[真人真事]那些年錯過的愛情: 中一０９
聽到過多一個星期左右會有師姐同我地練波，我同啊單都好興奮。我地係比賽場地一路行返屋企，一路討論呢件事。
啊單：「你估Ｄ師姐係咩樣？高唔高？大唔大波？隻腳長唔長？」 講完好淫賤咁笑左一下
我：「係正先算啦，開學到依家只係見過一個中五既男人婆打籃球。我估Ｄ師姐一個都唔正。」
啊單：「如果係正既話，我一定會去溝佢！」
我：「嗯，但係依家比心機練波先啦，好快就打第二場。」
啊單：「好啦屌，唯有等多一個星期」
呢一個星期過得好快，練習內容都係同以前一樣，只不過係教多左基本功同個人技術。輸波呢件事我無向啊君提起過，因為呢Ｄ咁柒既野我唔想比佢睇到。所以當佢問到同籃球比賽有關既野，我都會扯開話題唔答佢。
由於係上一場入面我既表現算最好，個日之後就有兩個同班同學兼隊友就日日搵我放學打波，一個叫啊金，當時覺得佢生得好高，同啊俊一樣係肥仔，但保守估計佢當時有二百磅。一個叫啊力，四眼仔黎，瘦瘦地，普通中一仔身型，打完第一場比賽之後就成日痴住我。
有佢地兩個比我教下同比我實踐學過既技術，呢一個星期我進步得好快，同時教到佢地一Ｄ好基本既野，自己都好有滿足同成功感。
好快就到一星期後，今日就係第二場學界既日子。我地約齊之後去到球場附近既公園等陳SIR，等等下就係公園入面到玩，完全無熱身既準備。諗返起真係好小學雞。玩玩下見到公園出面有一班人行過，雖然望唔清楚佢地著咩衫同樣貌，但係好清楚聽到佢地講野。
「聽講對面上次輸三十分WO」
「一陣諗住嬴幾多？三十定四十？」
「我估五十」
聽到公園出面班人咁講野，就好似比人侮辱緊我地咁。出面話輸三十分既肯定係我地，大家聽完個樣都唔太開心，啊金見到我地個樣之後就同大家講
「一陣嬴左我請大家食飯！要嬴！！」
聽到啊金話嬴左請食飯，我地由本來無晒信心就變到好有鬥志咁準備比賽，等埋陳SIR之後，我地就一齊行左入去球場，點知入到去一望到對手Ｄ身型，我屌，都唔撚係中一中二學生黎。對面幾條仆街都有一米八既身高。我地最高既啊俊只有米七幾，仲要無技術，睇黎今次都係無機會嬴。但係呢種感覺唔可以比隊友見到，入到去之後就聽教練吩咐準備熱身。
正當我放底野準備熱身，聽到後面有人叫我
「啊傑！」
我望去後面 「咦，啊君？你點解會係到？」
岩岩叫我既人就係啊君。佢隔離有幾個著便服既男女同佢一齊。一問之下知道佢岩岩睇完自己學校比賽，咁岩下一場就係我果間。所以大家有機會撞到。
啊君：「又話有比賽打就叫我睇既？」
我：「唔...一陣傾啦，我熱身先。」
啊君：「好啦，我坐埋一邊睇啦，加油！」
聽到啊君對我講加油，成個人好似醒左一醒咁。話晒第一次有女仔睇我比賽，一陣係時候係佢面前發揮我呢一兩個月學過既技術既時候。好快就開左波，情況就好似上次咁，一開始幾秒就比人入左球。
陳SIR：「唔好諗，比個波啊傑！」
啊單傳左個波比我之後，我就拎住個波背對住個比我肥兩倍既肥仔。身型相差咁遠令我諗返起陳SIR對我講既野「進攻唔係下下靠力量」我就睇住肥仔既腳位做個後轉身係籃底射入左，呢球對比起第一場入既波入得更有意義。因為第一場既入波基本上只係自己亂黎之下入，呢球用到啊SIR教既野之外仲比啊君見到我既特訓成果。
