有人搵我吧。拎出黎一睇，係啊嘉既訊息。 

啊嘉：「同老師食飯...熱鬧」 
我：「你見到我？你係邊？」 
啊嘉：「唔講啦，嘻」 

　　我係餐廳中望左一圈後，就見到啊嘉自己一個搭枱同其他人坐，今日得佢自己一個食。以往都會有啊希陪住佢，睇黎佢同啊希因為學生會件事後真係玩唔埋，搞到依家得自己一個。 

我：「啊希呢？」我係SMS問佢 




啊嘉：「又提Ｄ賤人..」 

　　見到啊嘉咁樣回應我後，我就無再答佢。我地食完飯之後就返左學校。上埋晏就Ｄ堂之後，我打左陣波就返左屋企。當時大約五點左右，我老豆見我返黎就拎左兩盒月餅比我 

老豆：「傑仔，拎去LULU姨同藍藍屋企」 
我：「無問題，我換埋件衫就出發」我接過兩盒月餅

自從家姐返左香港之後，佢就買左架單車擺係屋企。我踩住呢架普通單車，車住兩盒月餅出發去思蓓屋企。上次思蓓幫我敷完冰之後，只係間中係返學搭車時間在車上見過一兩次，傾過幾句計。時間過得好快，上一次去佢屋企已經係一個月前既事。我到左佢屋企之後，拍一拍門佢就出左黎 

思蓓：「啊傑...？新車喎！」佢見到我好開心咁講 




我：「新咩鬼車丫，架車我家姐架」 
思蓓：「咁耐唔黎我屋企搵我架...」 
我：「你夠唔比你電話我啦！我老豆叫我拎呢兩盒月餅比你同LULU姨」我拎出籃中的袋子給她 
思蓓：「幫我同你屋企人講多謝！你入黎先講啦」 

　　入左屋之後，我好熟悉咁入左佢間房。但係今次思蓓無睇戲，反而係處理緊桌子上的東西 

我：「搞咩呀你？溫書？」我坐係佢張床 
思蓓：「溫你個頭，執緊Ｄ日記簿呀」 
我：「你有寫日記架？日日都寫？」 
思蓓：「係呀...開心，唔開心。我都會寫晒係本日記簿入面，我要記住每一日發生過既野。你知我記性唔好架啦」


我：「有Ｄ意思咁喎...有Ｄ野唔記得仲好」我暗示佢前度 
思蓓：「你講我前度呀！？」佢好坦率咁講出黎 




我：「哦...你本日記簿拎黎寫男仔既...」我係到笑佢 
思蓓：「寫自己多Ｄ！男仔當然有啦...以前係前度....依家係第二個」 
我：「哇，咁快又有心上人...做咩你唔寫係網誌上面？」 
思蓓：「有秘密架！寫落本簿仲好Feel！仲有...你理得我有冇心上人丫！...係啦，下星期LULU姨屋企燒野食，你叫埋你屋企人黎丫」 
我：「嗯,,,等Ｄ大人自己約好Ｄ。我走啦，返去食飯。月餅你幫我比LULU姨啦」 
思蓓：「咁快走啦？我送你啦」 

　　我渣住自己架車，佢渣住自己架車。我地兩個決定鬥快，相約係路口天橋下等。點知最後比佢快過我小小 

我：「如果我唔係渣呢架垃圾車，你返屋企食塵啦」 
思蓓：「我呢架８６黎架喎，點會快過我」 
我：「８６？咩野係８６？」 
思蓓：「戲黎架！搵日上我屋企睇啦！」佢係到笑我 
我：「好啦，我走先啦！」我開始踩走 
思蓓：「我下星期要見到你呀！！」 





　　我踩住架單車，隻手向上揮左兩揮就走左。今日無踩住架滑板車，好似顯得我特別帥氣。而且，思蓓既心上人，佢愈唔想講我就愈想知。我決定搵一日一定要問清楚佢。