[真人真事]那些年錯過的愛情: 中一１９

我：「屌，你食咩撚野呀！！」 

　　當我打趺左個煙盒落地，啊君同佢幾個朋友就靜左咁望住我。我就捉住啊君渣住支煙個隻手，我同佢對望大家十幾秒先肯放開手。 

啊君：「不如...我地行出球場出面再傾啦...」 

　　我地行左出球場之後，大家都無同大家講過野，只係企係到對望。我見到啊君隻手仲渣住支煙，仲好似唔想放手咁。我就再一次爆發自己既動物本能。 

我：「我屌！！」　我一手搶左佢手上支煙 
啊君：「頂...比返我啦...我食煙關你咩事呀...」 




我：「你係咪傻左？唔通我睇住你食煙，睇住你跟Ｄ唔知咩人出去玩，咁都唔關我事？」 
啊君：「食煙唔代表學壞囉！」 
我：「你講，你跟左呢班人玩左幾耐？」 
啊君：「一兩個月啦...總之我既野唔關你事...」 

　　當啊君講到呢到，佢雙眼眼眶已經變紅。而我亦都控制唔到自己情緒，愈講愈想喊。但我都忍住無表露出黎。我唔知道點解我果一刻會咁緊張啊君，我只係知道，我唔想睇住啊君跟住呢Ｄ人毀左佢前途。 

啊君：「得啦得啦，最多我介煙啦」 

　　當啊君講完呢句，佢雙眼既眼淚終於慢慢落下。當時我係第二次見到同一個女仔為我喊。見到呢個情況手忙腳亂之際亦知道自己講野安慰佢都係徒然，我拎左褲袋入面包紙巾抹去佢臉上既淚水，靜靜咁企係佢隔離。幾分鍾過後，見佢冷靜左小小，我就叫一叫佢。 





我：「喂，我地黎一個約定」　講完用手指輕輕力彈佢額頭

啊君：「…咩約定..」 
我：「你岩岩係咪話會介煙？」 
啊君：「係呀..」 
我：「好，我比時間你介煙。當你忍唔住想食既時候，你就搵我傾計。無論訊息定打電話都好，二十四小時我都會應你，罵醒你，直到你介到煙為止。」 
啊君：「嗯...但係…你仲會唔會嬲我？」 
我：「唔嬲啦，你介到煙我就唔嬲」 
啊君聽到我呢個無理既要求，佢個樣好似仲猶豫緊咁。見佢好似無心聽我講野，我就伸隻尾指出黎。 




我：「喂，勾手指尾先啦！」 
啊君：「下…洗唔洗呀？」 
我：「上次玩籃球機，你都肯同我勾手指尾啦，你唔係介唔到煙掛？」 
啊君：「點會介唔到…一定介到囉！」 
我：「好，正式交易！」 
　　 
　　於是，我同啊君再度勾手指尾，佢應承我唔再食煙，而我暑假亦都日日問佢介成點，希望盡量幫佢脫離煙癮。 

　　我咁關心啊君已經唔知道係出於好朋友還是愛上佢了...