米米蓮妖怪作品 -《再遇見到你》(長篇) (暫停刊): 第十八集 ~ 鳳︰我同「自己」結義金蘭！？
第十八集 ~ 鳳︰我同「自己」結義金蘭！？
雞仔，冇錯，就係後生時候嘅我。
佢講嘅嗰邊，喺時間線上仲未追到我呢一邊…
但係我就喺呢邊，喺呢個咁污糟嘅監牢度裡面，同余二十一齊…
撞到大約當時只有二十歲時候嘅「我」，雞仔佢。
「邊鬼個嘈喧巴閉啊？」
我同余二十另轉頭一睇，發現咗佢。
「你係邊個啊？」我哋問。
「行不改名，坐不改名，死姓不改，改正趴街，陳鳳初就係我喇！」
我突然之間，感覺好奇怪，因為我好奇怪點解「自己」會喺呢度…
喺我記憶，我好似從來都未坐過監嫁喎…
仲要而家變成咁嘅身世！？究竟佢係咪真係後生嘅我嚟嫁？
定係只係同我同名呢？究竟發生咗咩事啊？
我亦開始懷疑自己係咪淨係返咗去以前咁簡單…
「陳鳳初！？咦，好似喺邊度聽過呢個名咁嘅…」余二十講。
「哼，你梗係聽過我師父個名，所以知道埋佢呢個咁冇用嘅徒弟個名啦。」雞仔咁講。
佢咁講，我就更加肯定佢係「我」喇。
「你師父係火鳳仙人江雲林？我想問…你做乜攪成咁嘅？究竟發生咗咩事啊？」
「哈，你好似好熟悉我咁噃。我發生咩事？哈！關你屁事咩？」佢間接回應咗我。
「我識你師父，仲識你師兄，亦識你師姐，你D嘢我全部都知，當然關我事。」
「你乜都知，咁又問我點解攪成咁同發生咩事？你玩我啊！」佢好似有D嬲咁。
我見到佢咁嘅身世，就好似乞兒咁，我有D痛心，亦都記唔起我呢個年紀嗰陣究竟點解會咁，所以我咁問︰
「我就係唔知你近排發生咗咩事，不過我可以同你講，我會幫你。」
「幫我！？哈哈哈，幫我！？你睇吓我對腳！」佢咁講，我覺得好奇怪。
我望咗一望佢對腳，發現…
佢對腳潰爛不堪，似係曾經俾人用火燒過一樣，而家就好似殘廢咗咁…
「我對腳殘廢嫁，你幫我！？點幫啊？補返啊？」佢冇等我講嘢就再講。
我真係好似斷咗片咁，廿歲時候嗰十幾年真係好空白，所以我唯有咁應佢︰
「你睇我對腳，係咪好光滑呢？我以前同你一樣嫁。」
佢望一望我，好似唔相信咁。
「你信佢啦，佢好勁嫁，至少我而家完全信晒佢。」余二十講。
「哈…哈哼，我…我而家根本…咦，唔係噃，你…我感應吓先…」雞仔講。
佢好似亂晒咁，唔知講咩，但係我知佢搵到方法喇，就係感應我嘅靈力。
佢捉住咗我隻右手去感應。
「一種我好熟悉嘅靈力…點解…點解會咁嘅？你都係火鳳派嘅…前輩？」
佢咁講，我覺得有D好笑，熟咩悉丫，根本我就係你，你就係我，但係我選擇咗呃佢。
「係！我叫…陳鳳…光管…」
我唔想話俾佢知我就係佢，亦突然諗起我D學生幫我改嘅花名「光管陳」。
「陳鳳光管！？」
「Eee…陳鳳光！冇錯，同你個名好似，我就叫做陳鳳光！」
雞仔突然眼濕濕咁…
「前輩，求你…求你幫吓我丫，我…我一生都未求過人，我…我只係想去救返我師姐咋，求你幫吓我丫！」
「你師姐！？佢唔係俾白百龍﹑白千龍兩父子殺咗喇咩？」
「吓！？前…前輩真係好犀利，竟然連呢件事都知，我當初都以為係咁，但係之後發現咗師姐原來冇死到，唔啱唔啱，應該話係死咗，但係靈魂未散，仲…仲…」佢喊咗出嚟。
「男人老狗，唔准喊！」我大嗌！但係換嚟…
