米米蓮妖怪作品 -《再遇見到你》(長篇) (暫停刊): 第十九集 ~ 龜︰金蘭唔係跟姊妹用嫁咩？我…我俾人「鹹濕」啊…
第十九集 ~ 龜︰金蘭唔係跟姊妹用嫁咩？我…我俾人「鹹濕」啊…
上次講到變臉大師易面容同鬼面怪物錢阿土一齊出現咗喺「低域」嘅房…
佢哋個樣雖然恐怖，但係佢哋原來竟然係嚟求救嘅…
佢哋想救嘅就係同佢哋一樣，係「八扇」之一嘅雙面神偷申月兒。
我自知自己冇辦法幫到佢哋，所以叫佢哋去搵鳳初佢，順便睇吓有冇機會再見返鳳初佢。
(妖，唔係你自己要離開人哋嫁咩？)
我個心成日都蝦我。我認啊，我係決定咗離開佢，但係唔通連間中諗吓佢都唔得咩？
「…我識得一個人應該可以幫到你哋…佢叫陳鳳初，一個英偉不凡嘅男子漢大丈夫嚟嫁！」我同易面容佢哋兩個講。
「陳鳳初！？好似邊度聽過咁嘅？」錢阿土講。
「鳳啊！火鳳派嗰邊嫁，應該真係有料嫁，呢位高人應該冇呃我哋！」易面容講。
「但係…我哋可以點搵到佢啊？」錢阿土講。
「佢之前喺牛家村山邊，應該離呢度唔遠嫁咋，你哋快D去搵佢啦！」我講。
「係嘅，高人，我哋而家出發去搵佢！」易面容講。
講完佢哋兩個就走咗。
而我就去扶返起「低域」，再叫返方夫人佢哋嚟睇吓佢。
…
「阿妹，方少爺頭先去得好盡啊？做咩暈咗嘅？」西施嬸嬸佢都跟埋入嚟房，仲講鹹濕嘢。
我唔想再喺佢哋面前提易面容同錢阿土，一來驚嚇親佢哋，二來我好難解釋點解佢哋唔傷害我就走咗，所以我咁講︰
「低域…佢…俾…妖怪嚇暈咗！」
「妖怪！？」方夫人問。
我見「低域」痴情於方夫人，就諗住幫佢一把，嚟個順水推舟…
「係啊，原來佢之前俾妖怪迷惑咗，我啱啱打到隻妖怪現真身，個樣好肉酸，所以嚇暈咗低域，但係…隻妖怪話…一定會返嚟嫁，所以萬事要小心囉！」
我本來以為佢會自己睇住「低域」，點知…
「有瑞基你睇住佢，我就放心喇！」佢咁回應。
應該係西施嬸嬸講咗我D嘢俾方夫人知，所以佢識得叫我個名，但係我好似捉蟲添，咁咪反而幫唔到「低域」，令方夫人親近佢多D囉？所以，我咁做︰
「只有方夫人你可以保護到方少爺，因為你…屬…」
「屬猴！？」方夫人講。
「係喇，屬猴即係屬…」
「屬金！？」清明大師講。
「係喇，冇錯，就係因為金剋…」
「我明喇，高人果然係高人，金剋木，隻妖怪肯定係樹精所化，啱嗎？」
「咪…就係好似清明大師所講嘅咁囉，所以一定要方夫人你黐實方少爺先得。」
真係好，一直都有大家幫我答埋。
「佢同你都成親囉，咁大個仔仲要黐住阿媽啊？」西施嬸嬸又再多口。
「當然唔係，不過為佢安全著想，就黐多一陣先囉。」我回應。
之後，我哋出返大廳先，留返方夫人同「低域」一齊。
「阿妹，你幾時咁勁，識咁多嘢嫁？」西施嬸嬸細細聲問我。
「力量係…我朋友俾我喳嘛，我識咩嘢丫，吹水喳嘛。」
「咁頭先方少爺有冇掂過吓你啊？」呢個「掂」字又係講緊鹹濕嘢。
「頭先咪講咗囉，要打妖怪，邊有時間噃。」
「咁咪唗鬼晒？不過唔緊要啦，遲D大把機會，呵呵。」
西施嬸嬸停咗口，我就冇再理佢，我望一望咗出去外面，發現原來都開始夜喇…
僕人大嬸根據方夫人嘅指示安排咗我入住一間客房，就連西施嬸嬸都有間房住。
…
之後，我一個人坐咗喺間客房度，無所事事，又訓唔著，所以眈天望地，點知…
「高人，又係我啊，唔記得問你叫咩名添…」
錢阿土再次喺地下彈出嚟，真係好人都俾佢嚇壞。
「我叫陸瑞基啊，你叫我…龜匙丫！」
