【躲在衣櫃?很久了...他發現我了嗎...】: 3-門前

我自以為是咁笑咗笑，
將鐵蓋蓋好之後，
慢慢咁行返去大門⋯

企起大門前面，
我可以從門下既空隙見到起屋入面透出嚟嘅燈光，證明我維修成功。當我暗地裏自我讚嘆自己嘅聰明，眼神閃過個空隙。

呈一條線嘅光，
多出一個黑色嘅障礙物。佢從左，移動到右，從右，再移動到中間嘅位置。中間嘅光線就被擋住左。





可以移動得咁靈活嘅物件，
可以係乜？
我屋企無養寵物，
想講個合理啲既解釋，
我一啲都唔願意相信，
呢個擺在眼前嘅事實。
同我隔住一道門距離嘅入侵者，

係人。





一個趁人離開屋企五分鐘就擅自入侵嘅人，究竟要有幾大嘅膽量？如果我而家入屋，有危險既一定係我。

我嘅思緒陷入混亂，
手足無措既我無計可施。
害怕得發紅嘅雙眼
死死望住門下個空隙。

我怕一個不留神，
失去左逃跑嘅好機會。





我嘗試唔發出任何聲音，
頭都唔回，身都唔轉，
右腳輕輕向後踏，
腳尖掂地，再慢慢將腳掌平放
最後將成隻腳穩定起地上。
一步。
左腳再輕輕向後踏，
同右腳一樣，
順次序將左腳穩定好。
再一步。

如我所願。
我嘅步伐冇發出任何聲音。
而屋入面嘅入侵者，
亦都冇任何動作。





我繼續向後行，
極度渴望逃走的心理，
不知不覺地掩蓋左我既理智。

原本緩慢嘅步伐，
慢慢變急、變快，
而係呢一瞬間，
我感覺到一隻冰冷既手，
輕輕咁，搭住左我膊頭。