「邊條友嘈啊？係咪未俾人打過啊？」一個獄警喺冷巷尾叫過嚟。
我哋當然冇回應，而我就變返細細聲…
「此地不宜久留，鳳初，你有冇咩其他方法可以離開呢度？」我問。
佢碌大對眼好好奇咁望住我。
「高人呀，其實鳳初佢如果有方法走，一早都走咗啦，不如你自己諗個方法帶大家走好過啦。」余二十講。
「唔係啊，佢而家冇能力走啫，但係佢喺呢度都應該有一段時間啦，肯定會比我哋清楚呢度嘅環境，亦應該有諗過一D方法去逃走，所以我先咁問。」我講。
「係有諗過嘅，但係實行都唔易…」
「咁你先講嚟聽吓丫。」
「牆後面係民居，打穿牆走就得，但係呢道牆唔係磚牆咁簡單，有D難打爛，另外呢度D獄警唔鍾意人講嘢，但係鍾意人唱歌，難聽都得，因為有聲音，佢哋就唔會 過嚟巡，相對我哋就有多D時間做嘢。仲有，我連走咗之後佢哋會唔會追緝我都諗埋，我肯定佢哋唔會，因為有犯喺自己監獄度逃走噃，幾瘀幾樣衰啊，所以佢哋肯 定會衾得就衾，唔會俾出面嘅人知，仲會索性當冇嘢就算。」
「好，夠詳細，咁你哋都跟住我做啦！」
呢度D磚牆真係豆腐渣咁，我抓幾吓就爛晒，問題係…
中間有塊鐵皮。
對我嚟講就簡單啦，我一個「鳳凰赤焰手」就燒熔佢，但係要多少少時間…
(噗~ 噗~ 噗~) 趴街！獄警過緊嚟。
「好，夠驚險，跟住我唱啦！」
「吓！？」雞仔同余二十都一面無奈咁款。
「人生於世上有幾個知己~
多少友誼能長存~~~
今日別離共你雙雙兩握手~
友誼常在你我心裡啊！~
今天且有暫別~
他朝也定能聚首~ 嘻！
縱使不能會面~
始終也是朋友~ 嘻！
說有萬里山~ 嘻！
隔阻兩地遙~ 嘻！
不須見面~ 嘻嘻！
心中也知曉~~~
友，誼，是，改，不，了~~~~~」
歌唱完，獄警真係冇過嚟，我哋當然冇可能係用一首歌嘅時間就打爆道牆啦，所以我用咗重覆術，用符咒將聲音不停咁重覆，而我哋就慢慢拆牆，最後仲…
真係成功逃走咗…
我揹住鳳初，余二十就跟住我一路跑，一路跑，沿途不停係咁跑…
終於遠離咗監獄，去到郊外，一齊坐低咗…
「多謝你啊，前輩！」雞仔。
「唔好叫我前輩喇，由今日起，我會幫你哋兩個成材，我會教你哋，但係我唔認老嫁，我唔會要你哋做我徒弟，亦唔要你哋叫我做前輩或者師父咁，我會視你兩個係我嘅好兄弟！」我講。
「好，有福同享！」余二十講。
「有難同當！」雞仔。
「我哋就喺呢棵唔知咩鬼嘢大樹下面，效法古人咁結義啦！」我講。
我一講完，余二十就跪低咗，右手三指舉起發誓…
「我，余二十，今日與兩位兄弟結義於此…」
「喂！」我覺得余二十呢個名太邪惡，所以我咁建議︰
「你不如…改改名丫，以前嘅余二十係一個大壞蛋，我希望你洗心革面，不如…你叫做余…忠丫！」
「忠！？大哥，不如我叫做忠義丫！我想有個「義」字啊！」
「好丫，余忠義，幾好聽丫。」鳳初講。
之後我哋三個…
「我，陳鳳…光，今日同兩位兄弟結義於此，滴血！？」
「我，余忠義，今日同兩位兄弟結義於此，滴血為証！」
「我，陳鳳初，今日同兩位兄弟結義於此，滴血為証！」
下集預告︰
「要周白波幫手，就只有一個辦法。」
註腳︰上面首歌係《監獄風雲》主題曲《有誼之光》