那些年，當香港仲係百鬼夜行既時代: 19. 鎖羅盤XVII – 黑白雙凶II

普通人死後如果被葬係養屍地，咁佢地就好易會變成殭屍。而養屍地既泥土本身係帶有五行。唔同既養屍地可以養出唔同殭屍...水行地出藍凶，火行地紅凶等等。而佢地身上會長有唔同顏色既毛，當中最惡既就係黑白凶。黑凶係極陰之地既產物，而白凶就係極陽之地既產物。唔好以為極陽都一定好，物極反而會反必，道家所有既野都係要講求平衡，所以可以係呢兩極之中誕生絕對唔可以睇少。前者係晚間活躍能力會大增，另一個則唔怕陽光既傷害。而唯一共同點呢就係兩者都極難殺死，黑凶既速度好快，而白凶就破壞力極高，佢地可以話係集攻防體於一身。根據清朝既殭屍扎記既記載，黑凶只係出現過兩次，而白凶就出現過三次，而佢地係未試過破天荒一齊出現，睇黎今次我如果有命出返去，我就可以將呢個歷史寫入本扎記中，成為現今唯一一個同時擊敗黑白凶既人。 但係係寫入本扎記之前，我要諗下點從個兩隻窮凶極惡既野手上救返兩位師叔出黎。個兩位師叔基本上係唔會同呢D野打交道，佢地一個係破墓解機關，一個就幫人搵陰宅，玩陣法。所以面對呢D野佢地可以話係完全無自救能力。 我手中仲有一張燎原火符。唉，本來諗住去到最得關頭先用黎燒劉伯溫條屍，但係睇黎依家就要用。係呢個緊急既關頭，我請唔切火德真君，唯有直接使用。雖然威力唔會有對白虎個時咁厲害，但係相信都已經足夠搞掂呢兩隻黑白凶。 我偷偷地走到去黑白凶既身後。雖然我躡手躡腳咁行，但係感官敏銳既佢地已經知道我既存在，佢地放過左師叔佢地，轉頭狠狠地盯住我。 我感覺到佢地渾身散發出陰氣，甚至比隻花蓮子仲重。佢地既陰氣已經重係可以用肉眼見到，佢地全身上下都有黑煙出，唔知仲以為佢地比火燒過黎。 師父係呢個時候都趕到。「淨心凝神!燎原火既口訣係浩劫之初，火燒人間，灰飛煙滅，燎原之火!擴散!」 哼，有口訣的話，要一次過燒死哂你地又有何難度!? 「浩劫之初，火燒人間，灰飛煙滅，燎原之火!擴散!」咒音一落，手中符紙突然變到十分高溫。我唔敢再繼續渣係手上，立即衝黑白凶甩出。而黑白凶見到我有所行動，佢地都開始郁動，發動進攻。 係佢地踏出唔夠兩步時，漂係半空中既符突然爆出大量藍紅色既火焰，將黑白凶盡包其中。黑白凶入左去火焰圈後無哂聲氣。燒死左?我心暗忖。無理由丫， 燎原火未完全熄滅前，中咒者都唔會受到任何傷害架喎。四周寂靜無聲。 啵! 火焰圈熄滅了。四周瞬間暗淡左落黎，而黑白凶都唔見左，好似從來無存在過咁。 「我感覺唔到佢地兩隻野既陰氣啦，一仔，可以啦。」師父開口，話我知黑白雙凶已滅，同時紓緩一下繃緊既氣氛。下?會唔會太簡單呀?雖然燎原火威力極大，甚至連四神之一既白虎都可以輕易殺死...但係黑白凶都唔係省油既燈，對自然之力抵抗性應該會高啲架喎.... 唉不過算啦，既然連師父都話無問題，咁應該就可以了。我過去扶起帝師叔同王希師叔，想扶佢地去墓牆到，令佢地可以依牆而坐休息下。 「咳..咳...你地快D去搵佢條屍燒左佢去...呢個墓好古...古怪..咳...同一般既墓既結..結構好唔同...」帝師叔捉實我隻手，一企起身就開口。帝師叔成面都係血，手中仲拎住一件好奇怪既工具。 「好好好，你地休...呀!」點解我唔再講埋落去?因為我未講到個息字，我就感覺到有D溫熱既液體濺上左我塊面到。我下意識望向液體濺黎既方向。只見兩位並肩而企，比我扶住既師叔心口都有一隻手伸左出黎，我仲可以見到隻手上邊尖銳又帶有血跡既長指甲。 「想燒我?好在我仲留有一手!」