「哦，龜匙呀，我查過喇，陳鳳初坐咗監噃！」
「鳳初佢坐咗監！？點解啊？發生咩事啊？」我當然好驚訝啦。
「聽講話佢殺咗人噃！」
「殺人？殺邊個啊？佢…佢咩人都唔識，點會殺人啊？」我更驚訝。
「咁呢層我唔知喇，你想唔想去睇吓丫？我帶你去丫。」
「好！」鳳初有事啊，我當然要即刻去搵返佢啦，我好擔心啊。
我之後溜夜就跟咗錢阿土出去…
好快就到咗一個監牢，起初我以為唔係咁容易入到去睇…
點知原來錢阿土好犀利，兩三吓手就將D警呃走嘅呃走，整暈嘅整暈…
我哋入咗去裡面…
「陳鳳初，你喺唔喺度啊？」錢阿土喺一條監倉冷巷大嗌。
我唔敢叫鳳初，因為畢竟係我自己離開佢。
「人生於世上有幾個知己~ 多少友誼能長存…」
冷巷最尾一直有堆人唱緊歌，所以我哋慢慢行埋去…
但係行到埋去，乜人都見唔到，淨係見到地下有張符咒…
「友誼常在你我心裡啊！…」張符咒一直喺度發出聲音。
「高人果然係高人，竟然識重覆術！」錢阿土執起道符講。
喺呢一刻，雖然我知道鳳初成功逃走咗，但係我反而覺得黯然神傷，因為…
本來我仲以為有機會見返鳳初添…
「陸小姐，你唔使唔開心丫，陳鳳初佢逃走咗噃，唔係仲好咩？」
我抹一抹眼淚，講︰
「呢度大塵喳嘛，走嚧。」
之後我哋就離開咗嗰度，我同錢阿土傾咗一陣，知道其實佢哋仲可以搵其他人幫手，不過佢哋出面應該唔可行，所以佢想我幫手去求求嗰個人…
嗰個人叫做…
周白波！
「佢煽風點火嘅神功，配埋我同易面容，應該可以打得贏陸羽石嫁，但係…」
「但係咩啊？」
「要周白波幫手，就只有一個辦法。」
「咩辦法？」
「搵個靚仔去求佢，因為周白波係地球梗有鹹濕到出晒面嘅女人嚟。」
「我…我女仔嚟噃！」
「我知，但係你靚丫嘛，如果裝扮成男仔，肯定好靚仔，佢一定聽你話。」
我望一望佢個樣，再諗諗易面容個樣，又真係好難求到一個鍾意靚仔嘅女人幫佢哋手噃，所以…
我應承咗佢。
之後我先返咗去方家，仲訓咗覺好嘅。
…
第二日一起身，我就同西施嬸嬸同方夫人講咗一聲…
之後我就跟咗錢阿土出發…
「嘩，陸小姐你…」
「做咩啊？」
「真係好英俊啊，瘦得嚟仲有咁大舊胸肌，男人夢寐以求嘅V字身型啊！」
因為時間關係，我覺得救人要緊，所以好早就裝扮成男兒身，仲紮咗胸，不過聽到錢阿土咁講，我都唔知開唔開心好。
「丫，不過你雖然講嘢豪邁，但係聲音始終比較女仔，可以嘅話，沈一D會好D。」
「好，我試吓。」我用低沈嘅聲音回應。
「差唔多喇，似喇！」
易面容喺郊外同我哋會合咗。
「嘩，呢個就係陸小姐喇，真係好英偉噃！」易面容講。
「咪住先，我哋好似係咁叫陸小姐唔係太好，改返個男仔名俾佢先丫！」錢阿土講。
「不如就叫陸小鳳丫！」我講。
我又突然諗起鳳初，仲竟然跟埋佢哋傻…
「好啊！」
「好啊！」
但係我本來叫陸瑞基，唔係仲男仔咩？
之後我哋就一齊出發…
…
仲嚟到一間…
霓紅光管，黃底紅字招牌，寫住︰
「白滑大波！？」我好好奇。
「白波大屋啊！D字撩D啫。」易面容講。
我哋見冇人應門，直接就入咗去…
「會唔會唔係幾好啊？」我問。
「佢冇人應都冇計嫁。」錢阿土講。
正當我哋一步步向前行嗰陣，突然…
「丫~！」係我大嗌。
因為後面有隻祿山之手抓咗我屁股一吓。
「好軟熟嘅蘿啊！我鍾意啊！仲要咁靚仔同大隻添，正啊！」
一個唔知乜水嘅熟女大嬸望住我舔晒脷咁講。
(待續)
下集預告︰
「達師兄佢…佢不辭而別嚧。」