[真人真事]那些年錯過的愛情: 中一２０

中一升中二呢個暑假，除左日日搵下啊君之外，我當然仲有做我最鍾意既運動－打籃球。 

　　呢個暑假，因為學校要維修球場既地下裂縫同翻新Ｄ牆，令到校隊呢個暑假唔洗練習。於是我每日落街自己練波之餘，亦都係網上搵左一隊籃球隊加入。呢隊球隊主要由一班校外中六中七既人組成，隊友同我都係差唔多年齡，中一至中三左右。 

　　由於呢隊波大部份都係中三既人，我入到去都係做大後備。唔甘心之下，我就決心提升自己技術，係MSN問陳SIR問個人操練既方法。 

我：「陳SIR，自己一個人練波點練好呀？」 
陳SIR：「每朝落街射100球三分，200球罰球。左右手拍一千下，對住幅牆試下練後手傳球。」 
我：「咁多？！」 
陳SIR：「想進步就係咁。」 


我：「就係咁？」 
陳SIR：「屌...做到先算啦」 

　　於是，當年升中二既暑假，我就日日依照陳SIR既指示落街練波，擺晒全副心機落籃球到。同時證明比陳SIR睇，我係有能力做到。

「差一球！！入呀！」籃球剛從我手中射出，隨即應聲入網。 

「屌，終於入到一百球三分啦！」我訓左係籃球場地下大叫。 

「喂，細路今日射慢左既」一個伯伯對我說 



我：「係呀，連續練左咁多日有Ｄ累」 

　　無錯，我已經每日依照陳SIR既指示自己一個練。雖然訓練內容對我開頭黎講好困難。但係朝早同Ｄ伯伯打波，佢地有時都會教下我技術同幫我練習。有佢地幫助之下，我呢十幾日先無放棄從不間斷咁練習。平均每朝都會擺兩至三個鍾係籃球場上。 

「喂，肥傑，走未呀？」突然家姐係球場出面叫著。 

我：「咦？依家走啦，你係出面等陣啦」 

　　我收拾好東西換好衫之後，就出左去球場出面搵家姐。當我出到去搵佢，家姐就帶左我去一個商場入面一間鞋鋪出面。 



家姐：「你睇下邊對籃球鞋靚。當係我去美國之前送比你既禮物。」 
我：「下...對對都好貴喎..」 
家姐：「唔通打籃球仲著住你呢對野咩，好易拗柴嫁」指一指我腳上破爛既跑鞋。 
我：「唔好啦，我著開有感情」心入面已經心思思 

家姐：「仆街仔，你同我行入去」講完推左我入去 

　　口裡說不，心裏卻很誠實。最終我都係口中講唔好，但係慢慢行入鞋鋪入面。係家姐同我精心挑選之後，最後我簡左一對黑紅色既高筒籃球鞋。事隔多年，雖然已經殘到著唔到，但呢對鞋依然係我屋企保存緊。

　　過左幾日之後，家姐終於離開左香港。佢唔想我地送機同埋唔捨得佢，於是佢好瀟灑咁自己一個靜靜地離開。走之前佢寫左張紙仔貼左係間房到比我。 

「收到禮物，專心讀書。」 

　　一起身見到平時搶我電腦，成日老點我既家姐留紙仔比我，心入面有一種唔捨得佢走既感覺。雖然家姐走左，但我依然保持住日日練波既習慣。無論晴天陰天，我都會落街場練習。 



　　過多一排，呢個暑期轉眼就得返兩日。雖然我差唔多日日都會問啊君有無介煙，同佢傾下計。但係我地只係電話同電腦上傾計，真人就好耐無見過個面。於是，我就約左啊君係開學個日食早餐。 

　　開學呢一日，我提早十分鍾黎到指定地點等啊君。點知啊君比我更早就企左係到等我，當啊君見到我，啊君好大聲咁話 

「哇！啊傑你高左咁多既！」

啊君：「高左咁多又黑左咁多既！前一個月你先同我平頭，依家你高個我啦！」 
我：「打得籃球多姐，況且我高個你唔好咩？」 
啊君：「點解高個我會好？」 
我：「你唔會想第日有個男朋友會矮個你掛？」講完笑左一笑 
啊君：「超...快Ｄ去食野啦」講完面紅左一陣　　 

　　我同啊君行去食野既地方，途中大家不斷有傾有笑。我留意到啊君比以前瘦左，髮型都明顯打扮過。相比起一兩個月既佢又吸引左。 



　　去到食野既地方之後，我地一路食野就傾返大家暑假發生過既事。當傾到有無聯絡小學朋友既時候，啊君就同我講 

啊君：「暑假啊靜同我出左幾次街呀」 
我：「哦…佢有無學壞？」 
啊君：「無掛...不過佢有叫我介煙。有佢睇住我，你放心啦。唔洗成日問架喎。」 
我：「嗯...好啦。差唔多夠鍾啦，我走先」　 
啊君：「嗯，今晚再傾」 

　　我行到返去學校，差幾分鍾先集隊。咁岩係學校門口見到啊金慢慢咁行返學校，我就等埋佢一齊上禮堂。行到上禮堂門口，有個無紮頭髮既女仔向我地揮一揮手。 

　　啊金見到之後，亦都同個女仔揮手SAY左個HI。入到去集隊之後，我問啊金 

我：「喂，門口條女咁正，你識既咩？」 
啊金：「岩岩個女仔咪係中一籃球隊個師姐囉。」