在夢境與少女相遇後有壞人殺死了我: 第09章 (13)

 
「晴哥！」我馬上說。
 
接著，他嚴肅了十倍，把所有窗戶關閉，才凝重地坐回來，「咁你聽住喇。」
 
「如果你試過離開天空島向下飛，或者不停向上飛，你會發覺，無論你點落去，或者點飛上去，都係冇盡頭。」
 
「你唔會去到地面，或者穿出天空。」
 
「咁唔係代表冇地面，或者冇天外天，而只係你用既方法唔啱。」他說。


 
 
「即係話，除左哩個世界，仲存在其他世界？」我一問再問，「而洗紋身藥水，係其他世界先有？」
 
「冇錯，唔單止洗紋身藥水。」
 
「就連紋身藥水本身，都係嗰啲所謂『紋身師』係其他世界引入過黎。」
 
「應該話，其實紋身師都係其他世界既人，佢地發現左穿界既方法，所以黎左哩度。」
 


「但哩類人數極少，情報顯示紋身師只有六個左右。對於穿界既方法，佢地好守祕密，只會一代傳一代，所以紋身師咁罕有，就係咁解。」
 
「咁……你一直講既『其他世界』係指？」我問。
 
「哩個世界級機密黎，但……」日來晴感觸起來，像勾起了傷心的回憶，「唔知點解見到你，就想講晒比你知。」
 
「你係咪對我做左啲咩？」他警惕地問，「點解我好似識左你好耐咁既，我同你係咪曾經……」
 
「你只係監視我太耐，所以有幻覺。」我告訴他，拍拍他的肩膀。
 


「算。」他放棄追查。
 
「咁啦，我用『一座塔』黎做解釋。」他把白色「來」字紋身，匯集在左手手背。
 
右手從「來」紋身中抽出一幅畫卷，在桌上往右攤開，上面畫了一座『地獄下的巨塔』。
 
 
「假設，座塔有七層高，最高嗰層係一樓，然後倒數落去，最矮嗰層係七樓。」
 
一樓最高，七樓最矮。
 
「精靈國度，係第四層。」他把塔分成七層，指住第四層。
 
「各種紋身藥水、洗紋身藥水，連埋紋身師，都係來自第五層。」他把手指移下一點。
 


「而此時此刻既精靈界，應該已經冇晒紋身師留低。」日來晴又說，「佢地如果冇比人捉到，就應該返晒去，好似紋身老伯咁。」
 
「點解呢？到底發生咩事？」我問。
 
「哩個真係說來話長，我都係琴日先知，係同一個非法要捉紋身師既組織有關。」他說。
 
「總言之，你如果想救藍藍，想搵洗紋身藥水，就要落去第五層。」他再說。
 
「我一個人去？」我問，「但我咩都唔知喎。你可唔可陪我去？」
 
「唔可以，老實講，雖然我好似神通廣大，但其實我唔可以離開哩間房。」他說。
 
「如果你頭先入黎既時候，察覺到房間有異，咁我話比你知，哩度係一個好特殊既據點。」
 
「哩間房，係上下層既連接口，同其他地方有一定程度既隔閡。」


 
的確，這裡沒有大自然的靈氣，我也不能尋索到這裡。
 
「一旦離開，一旦我比人感知到，就會連我、連來族都有危險。」
 
「點解？因為你識紋身？」
 
「唔單止。」他望著巨塔圖說，「因為我識穿界，送人去其他層。」
 
「你都係來自第五層既人？」我問。
 
「我來自……」他深思熟慮地搖頭，停止搖扇。
 
「第一層。」