在夢境與少女相遇後有壞人殺死了我: 第07章 (24)
「晴哥！晴爺、晴大人！」我在梳化上拜服。
「一早幫你安排好啦，衰鬼。」日來晴洋洋得意地說。
「衰鬼，即係點做？」我馬上問。
「我安排左人送你落去，等多一陣就到。」他沾沾自喜，「但你依加個款弱到咁，就算送到你落去下層，你都行唔到去搵藍藍啦。」
「咁我應該點？」我問。
「嗱，嗰度就有啲凍晒既飯餸。」他瞄一眼餐車，作出明顯的暗示。
「你老闆，得寸進尺。」我軟弱地走向餐車，「我食，你快啲講落去。陣間邊個接我？」
左手取走銀色餐蓋，右手拿起叉子。
「莉莉 ‧ 麗莎 ‧ 伊利莎伯。」日來晴說。
「邊個黎？」我叉子停在口前。
「我條女。」
「你……佢……你同佢係幾時，咪住，佢係咩人？」我問。
「銀達尼號上最靚女既服務員，金色長髮，年輕貌美。」日來晴滿臉春風地說。
「你老闆，我慘到要生要死，你就風流快活？四處留情？晴哥？叫你情聖丫不如？」我用叉子指著他。
「唔好羨慕我喇，快啲食啦。」他春風得意，玩玩手指，又呼喝起來「喂，嗰度仲有兩碟，唔好漏左。」
「丫，你愈黎愈大膽……」我盯著他看。
忽然，門外有聲音——
「你係做咩架？邊個叫你過黎？」警衛截停查問。
「我係黎幫少爺換床單，聽管家講，佢瀨左屎係床度。」少女的聲音說。
「咁大個人仲瀨屎？行啦。」警衛質疑後放行。
「叩叩叩——」房門被敲響。
「我床都冇上過，你話我瀨屎？」我笑臉迎人，手裡藏餐刀。
「噓！」日來晴說，自信翩翩地去開門。
「咔嚓——」
開門後，一位金髮女僕，推著床單車進來。
「少爺，我叫莉莉，依加黎同你換床單，同換被。」莉莉禮貌地點頭。
「咔嚓——」日來晴管家把門關上。
隨即他轉身，轉臉，變得十分嚴肅。
「晴哥。」莉莉溫柔地說，「任務可以開始未？」
「可以開始。」日來晴答，脫下管家黑色外套，瀟灑地丟到梳化上。
莉莉也替他解開恤衫鈕。
「喂喂喂，有人係度食緊飯，扑野返自己房啦。仲有唔該入黎既時候，戴返口罩丫。」我說，在冷清的餐車旁邊吃飯。
莉莉馬上戴口罩，又不滿地問：「晴哥，你冇同佢講個計劃咩？」
「冇啊，我鍾意玩下佢先。」日來晴管家說。
——我的殺氣，已經感染整個房間。
「唔好嬲，依加話比你知。」他安慰我說。
「第一步，你換上我套管家服，我陣間都會著你既衫。黎一個身份互換，你扮我，我扮你。」日來晴開始說明。
「咁既話，你係外面行動會方便一啲。畢竟唔係人人都識你。」
「然後我扮你，哩係房間，等其他人以為你仲係房度。」
「你點扮我？」我問。
「咳咳……咳……咳咳……」他馬上模仿出來。
「咳……咳……」我也咳兩聲，「唔得，你咳得仲真過我。」
「OK，當你扮咳哩招OK，但如果有人入黎檢查呢？」我再問。
「扮頹廢。」他抓起我的被子，覆蓋自己全身，躺在牆角地上，碎念有詞。
「如果老竇黎左，要搵你傾計呢？」
「咁夜，唔會發生咁多事既……最多我去沖涼囉，沖到你返黎為止。」他說，坐起站起，把被子拿回來。
「OK，第二步呢？」我問。
「第二步，莉莉會將『被芯』拎出黎，淨低個被袋，比你捐入去。」
她說著，雙手已經在行動，把新被子放到梳化上。
又把日來晴拿回來的舊被子拆開，取出裡面的被芯，剩下被套。
「你捐入去之後，瞓上部車度，我會再用床單鋪住你，然後扮換完床單、被單咁推你出去。」她說。
「如果外面啲警衛要檢查咁點？」我問。
「所以我地準備左啲屎，陣間會放少少係床單度，等警衛見到都唔敢檢查。」莉莉再說。
「吓……」我呆若木雞。
「唔好吓喇，係咪想出去啊？換衫啦。」日來晴催促，趕了我去睡房更換管家服。
不一會兒，我們已經換上了對方的衣著。
「先生，你叫咩名，係服侍邊位貴賓？」日來晴問，整理我的衣領。
「我叫夜來雨，係啱啱從愛爾蘭上船既夜更管家，專門服侍 12樓既程強 ‧ 羅密歐少爺。」
「你既房號係？」日來晴再問。
「我暫時同一位日更既管家同住，佢叫日來晴，房號係咳……咳……，幾多話？」我問，看一眼他給我的房門鎖匙。
「0911。」日來晴提示。
「房號係0911。」我回答。
「都算係似模似樣既，但你洗唔洗打支針啊？不過又未夠24個鐘，唔可以打住。」日來晴憂心地說，「如果你咳，可能會累事。」
「似模似樣就梗架啦，正如你睇我病左咁耐，識扮我一樣，我都一樣睇左你咁耐啦。」我說。
——看著他一臉不安。
「放心啦，我已經食多左幾粒藥，而且只係去睇下佢，好快會返黎。」我再說，戴上口罩，便用被套套住自己。
「祝你好運，你比人發現既話，我地三個都死梗。」日來晴說，扶我躺上車。
「最多咪比人掟落海，冇野格。」我開懷地說，一起笑了笑。
「總之，一路順風。」他祝福地說。
接著，我靜靜地扮死物，莉莉也用床單蓋上，並沾一些屎上去。
準備好後，她就開門推我出去。
「咔嚓——」車子微震，我到了門口。
「換完嗱？」警衛查問，伸手想要檢查。
「係啊，瀨左好多。」莉莉為難地說。
「嘩屌，好臭，咁多屎既？」他們馬上退開，用手掩鼻，催趕莉莉離開，「走、走、走。」
真的很臭，我隔著口罩也能聞到。
「係既係既。」莉莉點頭後，馬上推著床單車離去。
在微震中，我動也不動地待著。
然而，隨著這次離開，也意味著：
一趟深夜的低層尋人之旅，正式開始。
「一路順風。」我對自己祝福。