米米蓮妖怪作品 -《再遇見到你》(長篇) (暫停刊): 第十七集 ~ 雞︰大戰殭屍王，下集！
第十七集 ~ 雞︰大戰殭屍王，下集！
上集講到我﹑師兄﹑師父同一大班高手搵殭屍王搵到去咗「菊花村」…
呢度早就俾已經俾D妖魔鬼怪佔領咗，而家成個死城咁…
高手就去晒打鬼怪，低手，好似我咁嘅，就喺旁邊睇戲，而高高手就…
準備大戰殭屍王！因為佢已經喺我哋面前出現咗喇！
「喂，殭屍王，究竟邊個攪你返出嚟嫁？」師父大嗌。
「哼~！」
殭屍王嘅鄙視，令到師父好嬲。
「你老祖丫，咁冇禮貌丫嗱，鳳凰火炎，出鞘！」
「鳳凰火炎」喺後山標出嚟，好似流星咁衝埋去殭屍王度…
但係殭屍王就以一招「混元屍氣」…
(嘭~！)
抵擋咗「鳳凰火炎」嘅沖擊。
沖擊係抵擋咗，但係師父當然唔會就咁就算啦！
佢一吓跳埋去，舉起手就揸實把「鳳凰火炎」，再…
「先祖之靈，天靈地靈，火鳳仙袍護身！」
師父嘅道袍突然變成火紅色，仲好似變咗隻鳳凰咁…
「鳳凰火焰槍！」
原來「鳳凰火炎」係可以變型嫁，佢而家變成咗一把長槍…
師父用力拮向殭屍王。
「黑冥屍爪！」殭屍王竟然想赤手空拳就咁捉實火焰槍！？
(丫~！)
咁樣當然係冇可能啦，殭屍王右手燒傷，但係就將長槍嘅致命一擊打歪咗。
佢右手雖然係燒傷，但係…
「爛就由得佢爛啦，哈哈！無孔不入，屍蟲暴雨！」
殭屍王直接爆開成隻右手，一大堆屍蟲就由佢隻手度噴咗上天，堆屍蟲再好似落雨咁落返落嚟，呢個攻擊波及埋其他人，大家都要作出唔同程度嘅防禦，亦因為咁，好多道士術士都由優勢變成劣勢，俾其他D鬼怪轉守為攻…
「呵呵呵，你哋D高手就一齊專心打殭屍王啦，呢度等我嚟啦，白波引燃，煽風點火！」
周白波雖然怪形怪相，但係估唔到佢都好有料到…
佢呢一吓真係幫咗大家好多，佢嘅火焰熊熊聲咁消滅咗大量屍蟲…
亦都因為佢嘅呢一招同佢所講嘅呢句說話，虫節大師同千龍前輩佢哋都轉返晒過嚟幫手打殭屍王…
「紅龍吐焰！」(千龍前輩)
「雷劈！」(虫節大師)
「爆烈神拳！」(神通先生)
「火鳳噴刺！」(師父)
「雷劈」同「爆烈神拳」係我老作嘅，因為佢哋都只係「哈」咗一聲。
「屍橫遍野！」(殭屍王)
無盡嘅屍氣打橫形成咗一道牆，抵擋咗大家嘅攻擊，佢仲即刻轉守為攻…
「焚屍揚灰！」
原來屍氣底層係無數嘅屍體堆砌而成，屍體俾四大高手火燒雷劈…
已經變晒灰燼…
但係殭屍王就嚟招順水推舟，將屍毒利用灰燼去散播，而家殃及池魚添…
所有道士術士都中晒毒，訓晒喺地，郁都郁唔到，好在D鬼怪都打得七七八八，而家淨返達師兄﹑百龍師兄﹑周白波同兩個西方聖人有能力去處理其他鬼怪。
「碎屍萬段！」殭屍王仲嚟招突擊，突然衝向四位高人度…
「紫電紅雷！」
虫節大師突然一步踏前，斜身雙手推前，一個紫紅色嘅電光球喺佢雙手中間…
對衡咗殭屍王嘅「碎屍萬段」，而家雙方角力緊…