入完波回防既時候，見到啊君舉起姆指對住我讚。雖然我面上無任何表情回應，但我心入面果種喜悅既感覺已經令我好開心。
一分鍾之後，對面隊叫左個暫停。依家個比數輸緊２：５。陳SIR係暫停果陣話我地有得羸，叫我同啊單放膽打入去。
點知呢個暫停完左之後，又係另一個惡夢既開始。
呢個暫停完左後，開頭我地隊都打得幾順利，比分都係差吾多，大家互有領先落後。打起信心後，我同啊單就負責擔起得分任務，其他人做下工兵咁。係啊君面前面對住班米八巨人，我唔害怕。
係第二節過左一半左右，就係暴風雨前夕既開始。係我搶到波後，我立即長傳比跑緊去前場既啊單。前場有啊單，啊金同對面一個米八肥仔。啊單接到波後順勢自己上埋，呢個時候對面既米八肥仔故意撞落啊單到，啊單由於太矮太細粒比佢撞開左，成個人跌左落地。而啊金唔知做咩事仆親，成個人咁岩扒左係啊單上面。
啊單唔知係咪承受唔住啊金既重量，當場叫左出黎。全個場都聽到佢慘烈既叫聲。
球證判左對面隊肥仔犯規後，理應要射罰球。但我見啊金起左身好耐，啊單仲訓左係地下，我即刻走上前問佢。
我 ：「起身射罰球啦」我伸手示意拉佢
啊單： 「唔得，我隻腳好痛，我起唔番身」
呢個時候，陳SIR唔耐煩係場邊大嗌 ： 「玩咩啊起身啦」
球證見啊單系場上面起唔到身就吹雞暫停左場比賽，陳SIR同汪SIR出左黎了解一陣就打左電話叫救護車黎。
汪SIR ： 「啊單，你要有個心理準備，你可能整傷左條十字韌帶」
啊單：「唔係掛！？好似好大獲喎」
汪SIR：「你都係唔好再亂郁啦，等救護車黎」
等到救護車黎到，啊單就上左救護車，陳SIR叫我地專注返係場比賽到。但係大家之後打得一Ｄ積極性都無，可能佢地怕受傷，唔想成為第二個啊單。啊單離場之後，球隊既重任就落係我身上。但係比賽開始返幾分鍾。我已經拎左四個犯規，比陳SIR換左出場坐低睇波。（五個犯規就無得打）
陳SIR：「你坐係到睇埋場波啦，無得追架啦」
我：「依家都係差幾分姐，唔好放棄啦」
陳SIR：「我無呃你，你班隊友無個識打波，你睇落去就明」
比賽打左十幾分鍾左右，我同啊單都離開左球場。落場既只剩返啊金，啊俊，啊賢，啊力同幾個中一同學仔。比賽結果真係比陳SIR估中左，由本身差幾分到比人遠遠拋離。最後輸大約１９：６５。我同啊單落場後，佢地只係入過一球３分。
陳SIR完左場波之後無好似上次咁同我地訓話，講左幾句交帶下次練波既野就同汪SIR走左。
啊俊，啊賢個Ｄ輸左五十幾分仲係到嘻皮笑臉，完全無為呢場波輸左而唔開心，成隊波我諗得我同啊單係真真正正想嬴波，為球隊付出。
離開球場果陣，佢地成班人約埋去食野。我心情唔好唔想同佢地食，行左同佢地相反方向返屋企。行行下有人拍我膊頭。
啊君：「喂，羅子傑。你唔叫埋我走架？」
我：「哦..唔記得左你係到TIM..」
啊君：「你返屋企？我同你一齊行啦。」
我：「好呀」
我地兩個一路行，啊君就係隔離讚我同鼓勵我，叫我唔好放棄，你打得好好之類。聽完啊君既安慰竟然有想喊既感覺，我本身係一個眼淺既人，所以我一路行一句聲都無出過，我驚一講野就控制唔到情緒。啊君後來見我眼濕濕就無再講落去，好安靜咁陪我行去等車。
我失落既時候，啊君好似一個比我挨既膊頭咁。比我依靠住，支持住我，唔比我趺低。係呢一日之後，我同佢既關係就慢慢咁轉變。