[真人真事]那些年錯過的愛情: 中一０８

「依家我教你兩個步法，學完之後你地就一對一練習啦」 
「知道！」 

　　籃球隊既比賽比排球更快開始，所以籃球隊最近加多左練習。由於我地隊除左我同啊單之外，就無咩人有比較好既基本功。所以教練陳SIR一開始擺左我同一個肥仔打籃底，呢個肥仔叫啊俊。中一係隔離班既同學，人生得高高大大，個樣又串又多粗口。呢條友一開始我就睇佢唔順眼。不過，呢個人係幾年後將會影響我好多。 

　　陳SIR教完我地兩個一Ｄ打籃底既基本野就走左去第二面場教班細細粒粒既後衛。而我地兩個就係到一攻一守做陳SIR教既野，大致上都係轉下身射波同爆下籃之類。但由於啊俊對當時既我黎講實在太肥太高大，我爆極佢都攻唔入。 

啊俊：「廢西」 
我：「...」　我心入面已經屌晒鬼，當時我唔敢得罪人。所以比人串都係忍氣吞聲。 
啊俊：「等哥哥教你打籃底啦」 





　　呢條肥仔見我唔夠佢大隻就得寸進尺，無論係我進攻定係防守都係比呢個仆街俊擋住晒。心情差之下就慢慢暴燥起黎。陳SIR見到之後，就叫左我行埋一邊講野。　 

陳SIR：「你做緊咩撚野」 
我：「我爆佢唔入呀...」 
陳SIR：「屌你，聽撚住啦。進攻要睇對方既腳位係咩位置黎轉，唔係下下要用力量。防守就座低你個人，只要你座低，差唔多身型甚至比你更大份都頂到佢，聽撚到未？」 

　　聽完陳SIR講既野之後，我就落返場係啊俊到實踐返出黎。用左之後我同肥俊就不相上下，佢之後再無串過我。不過我冇教啊俊陳SIR對我講既野。因為我唔想比呢條肥仔超越我，更加唔想比佢有機會串我。 

　　呢日之後練多幾次習，就係正式比賽既日子。由於學界比賽打小組形式，至少有三場打。所以我諗住睇下第一場打得好唔好再叫啊君去。比賽前一日我仲係係床到訓唔著，始終係第一次學界比賽，心情點都有小小緊張。於是我就等左好耐先訓得著。 





「咇咇...咇咇」 

　　鬧鍾響左之後，我就執齊野出門口。全隊約埋去比賽場地之後，陳SIR就宣布一陣出場既正選同戰術。

陳SIR：「一陣出先既，啊單，啊傑，啊俊，仲有ＸＸ同ＸＸ啦。隊長唔好寫啊單，寫啊傑名。 
我：「...唔係掛」

聽到陳SIR宣佈我做隊長，個感覺就好似比人捧左上天咁。既然得到教練信任，我就要發揮到最好，帶領大家發揮到最好。雖然睇到啊單面上有小小不爽，但佢對呢個決定都無任何異議。 





陳SIR：「啊單，啊傑，你地過一過黎」 

　　陳SIR叫左我同啊單過去之後，就叫左其他隊友出去熱身，準備比賽。我同啊單兩個都好期待同緊張陳SIR會同我地講Ｄ咩，所以過左去之後就收起平時既嘻皮笑臉，認真聽佢吩咐。 

陳SIR：「出面班仆街咩都唔識，一陣你地企同一邊，一面一底。拎到波就攻。唔洗理佢地。」 
我，啊單：「好！」 

　　聽到陳SIR咁講，已經證明左我地兩個係球隊既主力。而且我地隊丙組籃球球全部都係中一仔，無咩人識打波。所以我地兩個亦都好爽快咁答應左教練既要求。出去熱左一陣身之後，好快就開始第一場既學界比賽。 

「咇！」　球證將個波拋上天，等雙方球員跳波。點知個波一落地，就比對面搶左個波打左個快攻，五秒之間輸２：０ 

陳SIR：「頂！做咩春呀！！」 

　　場內外既人都比陳SIR呢句說話嚇到，包括場上對面既球員同場外既帶隊老師。對手場上五名球員球場聽到之後望住自己隊伍既教練唔知係到做咩。而我同啊單就誤以為呢個係戰術既一部分，我拎個波係底線開波，就係到大叫「啊單，跑去前面！」 





　　啊單聽到之後都無手軟，接到我傳波之後就輕鬆上籃，追返２：２。 

　　但係，當我地全隊人認為場比賽有得打既同時，先發覺原來係惡夢既開始。

　　開左波後十分鍾，兩隊實力的確係不分上下。得分都差唔多。但係打得愈耐，對面就好似睇通晒我地咁，開始搵人緊貼防守我同啊單。對面做左呢個戰術之後，我地就一分都攻唔入，比分輸得愈黎愈多。 

陳SIR：「球證換人唔該！」 

　　陳SIR換人之後換左啊單出場休息，換入場既係啊賢。呢個啊賢就係岩岩開學我同佢坐係籃球場果個同學，啊賢入隊係因為今年手球隊唔夠人搞唔成，所以加入籃球隊玩下。由於佢既身高太矮同埋零技術既關係，啊賢係隊入面一直都冇咩存在感，更加唔好講落場。 

我：「啊賢你都有得落場，睇黎陳SIR放棄左呢場比賽。」 
啊賢：「你又知！？佢真係叫我落場行下WO。」 

　　聽到呢句之後，我就知道陳SIR已經打定輸數。雖然比分愈黎愈遠，但我無放棄到，係完場前搵機會入多左幾分，等比賽輸得冇咁難睇。 





　　「咇，完場。請雙方列隊」　 

　　球證吹完雞之後就代表場波完左。結果我地最後比人大炒，輸左足足三十分。打完呢一場之後，陳SIR吩咐我地去空地聽佢訓話，行過去既時候，只係見到佢同校內帶隊既老師全程黑面。 

陳SIR：「今日輸三十分係合理。你地成隊人搵三個識打波既都無。所以我一直都係教你地基本功，無教過你地任何拆防守既戰術，跟住落黎我會練多小小個人技術同防守。因為你地下星期就比賽。」 

　　呢個時候，校內既帶隊老師汪SIR就開口講野。 

汪SIR：「咁多位，你地岩岩學打波我唔會怪你地。希望你地之後個兩場就算輸都唔好輸得咁難睇，輸既分數要一次比一次少。」 

我地：「收到」 

陳SIR：「你地班人無咩實戰經驗。所以過多一個星期之後，我叫左兩至三個打乙組既師姐幫下你地練下波，教下你地打全場。無問題就解散。」 

　　我同啊單兩眼對望　「師姐！？」