[真人真事]那些年錯過的愛情: 中一１７

啊寶：「就傾啊靜」 

我心諗「我屌...你玩尻我咩...」 

我:「其實...我無搵佢好耐啦」 

　　打左呢一句，竟然有小小傷感既感覺。 

啊寶：「啊，我知丫，佢同啊志一齊左呀ma」 
我：「玩野咩寶姐...咁你又問」 




啊寶：「如果佢地散左，啊靜又想搵返你，你會點做？」 
我：「如咩果姐，姐係分左手啦。佢同啊志幾時分手架？」 
啊寶：「咁你都知係真？好耐啦，佢地拍左兩星期拖姐」 

　　通常Ｄ女講親如果都係無好野，今次好順利比我估中左。唔怪得之前係商場比我見到啊志拖住第二條女。睇黎果陣時啊靜同啊志已經分左手。 

啊寶:「喂，你仲未答我，啊靜搵返你會點喎！」 

　　對於呢個問題，我唔知點應啊寶。如果啊靜搵返我，可能佢會傷害我第三次。我唔想再為左一個女仔而傷心，再次迷失係籃球場上。好朋友我覺得有啊君一個就夠，但係我對啊君...真係得好朋友咁簡單？我唔知，我好混亂。我只知道，啊君呢一個位置再無任何一個女仔取代到。 





我：「唔會，我同啊靜完了...」 
啊寶：「但係...佢都想搵返你其實，你當傾下計囉」 
我：「夠啦，唔好再同我講啊靜！」 

　　我離左線之後，望返部電話，啊君始終都未應我。我訓左上張床到諗，知道啊靜係我人生中出現過，但絕對唔適合我，只能夠話我高攀唔到佢。啊靜，只係我過去我鍾意過既一個女仔。 

　　而啊君...我仲未搞清楚對佢既感覺...

　　當我即將入睡，電話突然震動一下，令我由恰眼訓之中清醒過黎。我解開電話個鎖睇，原來係啊君黎。估唔到佢夜晚十一點先覆我。 





啊君：「下，輸咁多？我岩岩返到屋企昨」 
我：「係呀，咁你今日去左邊？咁夜返既」 
啊君：「下...我出左去溫書姐...」 
我：「溫到咁夜，返到屋企無比人罵咩？」 
啊君：「無呀...我沖涼先，你早Ｄ訓啦」 
我：「嗯...好啦，早抖」 

　　呢一日之後，我同啊君都好少溝通。因為大家都要準備下學期考試，令到大家傾計時間少左。好多時我搵佢都唔得閒應我。雖然話溫書，但係我依然係咁懶，返學日子八堂入面全部都係同啊賢啊力玩。而啊單返返學之後，佢更加堂堂同我講淫野，令我愈黎愈唔想讀書。而我放學去補完習之後，都係去籃球場打波。我既大考前夕，基本上無咩點溫書。雖然下年想入返精英班，但依然提唔起勁。 

　　轉眼間，下學期考試完左。考試成績當然唔理想，當中英文同數學更加係唔合格收場。係派成績表當日，我立即睇下自己排名，睇下大唔大機會掉去隔離班。點知一睇就見向左走向右走到壞消息。 

「全級排名３７／１９６...排精英班最尾，今鋪咪調撚硬班！！」 

　　拎完成績表之後，我立即跑落地下操場睇分班表。當我掃個中二精英班個欄，竟然唔見我個名。再搵耐Ｄ就睇到我入左去第二班 





「我屌！真係調左去差班呀！！」