「襯機會，快D出晒你哋D絕技去打死佢啦！」原來虫節大師識講廣東話。
「好，紫青合一，青龍神劍！」(千龍前輩)
「鳳凰七重天，鳳凰破！」(師父)
「聖氣靈魂，通神掌！」(神通先生)
殭屍王眼見自己俾虫節大師鎮住咗，根本冇機會還其他三人嘅手，唯有…
「屍山血海！」
佢吸咗一堆屍體埋自己度，分開咗佢同虫節大師，再將自己化成一舊血雲…
避開咗三大高手嘅攻擊。
「三屍暴跳！」殭屍王突然身形拉長，仲分身多咗兩個自己出嚟…
「三屍五鬼！」再每隻身後多咗五隻小鬼…
白﹑綠﹑黑﹑紅﹑啡，五隻小鬼個樣都好陰寒怪異…
「咩話！？五行鬼聖？」千龍前輩講。
之後師父有同我講返「五行鬼聖」係幾咁恐怖，佢係其中一種高階嘅邪術，五隻小鬼，並唔係小鬼咁簡單，俾佢哋纏上身就好麻煩，例如白鬼會上身，黑鬼哭崩牆，紅鬼控火焰等，所以我哋幾位高手都突然變得異常認真。
「呢次唔可以留力喇，每人一隻啦，神通先生你一個一個咁幫我哋啦！」師父講。
「頭先我唔係叫咗你哋出盡絕招去攪掂佢咩？」虫節大師講。
「出咗嫁喇！」(千龍前輩)
「出咗嫁喇！」(師父)
「出咗嫁喇！」(神通先生)
三個人都一副尷尬嘅表情。
之後，我冇理其他三個高手，淨係睇師父佢表演…
「呢次認真喇！天靈靈，地靈靈，先祖顯靈，火鳳派歷代先祖，請賜我力量！」
師父原本已經成身火紅紅咁，而家仲…
有六個鬍鬚勒突嘅火紅人跟埋佢尾添，相信呢六個人就係先祖嘅靈魂喇！
「碎屍萬段！」呢邊呢隻殭屍王似乎係想一招了段，佢突然衝向師父…
而師父就氣定神閒咁咗一D手勢…
「唔唗時間喇！一招了啦！鳳凰七重天，七鳳七凰七火劍，七劍合一，紫焰！」
七個身影化成火焰，再化成劍氣，熱度不斷上升，直至熱到變成紫色火焰…
劍氣直插殭屍王…
疆屍王就係咁…
連聲都冇就已經人間蒸發咗。
我都望到呆咗幾秒，因為真係唔敢相信就係咁簡單就完咗…
(嘭~！) 虫節大師嗰邊亦都傳嚟一吓巨響，佢嗰邊隻殭屍王都被炸到粉碎。
「五絕大戰殭屍王，南龍，北鳳，東虫，西聖，中神通…」周白波突然喺旁邊講。
佢係根據頭先殺殭屍王嘅次序同佢覺得嘅能力排咗出嚟，之後仲因為佢唱通街，攪到呢五個高手因為呢個稱號而出晒名添。
我以為師父已經快手啦，點知千龍前輩仲快手攪掂咗殭屍王，而虫節大師亦都跟隨其後，至於中神通放最尾，係因為周白波話佢做得最少嘢，笑佢係「發呆中的神通」，所以叫「中神通」。
雖然我哋唔知邊個係幕後黑手，但係殭屍王事件總算係完咗。
之後會發生咩事？咪就係師兄單嘢同…
師姐嘅事囉。
(喺我講呢句嘢嘅時候，剩餘嘅妖魔鬼怪都逃走咗，而我見到…鴸鳥(即係有人手嗰隻雀)帶住咗一D嘢走咗，我總係覺得呢件事好似未完嘅咁)
(待續)
下集預告︰
「我識你師父，仲識你師兄，亦識你師姐，你D嘢我全部都知。」